AZƏRBAYCAN PREZİDENTİ İLHAM ƏLİYEVİNNİTQİ
Əziz bacılar və qardaşlar!
Mən sizin hamınızı ürəkdən salamlayıram, Sizə öz dərin hörmət və məhəbbətimi bildirirəm.
Mən bu gün səhər Qubaya gəlmişəm. Səhərdən burada müxtəlif tədbirlər, görüşlər keçirilibdir. Mən çox şadam ki, Azərbaycanın qədim torpağı olan Quba inkişaf edir. Bilirsiniz ki, mən seçkilərdən əvvəl Qubaya gəlmişdim. Ondan əvvəlki dövrlərdə də dəfələrlə Qubada olmuşdum. Quba mənim üçün çox əziz bir şəhərdir, çox doğma bir diyardır. Təsadüfi deyil ki, Azərbaycan Milli Olimpiya Komitəsi tərəfindən ölkəmizin müxtəlif bölgələrində inşa edilmiş olimpiya kompleksləri içərisində ən möhtəşəmi məhz Qubada tikilmişdir. Keçən ilin oktyabr ayında biz birlikdə onun açılışını etdik. Məhz bu gün də o kompleksdə çox gözəl tədbir keçirilmişdir. Azərbaycanda sahibkarlıqla məşğul olan şəxslərə kreditlər verilmişdir. Bu, dövlət tərəfindən sahibkarlığın inkişafına yönəlmiş böyük bir addımdır.
Biz çalışırıq ki, sahibkarlıqla məşğul olan insanlar üçün daha gözəl şərait yaradılsın, onlara kreditlər verilsin və onların fəaliyyətinə dövlət tərəfindən daha yüksək səviyyədə qayğı göstərilsin. Bilirsiniz ki, mənim seçkiqabağı vədlərimin içərisində yeni iş yerlərinin açılması, yerli istehsalın güclənməsi, sahibkarlar sinfinin güclənməsi xüsusi yer tutmuşdur. Mən bu siyasətə sadiqəm və çox şadam ki, seçkilərdən keçən bu dövr ərzində Azərbaycanda 40 minə qədər yeni iş yeri açılmışdır. O cümlədən bu bölgədə - Qubada və qonşu rayonlarda yeni iş yerləri yaradılmışdır.
Mən əminəm ki, bu siyasət Azərbaycana böyük xoşbəxtlik gətirəcəkdir. Azərbaycanın iqtisadiyyatı hərtərəfli inkişaf edəcəkdir. Qeyri-neft sektoru inkişaf edəcək, Azərbaycanda işsizlik, yoxsulluq aradan qaldırılacaqdır. Bilirsiniz ki, bu istiqamətdə çox böyük addımlar atılmışdır. Xalqımızın ümummilli lideri Heydər Əliyevin təşəbbüsü ilə 1993-cü ildən başlayaraq aparılmış iqtisadi islahatlar Azərbaycana böyük faydalar gətirdi, böyük xeyirlər verdi, ölkəmiz inkişaf etdi. Xalqımız daha da yaxşı yaşamağa başladı. Mən də bu siyasətə sadiqəm.
Burada qeyd olundu ki, bu yaxınlarda qəbul edilmiş qərarlar əsasında Azərbaycanda büdcədən maliyyələşən təşkilatlarda çalışan insanların əmək haqları artırılır. Minimum əmək haqqı qaldırılıb və bundan sonra da qaldırılacaqdır. İmkan daxilində çalışacağıq ki, bütün gücümüzü, səylərimizi insanlarımızın daha da yaxşı yaşamasına yönəldək. Mən əminəm ki, Azərbaycanda aparılan iqtisadi siyasət nəticəsində, sosial siyasət nəticəsində xalqımız daha da yaxşı yaşayacaqdır.
Qaçqınların, məcburi köçkünlərin problemləri bizim ən ağrılı problemimizdir. Bu istiqamətdə də addımlar atılır. Mən bilirəm ki, Qubada da erməni təcavüzündən əziyyət çəkmiş insanlar yaşayırlar. Bilirsiniz ki, böyük proqramlar həyata keçiririk. Qaçqınlar, köçkünlər üçün yeni qəsəbələr, şəhərciklər salınır. Mən söz vermişdim ki, Azərbaycanda bir dənə də çadır şəhərciyi qalmayacaqdır. Mən bu sözə sadiqəm və əminəm ki, biz bu proqramı həyata keçirəcəyik. Qaçqınlar, köçkünlər müvəqqəti olaraq daha müasir və münasib yerlərə köçürüləcəkdir. Amma hamımız bilməliyik ki, bu, müvəqqəti bir addımdır. Mən şübhə etmirəm ki, Azərbaycanın torpaqları işğaldan azad olunacaqdır. Biz öz torpaqlarımızı nəyin bahasına olursa-olsun, azad edəcəyik. Azərbaycanın güclü ordusu var. Bilirsiniz ki, ordu quruculuğuna böyük diqqət göstərilir. Bu yaxınlarda orduya əlavə vəsait ayrılıbdır və şübhə etmirəm ki, biz torpaqlarımızı istənilən yolla azad edəcəyik.
Azərbaycanda qəbul edilmiş regional inkişaf proqramı həyata keçirilir. Mən seçkilərdən əvvəl bildirmişdim ki, bu məsələyə xüsusi diqqət göstəriləcəkdir. Çünki Azərbaycanın hər bir guşəsi, hər bir rayonu, kəndi inkişaf etməlidir. Azərbaycanda gedən uğurlu iqtisadi siyasətin nəticəsini hər bir vətəndaş hiss etməlidir. Bu məqsədlə, bu proqramın necə həyata keçirilməsinə nəzarət etmək üçün mən bölgələrə səfər edirəm.
Mən Qubada doqquz ay bundan əvvəl olmuşam. Bu dövr ərzində Qubada böyük dəyişikliklər baş vermişdir. Bilirsiniz ki, mənim Fərmanımla buraya yeni icra hakimiyyəti başçısı təyin olunubdur. Bu gün insanlarla söhbət əsnasında hiss edirəm ki, yeni icra hakimiyyəti başçısının fəaliyyəti bəyənilir və xalq tərəfindən dəstəklənir. Mən icra hakimiyyətinin başçısını təyin edəndə, əlbəttə, onunla Quba haqqında, ümumiyyətlə, bölgə haqqında çox ətraflı söhbət etdik. Mən öz tövsiyələrimi vermiş və demişdim ki, elə işləməlisən ki, xalq səni dəstəkləsin. Get, yaxşı işlə, insanlara qayğı göstər, insanlara kömək et. Bizim siyasətimiz bundan ibarətdir. Mən çox şadam ki, o, bütün göstərişləri ləyaqətlə yerinə yetiribdir.
Hər bir rəhbərin əsas vəzifəsi xalqa xidmət etməkdir, xalqa qayğı göstərməkdir. Bu, bizim vəzifəmizdir və onu şərəflə yerinə yetiririk. Mən əminəm ki, Azərbaycan növbəti illərdə daha da güclənəcək, öz iqtisadi potensialını gücləndirəcək, ölkəmiz zənginləşəcək, qüdrətli dövlətə çevriləcəkdir.
Qubalıların Azərbaycanın müstəqilliyi uğrunda mübarizədə böyük xidmətləri olmuşdur. Qubalılar müstəqillik uğrunda, torpaqlarımızın qorunması yolunda şəhidlər vermişlər. Qubalılar daim Azərbaycanın müstəqilliyi işinə böyük töhfələr vermişlər. Bu proses indi də davam edir. Mən buna görə sizə öz minnətdarlığımı, təşəkkürümü bildirirəm.
Əziz qubalılar, mən bir daha sizi salamlayıram. Bu görüşə gəldiyinizə görə sizə öz təşəkkürümü bildirirəm. Sizə xoşbəxtlik, cansağlığı, uğurlar arzulayıram. Sağ olun.
Bölmənin digər xəbərləri
