AZƏRBAYCANDA İTAR-TASS GÜNLƏRİ UĞURLA KEÇDİ
AZƏRTAC-ın Moskva müxbiri xəbər verir ki, yanvarın 22-23-də Azərbaycanda keçirilmiş İTAR-TASS günlərində iştirak edən Rusiya nümayəndə heyəti Bakıdan dərin və parlaq təəssüratla qayıtmışdır.
İTAR-TASS-ın baş direktorunun birinci müavini Mixail Qusman AZƏRTAC-ın müxbiri ilə söhbətində səfər barədə xoş təəssüratını bölüşərək demişdir:
- İndi, Azərbaycanda İTAR-TASS günləri başa çatdıqdan sonra, o barədə düşünərkən anlayırsan ki, bu, həyatımızın iki günü, tarixin iki günü olsa da, o qədər zəngin, təəssüratlarla dolu keçmişdir, o qədər səmimiyyət, mehribanlıq və qonaqpərvərlik olmuşdur ki, adama elə gəlir Bakıda iki gün deyil, çox böyük müddət olmusan.
Agentliyimizin bütövlükdə Azərbaycanla, AZƏRTAC ilə çox sıx əlaqələri və əməkdaşlıq münasibətləri vardır. Zənnimcə, hamı xatırlayır ki, Azərbaycan Prezidenti İlham Əliyevin Rusiya Federasiyasına ilk dövlət səfəri zamanı iki Prezidentin - Prezident Əliyevin və Prezident Putinin iştirakı ilə İTAR-TASS və AZƏRTAC arasında əməkdaşlıq haqqında saziş imzalanmışdır. Azərbaycanda İTAR-TASS günlərinin keçirilməsi bir növ əlaqələrimizin məntiqi inkişafı, həmkarlarımızla əldə etdiyimiz razılaşmaların məntiqi surətdə həyata keçirilməsidir. Lakin biz bilərəkdən elə etdik ki, günlər təkcə texniki danışıqlar xarakteri daşımasın, insanlarla görüşlərlə, ünsiyyətlə zəngin olsun, nümayəndə heyətimizin tərkibində təkcə jurnalistlər deyil, Rusiyanın aparıcı alimləri, artistləri, idman nümayəndələri də olsunlar və bu, Rusiyanın, Bakının tanınmış və hörmətli adamlarının öz həmkarları, dostları ilə səmimi söhbətinə çevrilsin. Şübhəsiz, azərbaycanlı həmkarlarımız hər şeyi yüksək səviyyədə təşkil etmişdilər və buna görə də bütün iştirakçılar, - onlar isə təxminən 150 nəfər idi, - adından, ilk növbədə, Azərbaycanda İTAR-TASS günlərinin keçirilməsini öz himayəsi altına götürmüş Azərbaycan Prezidenti İlham Heydər oğlu Əliyevə minnətdarlığımı bildirmək istəyirəm. Biz bilirik ki, o, günlərin təşkilinə dair müvafiq tapşırıqlar vermişdir, ən əsası isə, özü iştirakçılara çox böyük diqqət yetirmişdir. Mən mübaliğəsiz deyə bilərəm ki, dövlət başçısı ilə Prezident sarayında keçirilmiş görüş, Azərbaycanda İTAR-TASS günlərinin iştirakçıları ilə Prezidentin söhbət etdiyi o iki saat müstəsna dərəcədə maraqlı idi. Bu, çox səmimi, çox vacib söhbət idi. Düşünürəm ki, sizinlə indiki söhbətimiz AZƏRTAC xətti ilə yayılanadək, yəqin ki, Bakıda həmin görüşü televiziya ilə göstərəcəklər və hamı özü şahid olacaqdır. Lakin televiziya tamaşaçıları görüş iştirakçılarının hansı təəssüratlarla oradan çıxdığını görməyəcəklər. Təbii, həmkarlarım bilirlər ki, mən Azərbaycan Prezidentini çox yaxşı tanıyıram və ona çox böyük hörmət bəsləyirəm. Buna görə də onlar mənə yaxınlaşmağı və Prezident İlham Əliyevlə ünsiyyətdən aldıqları çox güclü impuls, çox güclü təəssürat barədə fikirlərini bölüşməyi özlərinə borc bilirdilər. Zənnimcə, İlham Heydər oğluna xoş olacaq ki, görüş iştirakçılarının bir çoxu müxtəlif vaxtlarda Heydər Əlirza oğlu Əliyevlə görüşmək, söhbət etmək şərəfinə nail olmuşdur. Bu görüşlər həm bizdə, İTAR-TASS-da, həm də Bakıda olmuşdur... Hamı İlham Heydər oğlunun Heydər Əlirza oğlunun necə gözəl, yüksək dərəcədə layiqli oğlu və onun işinin davamçısı olduğundan, Heydər Əlirza oğlu dühasının, onun məqsədinin, xeyir-duasının İlham Heydər oğlunda necə tam əksini tapdığından danışır. Bu, Prezidentlə görüş zamanı, onun bir sualı belə cavabsız qoymamasında və çox dərin, ən mühüm məsələlərə dair yüksək dərəcədə dəqiq cavab verməsində özünü xüsusilə büruzə verdi. Bu, həqiqətən, çox vacib idi.
Axşam isə o bizimlə qəbulda görüşdü. Burada da öz demokratikliyi, səmimiliyi ilə tədbir iştirakçılarında çox güclü təəssürat oyatdı.
Azərbaycanda İTAR-TASS günləri çox gərgin cədvəl üzrə keçirdi. Çünki tədbirlər çox idi. “Azərbaycan: 100 il TASS obyektivində” fotosərgisi açıldı. TASS fotoqrafları, - bizim agentliyin isə artıq 100 yaşı var, - bütün bu illər ərzində Azərbaycanın salnaməsini aparmışlar və zənnimizcə bu, çox maraqlı fotosərgi idi. O, Bakıdan sonra Rusiyanın müxtəlif şəhərlərində də nümayiş etdiriləcəkdir. Bu, Rusiyada Azərbaycan ili və Azərbaycanda Rusiya ili çərçivəsində olacaqdır. Bir sözlə, sərgi Rusiyanı gəzəcək və onun bir çox şəhərlərində Azərbaycan haqqında söhbət açacaqdır.
Biz Azərbaycan KİV-ləri nümayəndələrinin, iki ölkə politoloqlarının və ictimai xadimlərinin iştirakı ilə birgə informasiya məkanının problemləri və perspektivlərinə həsr olunmuş “dəyirmi masa” keçirdik.
Bütün bunlar onu göstərir ki, bu günlər çox vacib idi və iştirakçıların hamısının xatirində uzun illər qalacaqdır. Sizə bunu səmimi deyirəm, çünki biz təyyarədə uçarkən salon dolu idi və Bakıda keçirilmiş günlərlə bağlı heyrətini ifadə etməyən adam yox idi.
Mən bir daha təkrar etmək istəyirəm ki, biz hamımız Azərbaycan Prezidentinə, onun Aparatına, Aparatın şöbə rəhbərlərinə, respublikanın nazirlərinə çox minnətdarıq. Mənim üçün kimi isə ayırmaq çətindir, çünki onlar hamısı əl-ələ verib bizim üçün çox şey etmişdir.
Fürsətdən istifadə edərək, Azərbaycan Prezidenti İlham Əliyevə şəxsən təltif olunduğum yüksək mükafata görə bir daha səmimi minnətdarlığımı bildirmək istəyirəm. Bu, həqiqətən, mənə verilən çox yüksək qiymətdir. Yəqin ki, mən təltif olunanların çoxunun dediklərini təkrar edəcəyəm, lakin bu, həqiqətən, gələcəyə avansdır. Mən bu mükafata layiq olmaq üçün əlimdən gələni edəcəyəm.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
