SİYASƏT
Azərbaycan və Mərakeş arasında gənclər və idman sahəsində əməkdaşlığın inkişafı məsələsi müzakirə edilmişdir
Bakı, 23 may (AZƏRTAC). Azərbaycanın Mərakeş Krallığındakı səfiri S.Ağabəyov bu ölkənin gənclər və idman naziri Məhəmməd Uzin ilə görüşmüşdür.
Səfirlikdən AZƏRTAC-a bildirmişlər ki, S.Ağabəyov yeni vəzifəyə təyin edilməsi münasibətilə M.Uzini təbrik etmiş, Azərbaycanın gənclər və idman naziri Azad Rəhimovun təbrik məktubunu təqdim etmişdir.
Azərbaycanın və Mərakeşin müxtəlif sahələrdə uğurlu əməkdaşlığından danışan diplomat ölkələrimiz arasında beynəlxalq təşkilatlar, xüsusilə BMT və İslam Əməkdaşlıq Təşkilatı (İƏT) çərçivəsində səmərəli işbirliyini xüsusi vurğulamışdır. Azərbaycanın və Mərakeşin BMT Təhlükəsizlik Şurasının qeyri-daimi üzvləri olmalarından məmnunluğunu ifadə edən diplomat Ermənistan-Azərbaycan, Dağlıq Qarabağ və Qərbi Səhra münaqişələri üzrə iki ölkə arasındakı davamlı qarşılıqlı dəstəyin əhəmiyyətini bildirmişdir.
S.Ağabəyov Mərakeşin sabiq gənclər və idman naziri M.Belxəyyatın və Azərbaycanın gənclər və idman naziri A.Rəhimovun qarşılıqlı səfərləri çərçivəsində aparılmış səmərəli müzakirələri xatırlatmışdır. A.Rəhimovun Mərakeşə səfəri zamanı iki ölkənin müvafiq nazirlikləri arasında gənclər və idman sahəsində əməkdaşlıq protokolunun imzalandığı vurğulanmışdır. Azərbaycan ilə tanışlıq məqsədi ilə mərakeşli gənclərdən ibarət 15 nəfərlik nümayəndə heyətinin bu ilin avqustunda ölkəmizə nəzərdə tutulan səfərinin həmin sahədə əməkdaşlığın inkişafı baxımından əhəmiyyəti qeyd olunmuşdur. Heyətin Mərakeş gənclər təşkilatlarının rəhbərlərindən, gənc deputatlardan, gənclərlə işləyən dövlət qurumunun və ali təhsil müəssisələrinin tələbə özünüidarəetmə orqanlarının nümayəndələrindən ibarət olmasının məqsədəuyğunluğu diqqətə çatdırılmışdır.
Nazir M.Uzin ölkələrimiz arasında mövcud siyasi əlaqələrin yüksək səviyyəsindən, beynəlxalq təşkilatlar, xüsusilə BMT, İƏT çərçivəsindəki səmərəli əməkdaşlıqdan və qarşılıqlı dəstəkdən məmnunluqla bəhs etmişdir. O, gənclər və idman sahəsində əməkdaşlığın inkişaf etdirilməsi məqsədi ilə iki qardaş ölkə arasında mövcud imkanlardan daha səmərəli istifadə olunmasının zəruriliyini vurğulamış və bu istiqamətdə əlindən gələni əsirgəməyəcəyini diqqətə çatdırmışdır. Nazir qarşılıqlı səfərlərin əhəmiyyətini bildirərək gənclər və idman sahəsində əməkdaşlıq perspektivlərinin müzakirəsi məqsədi ilə ölkəmizə səfər etməyə hazır olduğunu bildirmişdir.
Görüşdə Azərbaycanda gənclərə və idmana göstərilən dövlət qayğısı, həyata keçirilən uğurlu layihələr haqqında mərakeşli nazirə ətraflı məlumat verilmişdir. Bakının 2020-ci ildə keçiriləcək Yay Olimpiya və Paralimpiya oyunlarına ev sahibliyi etmək uğrunda dünyanın bir sıra iri şəhərləri ilə rəqabət apardığı diqqətə çatdırılmışdır.
Nazir M.Uzin Bakı haqqında çox eşitdiyini və şəhərimizin Olimpiya oyunlarına ev sahibliyi etməyə layiq olduğunu vurğulamışdır. O, iki ölkə arasında gənclərdən ibarət nümayəndə heyətlərinin qarşılıqlı səfərlərinin əhəmiyyətini qeyd edərək, mərakeşli gənclərin bu ilin avqustunda Azərbaycana həyata keçirilməsi nəzərdə tutulan səfərinə böyük əhəmiyyət verdiyini bildirmişdir.