- Əziz dostlar!

Bu gün çox əlamətdar bir gündür. Bu gün biz yeni, böyük sement zavodunun təməl daşını qoyduq və bu münasibətlə mən sizin hamınızı ürəkdən təbrik edirəm.

Bu əlamətdar hadisə bir də onu göstərir ki, Azərbaycan çox uğurla inkişaf edir, ölkəmizdə bütün sahələrdə iqtisadiyyat güclənir. Xüsusilə indiki böhran şəraitində, dünyanı iqtisadi və maliyyə böhranı bürüyüb, eyni zamanda, bu böhran artıq sənaye istehsalına da mənfi təsir etməyə başlamışdır. Belə bir şəraitdə Azərbaycanda xarici sərmayələrlə yeni, böyük, 300 milyon avrodan artıq dəyəri olan sement zavodunun təməlinin qoyulması çox böyük hadisədir. Bu, ilk növbədə, onu göstərir ki, xüsusilə böhranlı durumda xarici investorların Azərbaycana marağı artıbdır. Eyni zamanda, onu göstərir ki, Azərbaycan dövləti xarici investisiyaların cəlb edilməsi üçün əlavə tədbirlər görür. Azərbaycanda çox gözəl sərmayə mühiti vardır, xarici şirkətlərlə dövlət qurumları arasında səmərəli əməkdaşlıq mövcuddur və bu, daha da dərinləşir.

Bu, eyni zamanda, onun göstəricisidir ki, Azərbaycanda qeyri-neft sektorunun inkişafı üçün çox gözəl imkanlar var və tikiləcək sement zavodunun timsalında biz bunu görürük.

Azərbaycan etibarlı tərəfdaşdır. Bu layihədə əsas rolu oynayan İsveçrənin tanınmış Holsim şirkəti artıq 10 ilə yaxındır ki, Azərbaycanda işləyir, fəaliyyət göstərir. On ildən sonra yeni layihənin həyata keçirilməsi üçün görülən işlər onu göstərir ki, Azərbaycan xarici sərmayələrin qoyuluşu üçün sözün əsl mənasında çox gözəl bir yerdir. Bu layihə müştərək layihədir. Qeyd etdiyim kimi, burada əsas, aparıcı rolu Holsim şirkəti oynayır. Eyni zamanda, Avropa Yenidənqurma və İnkişaf Bankı layihədə həm investor kimi, həm də maliyyə mənbəyinin təşkili ilə bağlı çıxış edən qurum kimi fəaliyyət göstərir. Azərbaycan İnvestisiya Şirkəti layihədə öz payına malikdir və bu da çox gözəl əlamətdir. Bir müddət əvvəl yaradılmış Azərbaycan İnvestisiya Şirkəti məhz belə layihələrin həyata keçirilməsi üçündür və Azərbaycana lazım olan sahələrə investisiyaların cəlb edilməsi ilə məşğuldur. Əminəm ki, Azərbaycan İnvestisiya Şirkətinin belə böyük layihədə iştirak etməsi onun gələcək fəaliyyəti üçün də çox yaxşı təcrübə olacaqdır.

Bir sözlə, bütün bu gözəl mənzərə, - yəni həm xarici şirkətlərin marağı, beynəlxalq maliyyə qurumlarının Azərbaycana böyük məbləğdə kreditlər ayırması, həm də yerli şirkətlərin bu işlərdə iştirakı, - bu zavodun tikintisində podratçı şəklində çoxsaylı yerli şirkətlər də iştirak edəcəkdir, - bir də onu göstərir ki, Azərbaycanda son illər ərzində aparılan iqtisadi islahatlar, sənayeləşdirmə siyasəti və inkişafla bağlı bütün görülən tədbirlər öz nəticəsini verməkdədir.

Bu gözəl və ən müasir texnologiyalara malik olacaq zavodda çoxsaylı yerli vətəndaşlar işləyəcəkdir. Həm zavodun tikintisində, həm də sonra istismarında Azərbaycan vətəndaşları işləyəcək və bu, eyni zamanda, yeni iş yerlərinin açılmasına gətirib çıxaracaqdır. Bildiyiniz kimi, son beş il ərzində Azərbaycanda 766 min yeni iş yerləri açılmışdır ki, onların 547 mini daimi iş yerləridir. Azərbaycanda qeyri-neft sektorunun inkişafında bu zavodun böyük rolu olacaqdır. Böyük qürur hissi ilə deyə bilərəm ki, böhrana baxmayaraq, bu ilin birinci rübündə Azərbaycanda qeyri-neft sektoru 14 faiz artıbdır.

Bütün dünyada iqtisadiyyat tənəzzülə uğrayır, sənaye istehsalı aşağı düşür. Ölkələr çətin vəziyyətə düşür, xarici maliyyə yardımına ehtiyacları artır. Ancaq Azərbaycanda biz tam başqa mənzərəni görürük. Azərbaycan həm maliyyə baxımından, həm də yerli resurslar baxımından özünü təmin edən ölkədir. İqtisadi inkişaf baxımından birinci rübdəki artım bir daha göstərir ki, bizim ölkəmiz uzunmüddətli inkişaf strategiyasını düzgün seçibdir. Aparılan iqtisadi islahatlar Azərbaycana böyük mənfəət gətiribdir.

Təsadüfi deyil ki, 2008-ci ilin yekunlarına görə Dünya Bankı Azərbaycanı bir nömrəli islahatçı ölkə kimi təqdim edibdir. Bu, Azərbaycanda görülən işlərin bariz nümunəsidir. Ən gözəl nümunə görülən işlərdir, ən gözəl nümunə tikilən zavodlar, fabriklər, açılan iş yerləridir. Bir daha demək istəyirəm ki, bizim bütün səylərimiz buna yönəldilibdir. Əgər əvvəlki illərdə bəziləri bizim uğurlarımızı daha çox enerji amili ilə, neft amili ilə bağlayırdısa, artıq bu gün hər kəsə bəllidir ki, uğurların əsas səbəbi düşünülmüş siyasət, iqtisadi islahatlar, siyasi islahatlar, xarici şirkətlərlə uğurlu əməkdaşlığımızdır. Biz artıq uzun illərdir ki, xarici şirkətlərlə səmərəli əməkdaşlıq aparırıq və bu əməkdaşlıq ikitərəflidir, bütün tərəflərin maraqlarına cavab verir.

Bir daha demək istəyirəm ki, bu zavodun tikintisinin çox böyük mənası var. Hər bir müəssisənin tikintisi məni sevindirir, ancaq belə nəhəng - həm maliyyə baxımından, həm istehsal gücü baxımından nəhəng, dünya miqyaslı zavodun tikintisi, özü də böhranlı durumda tikintisi xüsusi məna daşıyır. Əminəm ki, siz də mənim fikirlərimə şəriksiniz.

Azərbaycanın uğurlu inkişafı bundan sonra da davam edəcəkdir. Biz artıq sübut etmişik ki, öz gücümüzlə yaşaya və sürətlə inkişaf edə bilərik. Son beş il ərzində - 2004-2008-ci ildə Azərbaycandakı iqtisadi inkişaf heç bir başqa ölkədə olmamışdır. Beş ildə iqtisadiyyat 2,6 dəfə artıb, büdcə xərcləri 10 dəfədən çox artıbdır. Yoxsulluğun səviyyəsi kəskin şəkildə aşağı düşübdür. İşsizliklə bağlı problemlərin böyük əksəriyyəti öz həllini tapıbdır. Azərbaycanda böyük infrastruktur layihələri icra olunur. Bütün bunlar ölkəmizin hərtərəfli inkişafına xidmət göstərir.

Bu zavodun tikintisi, eyni zamanda, onu göstərir ki, Azərbaycanın gələcəyinə, iqtisadiyyatın inkişafına xarici investorlar tərəfindən böyük inam var. İndi Azərbaycanın bazarı daxili istehsalçılar tərəfindən böyük dərəcədə təmin edilir. Biz elə etməliyik ki, o cümlədən sement istehsalı da Azərbaycanın bütün tələbatını ödəyə bilsin. İndi biz idxaldan asılıyıq, amma bu zavodun tikintisi, digər zavodların tikintisi bu asılılığı azaldacaq və əminəm ki, vaxt gələcək, sement istehsalı Azərbaycanın bütün tələbatını təmin edəcəkdir.

Hazırda illik tələbat, istehlak olunan sementin həcmi 3,7 milyon tondur. Gələcəkdə bu artacaq və biz bu artıma hazır olmalıyıq. Eyni zamanda, bugünkü gün həm də ona görə əlamətdardır ki, Azərbaycanda həyata keçirilən nəhəng tikinti-quraşdırma, infrastruktur layihələri artıq bütün iqtisadiyyata təkan veribdir. Daha çox dövlət investisiyaları hesabına tikilən yollar, körpülər, binalar, müəssisələr tikinti sektorunun inkişafına böyük təkan verir, tələbat artır. Tələbat artdıqca, xüsusilə tikinti materiallarına tələbat artdıqca, bax, belə gözəl zavodlar da tikilir. Əgər bu infrastruktur layihələri olmasaydı, Azərbaycanın iqtisadiyyatı sürətlə inkişaf etməsəydi, bəlkə də bu zavod tikilməzdi. Yaxud da ki, 10 ildən sonra tikilərdi. Bu gün isə buna tələbat var. Xarici şirkətlər hər şeyi düzgün ölçüb-biçirlər. Onlar öz maliyyə proqramlarını çox böyük təhlildən sonra icra edirlər. Holsim kimi transmilli şirkətin müxtəlif ölkələrdə zavodları da var, fəaliyyəti də var. Azərbaycanın bir prioritet ölkə kimi onlar tərəfindən seçilməsi göstərir ki, Azərbaycana inam böyükdür. Biz bunu bilirik, hiss edirik. Mən çox şadam ki, bu gözəl gündə biz təməl qoyulmasında bərabər iştirak edirik. Əminəm ki, bu, eyni zamanda, Azərbaycanın dünya birliyinə, dünya iqtisadiyyatına inteqrasiya proseslərinə güclü təkan verəcəkdir. Bizim xarici şirkətlərlə əməkdaşlığımıza yeni imkanlar açacaqdır.

Əziz dostlar, mən sizin hamınızı bu gözəl hadisə münasibətilə bir daha ürəkdən təbrik etmək istəyirəm. Layihədə iştirak edən bütün şirkətlərə uğurlar arzulayıram. Mənə verilən məlumata görə, zavodun fəaliyyətə başlaması iki ildən sonra nəzərdə tutulur. Əminəm ki, zavod yüksək keyfiyyətlə və vaxtında tikiləcək və biz sizinlə bərabər onun açılışında iştirak edəcəyik.

Bir daha sizi təbrik edir, sizə yeni-yeni uğurlar arzulayıram.

X X X

Sonra Holsim Group şirkətinin rəhbəri Markus Akerman çıxış etdi.

######