SİYASƏT
Azərbaycan xalqının ümummilli lideri Heydər Əliyevin anadan olmasının 91-ci ildönümü münasibəti ilə Astanada elmi-praktik konfrans keçirilmişdir VİDEO
Astana, 7 may (AZƏRTAC). Qazaxıstanın Astana şəhərində Azərbaycan xalqının Ümummilli Liderinin xatirəsinə həsr olunmuş “Heydər Əliyev. Şəxsiyyət və zaman” mövzusunda elmi-praktik konfrans keçirilmişdir.
Azərbaycanın Qazaxıstandakı səfirliyi, “Qazaxıstan-Azərbaycan” dostluq və mədəniyyət Assosasiyası və Qazaxıstanın Birinci Prezidenti Muzeyinin birgə təşkil etdiyi konfransda hökumət nümayəndələri, deputatlar, elm və mədəniyyət xadimləri, diasporumuzun üzvləri iştirak etmişlər.
Ümummilli lider Heydər Əliyevin xatirəsi bir dəqiqəlik sükutla yad edilmişdir.
Qazaxıstanın Birinci Prezidentinin Muzeyinin direktoru Alma Sığınğali konfransda çıxış edərək bildirmişdir ki, ümummilli lider Heydər Əliyev Azərbaycanı mürəkkəb geosiyasi vəziyyətdən, sosial-siyasi böhrandan çıxara bilmiş və ölkənin sabitliyini təmin etmişdir. Təsadüfi deyil ki, Qazaxıstan Prezidenti Nursultan Nazarbayev öz həmkarı barədə demişdir: “Heydər Əliyev Azərbaycan və qazax xalqları arasında mövcud olan dostluq münasibətlərinin möhkəmləndirilməsində, Azərbaycan Respublikasının, həmçinin MDB-nin inkişafında çox böyük işlər görüb”.
Alma Sığınğali demişdir ki, Heydər Əliyev yüksək intellekti, fenomenal yaddaşı, natiqlik istedadı, mənəvi zənginliyi və praqmatizmi ilə müasirlərindən fərqlənirdi.
Təsadüfi deyil ki, onun haqqında “Müasir, müstəqil Azərbaycanın memarı və qurucusu”, “saf ürəkli insan”, “hər bir millətin şərəfi ola biləcək insan”, “tarixi yaradan adam” ifadələri işlədilir. Azərbaycan xalqı öz böyük oğlunun xatirəsi ilə fəxr edə bilər. Azərbaycan xalqının müdrikliyi və uzaqgörənliyi 2013-ci ilin oktyabrında da düzgün seçim etməyə imkan vermişdir Heydər Əlirza oğlunun siyasi varisi İlham Heydər oğlu on ildən artıqdır ki, ölkəsinə ləyaqətlə rəhbərlik edir. Bu illər ərzində Azərbaycan beynəlxalq aləmdə öz mövqeyini möhkəmləndirmiş, terrorizmlə mübarizənin gücləndirilməsi və ikili standartlar siyasətinə qarşı açıq çıxış edərək dünyada təhlükəsizliyin təmin olunması proseslərində mühüm rol oynayır. Bizə Azərbaycanın Ümummilli Liderinin 90 illik yubileyində Bakıda olmaq, bu qədim paytaxt şəhərinin gözəlliyini seyr etmək xüsusilə əhəmiyyətli idi. Ulu Öndərin dünyaya gəldiyi Naxçıvan şəhəri ilə tanışlıq bizdə xoş təəssürat yaradır. Buna görə Azərbaycanın Qazaxıstandakı səfirinə minnətdarlığımızı bildirirəm.
Konfransda Azərbaycanın Qazaxıstandakı səfiri Zakir Həşimov ümummilli lider Heydər Əliyevin həyat və fəaliyyəti haqqında geniş məruzə etmişdir. Məruzədə Azərbaycanın sürətli inkişafında Heydər Əliyevin əvəzsiz xidmətlərindən danışılmışdır. Bildirilmişdir ki, 1969-cu ildə görkəmli dövlət xadimi Heydər Əliyev tərəfindən müəyyən edilən inkişaf strategiyasının uğurlu nəticəsi bu gün özünü göstərir. Ümummilli lider Heydər Əliyevin qurduğu dövlət Azərbaycan xalqının müstəqil yaşamasının qarantı olmuşdur.
Diplomat bildirmişdir ki, ulu öndər Heydər Əliyev həm keçmiş SSRİ rəhbərliyində yüksək vəzifə tutarkən, həm də xalqımızın təkidli tələbi ilə müstəqil Azərbaycanın rəhbərliyinə qayıdandan sonra milli mənəvi dəyərlərimizin bərpası və qorunub saxlanılması istiqamətində əvəzolunmaz xidmətlər göstərmişdir.
Səfir demişdir: Bu gün dünya ictimaiyyəti Azərbaycanı və onun Ümummilli Liderini tanıyır, onu minnətdarlıqla xatırlayırsa, ünvanına ən xoş sözlər deyilirsə, bu özü xalqımız üçün böyük şərəfdir. Biz qürur duyuruq ki, xalqımızın bu səviyyədə sevilən, hörmət bəslənilən Ümummilli Lideri vardır.
Daha sonra tədbirdə çıxış edən “Nur-Otan” Partiyasının üzvü akademik Kazbek Kazkenov Heydər Əliyevin müdrik və güclü şəxsiyyət olduğunu vurğulamışdır. Akademik bildirmişdir ki, məhz Ulu Öndərin sayəsində ölkənin iqtisadiyyatı inkişaf yoluna qədəm qoydu, xalqın rifah halı yaxşılaşdı. Qazaxıstan ilə Azərbaycan arasında əlaqələrin genişləndirilməsində ümummilli lider Heydər Əliyevin və Qazaxıstan Prezidenti Nursultan Nazarbayevin əvəzsiz xidmətləri olmuşdur. Akademik ulu öndər Heydər Əliyevin Prezident Nursultan Nazarbayev ilə dostluğundan da danışmışdır.
Qazaxıstan Azərbaycanlıları Mədəniyyət Mərkəzinin prezidenti Vidadi Salahov çıxış edərək Heydər Əliyevin vətəndaş cəmiyyəti quruculuğu istiqamətində həyata keçirdiyi siyasətdən danışmışdır.
Konfransda ulu öndər Heydər Əliyevin həyat və fəaliyyətindən bəhs edilən “Əsl məhəbbət haqqında” film nümayiş etdirilmişdir.
İlahə Əhmədova
AZƏRTAC-ın xüsusi müxbiri
Astana