Almaniyanın tanınmış şirkətlərinin rəhbərlərinin də dəvət olunduqları görüşü Şərqi Avropa Münasibətləri Komitəsi rəyasət heyətinin üzvü, Siemens şirkəti idarə heyəti sədrinin müavini RUDİ LAMPREXT açaraq dedi:

- Cənab Prezident!

Azərbaycandan olan möhtərəm qonaqlar!

Xanımlar və cənablar!

Bu gün xüsusi bir gündür. Yalnız ona görə yox ki, biz sizinlə buradayıq, həm də ona görə ki, cəmi 30 dəqiqə əvvəl Azərbaycan Olimpiya oyunlarında qızıl medal qazandı. Bu hadisə bugünkü axşam üçün yaxşı başlanğıcdır.

Cənab Prezident, böyük şərəfdir ki, bu gün Sizi Şərqi Avropa Münasibətləri Komitəsi adından salamlayıram. Mən məmnunam ki, Almaniya biznesi adından Sizi salamlayıram. Təmsil olunan şirkətlər Azərbaycanla uzun illər boyu iş təcrübəsinə malikdirlər. Bəziləri maraqlı layihələri həyata keçirirlər, bəziləri isə münasibətləri yenicə qururlar. Məmnunam ki, bu görüş Berlində baş tutur. Biz bir ildən çoxdur ki, bu görüşə hazırlaşırdıq. Cənab Prezident, son 8 ildə iki dəfədir ki, Komitə Azərbaycanın ən yüksək nümayəndəsi ilə görüşür.

Hamımıza məlumdur ki, Azərbaycan Almaniya biznesi üçün çox vacib və maraqlı tərəfdaşdır. Avropa Birliyinin genişlənməsi və yeni qonşuluq proqramı ilə onun əhəmiyyəti daha da artır. Zənnimcə, bunu deməklə elə bir sirr açmıram ki, Şərqi Avropa Münasibətləri Komitəsi Avropa Birliyinin daha da genişlənməsi və Cənubi Qafqaz ölkələrini əhatə etməsi planına sadiqdir və bu yöndə işləmək əzmindədir.

Azərbaycan dinamik şəkildə inkişaf edən və genişlənən potensial bazardır. İqtisadi göstəricilər özlüyündə hər şeyi izah edir. Son bir neçə ildə 10 faizdən də çox artan ümumi daxili məhsul Azərbaycan iqtisadiyyatını dünyada ən sürətlə artan iqtisadiyyatlar sırasına daxil etmişdir. Müqayisə etsək görərik ki, ölkənin iqtisadiyyatı Amerika Birləşmiş Ştatlarının iqtisadiyyatından 4 dəfə sürətlə artır və Avropa Birliyi iqtisadiyyatından 12 dəfə sürətlə inkişaf edir. Hətta iqtisadiyyatın miqyasının çox yüksək olmadığını nəzərə aldıqda belə, bunlar çox valehedici rəqəmlərdir. Amma o fakt da vardır ki, iqtisadi artım, əsasən, neftin qiymətindən asılıdır. Bu, neft hasilatı və ixracını təşviq edir, dövlət gəlirlərinin, büdcə mədaxilinin artmasına imkan yaradır. Bununla belə, iqtisadiyyatın davamlı artımı yalnız Azərbaycanın iqtisadi islahatlar siyasətini davam etdirəcəyi və özü də uğurla davam etdirəcəyi təqdirdə mümkündür.

Bu baxımdan neft və qaz sektoru digər sektorları arxasınca apara biləcək lokomotiv rolunu oynaya bilər. Uzunmüddətli baxımdan isə, iqtisadiyyatda özünü təminetmə prinsipi gözlənilməlidir. Digər sektorlar da, belə bir metafora işlətsək, özləri lokomotivə çevrilməlidirlər.

Təəssüflər olsun ki, Qafqaz hələ də sabitlik məkanı deyildir. Bunun da regionun iqtisadi inkişafına mənfi təsiri olur. Biz Azərbaycanın həm ölkədaxili, həm də beynəlxalq sabitliyi təmin etmək səylərini alqışlayırıq. Hökumətin üzərində işlədiyi yoxsulluğun azaldılması proqramı sabitliyin əldə olunmasında əsas rol oynayacaqdır. İqtisadi artım da yoxsulluğa qalib gəlmək yolunda aparıcı rol oynayır. Almaniya biznesi adından mən istərdim ki, davamlı inkişaf əldə etmək işində Sizə uğurlar arzulayım.

Azərbaycan və Almaniya bir-birinə loyal tərəfdaşlardır. Ölkələrimiz arasında ticarət davamlı şəkildə inkişaf edir və hazırda 400 milyon avro həddinə çatmışdır. Bu göstəriciyə baxmayaraq, hamımız bilirik ki, işbirliyi potensialından tam istifadə olunmayıbdır. Azərbaycan Müstəqil Dövlətlər Birliyində bizim 5-ci böyük ticarət tərəfdaşımızdır. Bununla belə, Azərbaycanla ikitərəfli ticarət çox azdır. Sərmayə qoyuluşu da hər iki tərəf üçün qənaətbəxş deyildir. Mən əminəm ki, Azərbaycan iqtisadiyyatı inkişafının ikinci fazasında bu ölkəyə gələn alman şirkətlərinin sayı artacaqdır. Xüsusilə də elektrik stansiyaları, tikinti, yüngül sənaye, informasiya texnologiyaları, telekommunikasiya sahəsində geniş imkanlar mövcuddur. Təhlükəsizlik texnologiyası, kənd təsərrüfatı sahəsində də imkanlar böyükdür.

Son bir neçə il müddətində çoxlu əlaqələr yaradılmış və komitələr müvafiq iş aparmışlar. Hökumətlər arasında sərmayə və ticarət üzrə işçi qrupu vardır. Xüsusi birgə biznes qrupu yaradılmışdır, oraya daxil olan şirkətlərin məqsədi ikitərəfli biznesi inkişaf etdirmək və çətinlikləri aradan götürməkdir. Bir neçə ay əvvəl 17 milyon avroluq yardım təsis etmək qərara alındı ki, bu vəsait də 2004-2005-ci illər üçün ikitərəfli biznes münasibətlərinin genişlənməsinə sərf olunacaqdır. Almaniya İnkişaf Agentliyinin Azərbaycanda ofisi var, onun da əsas məqsədi müxtəlif layihələri, o cümlədən biznes sahəsində olan layihələri həyata keçirməyə yardım etməkdir. Ticarət münasibətlərinin inkişaf etdirilməsi üzrə Almaniya-Azərbaycan Assosiasiyası buna misal ola bilər. Bu təşkilata artıq 40 alman şirkəti daxildir. Təşkilatın məqsədi Almaniya və Azərbaycanın iqtisadi maraqlarını birləşdirmək və hər iki ölkənin maraqlarına uyğun olaraq irəli çəkməkdir. Azərbaycan Ticarət və Sənaye Palatası bu yaxınlarda Berlində ofisini açdı və ölkələrimiz arasında münasibətləri fəal surətdə irəli aparır. Bütün bu deyilənlər onu göstərir ki, biz doğru yoldayıq.

Səmimiyyətlə inanıram ki, mənə Siemensin Azərbaycandakı işi ilə bağlı bir neçə kəlmə deməyə imkan verəcəksiniz. Bizim şirkətin Azərbaycanla xüsusi münasibətləri çox keçmişə gedib çıxır. Hələ 1864-cü ildə Karl Siemens bizim şirkətin təsisçilərinin dəstəyi ilə Gədəbəydə mis mədəni almışdı. Qafqazda uzun illər yaşamış və orada da dünyasını dəyişmiş Karl Siemens Hindistan-Avropa teleqraf xəttini yaratdı və o xətt də Azərbaycandan keçirdi. Bu misal göstərir ki, Siemens hələ o vaxt da, indi də aparıcı rol oynayan şirkətlərdəndir. Hazırda biz 190-dan artıq ölkədə təmsil olunuruq. Biz nəzərdə tutduğumuz xarici ticarətin 2/3-nə nail olmuşuq. Əlbəttə ki, biz ticarətimizi daha da genişləndirmək istəyirik və nəzərdə tutduğumuz ölkələrin ilk sıralarında Azərbaycan və digər MDB ölkələri gedir.

Biz 1997-ci ildən Azərbaycanda təmsil olunuruq. İnanırıq ki, ölkənin biznes imkanları böyükdür. İnfrastruktur şirkəti olaraq biz bu sahədə də töhfə verə və Azərbaycan vətəndaşlarının gündəlik həyatlarına daha çox rahatlıq gətirə bilərik. Buna misal olaraq, tibbi texnologiyanı göstərmək olar. Bizə həvalə olunan xəstəxanaları müasir tibbi avadanlıqla təchiz edirik. Çoxlu sayda energetika texnologiyaları layihələri də həyata keçiririk. Əminəm ki, bizim iştirakımız Sizin ölkənin bundan sonrakı inkişafında müsbət rol oynaya bilər. Mən yalnız Siemensi deyil, ümumiyyətlə, alman biznesinin iştirakını nəzərdə tuturam.

Xanımlar və cənablar, icazə verin çıxışımı yekunlaşdırım. İnanıram ki, bizim biznes münasibətlərimiz uzunmüddətli olacaq və sürətlə inkişaf edəcəkdir. Almaniya iş adamları üçün Azərbaycan cəlbedici məkandır. Alman biznesini təmsil edən çoxsaylı nümayəndələrin burada olması buna parlaq misaldır. Bu görüş iki ölkə arasında əməkdaşlığı irəlilətmək sahəsində daha bir addımdır. Burada işləyən alman biznesinin nümayəndələri artıq Sizin ölkədə müxtəlif sektorlarda layihələrin həyata keçirilməsinə qatılıblar və yaxud da yaxın gələcəkdə mühüm layihələrə başlamaq əzmindədirlər. Komitədəki işimizlə biz gələcəkdə Almaniya-Azərbaycan biznes münasibətlərinin hansı istiqamətdə inkişaf edəcəyini müəyyənləşdirməyi planlaşdırırıq. Cənab Prezident, Sizə, eləcə də ölkənizə, Almaniya-Azərbaycan biznes münasibətlərinə uğurlar arzulayıram. Bizimlə birgə olduğunuza görə çox sağ olun. Qəbul zamanı Sizinlə səmərəli fikir mübadiləsi aparacağımıza ümid edirəm. Çox sağ olun.

X X X

Dövlətimizin başçısı görüşdə nitq sölədi.