Bakı, 29 may, AZƏRTAC

Azərbaycan Dövlət Bədən Tərbiyəsi və İdman Akademiyasında “Azərbaycan Xalq Cümhuriyyətinin 100 illiyində bədən tərbiyəsi və idmanın inkişafı (1918-2018)” kitabının təqdimatı keçirilib.

Akademiyadan AZƏRTAC-a bildiriblər ki, Cümhuriyyətin yaradılmasının 100 illik yubileyinə həsr olunan elmi-tədqiqat əsərinin təqdimatında çıxış edən bu ali təhsil ocağının rektoru Fuad Hacıyev Azərbaycan Xalq Cümhuriyyətinin xalqımızın tarixində parlaq səhifələrdən olduğunu qeyd edib. Rektor ümummilli lider Heydər Əliyevin üç rəngli bayrağımızı yenidən dalğalandıraraq, Xalq Cümhuriyyətinin ənənələrinin yenidən dirçəldilməsi istiqamətində həyata keçirdiyi misilsiz addımlardan danışıb.

Gənclər və idman nazirinin müavini İsmayıl İsmayılov, “Gömrükçü” İdman Sağlamlıq Mərkəzinin baş direktoru, Azərbaycan Milli Olimpiya Komitəsinin Ədalətli oyunlar komissiyasının sədri Xəzər İsayev xalqımızın ümummilli lider Heydər Əliyevin və onun layiqli davamçısı dövlətimizin başçısı, Milli Olimpiya Komitəsinin prezidenti İlham Əliyevin respublikamızda bədən tərbiyəsinin və idmanın inkişafına göstərdikləri diqqət və qayğıdan söz açıblar. Çıxışlarda ölkəmizdə idmanın və bədən tərbiyəsinin inkişafı istiqamətində görülən işlərdən, görkəmli idmançılarımız, kütləvi bədən tərbiyəsi və idmanın inkişafı, Olimpiya İdman komplekslərinin inşasının geniş vüsət almasından bəhs edilib.

Çıxışlardan sonra Azərbaycan Jurnalistlər Birliyinin üzvü, “İdmançı” qəzetinin baş redaktoru, pedaqogika üzrə fəlsəfə doktoru, Əməkdar Məşqçi, Əməkdar Bədən Tərbiyəsi və İdman Xadimi, professor Dilqəm Quliyevin tərtib etdiyi “Azərbaycan Xalq Cümhuriyyətinin 100 illiyində bədən tərbiyəsi və idmanın inkişafı (1918-2018)” elmi-tədqiqat əsəri təqdim olunub.

Məlumat verilib ki, kitab Azərbaycan Xalq Cümhuriyyətinin yaradılmasından ötən 100 illik dövrü əhatə edir. Nəşrdə bir əsr ərzində Olimpiya Oyunlarının, dünya və Avropa çempionatları, eləcə də idmançılarımızın bu mühüm yarışlarda qazandığı uğurlar, tanınmış atletlərimizin çıxışları, yüksək nailiyyətləri geniş təhlil edilib. Kitabda müxtəlif dövrlərdə ölkəmizdə bədən tərbiyəsinin və idmanın inkişafı istiqamətində həyata keçirilən tədbirlər və görülən işlərə dair fotomateriallar böyük maraq doğurur.

Elmi-tədqiqat əsəri Gənclər və İdman Nazirliyinin əməkdaşları, Azərbaycan Dövlət Bədən Tərbiyəsi və İdman Akademiyasının professor-müəllim heyəti, tələbələri və geniş oxucu kütləsi üçün nəzərdə tutulub.