Azərbaycanda ov mövsümü başlamışdır
Bakı, 5 iyun (AZƏRTAC). Azərbaycan Respublikası ərazisində 2014-2015-ci illər üçün ov mövsümü açıq elan edilmişdir.
Ekologiya və Təbii Sərvətlər Nazirliyinin mətbuat xidmətindən AZƏRTAC-a bildirmişlər ki, respublika ərazisində təkənin (Zaqatala, Şəki, Qax, Quba, İsmayıllı, Oğuz ərazilərində), qabanın (Lənkəran, Astara, Lerik, Qax, Cəlilabad, Zaqatala, İmişli, Quba, Xaçmaz, Neftçala, Yardımlı, Şəki, İsmayıllı ərazilərində), dovşanın (Dəvəçi, Kürdəmir, Salyan, Neftçala, Cəlilabad, Biləsuvar, Yevlax, Lənkəran, Zaqatala, Ağstafa, Qazax, Zərdab, Masallı, Quba, Xaçmaz, İmişli, Sabirabad, Saatlı ərazilərində), bataqlıq qunduzunun, çaqqal və yenotun ovlanmasına icazə verilir.
Birdəfəlik ov icazəsinin qiyməti isə dovşan üçün 2 manat 20 qəpik, çaqqal üçün 3 manat 96 qəpik, yenot və qunduz üçün 1 manat 65 qəpikdir. Ovçular təkə ovlamaq üçün 24 manat 75 qəpik, qaban (çöl donuzu) üçün 16 manat 50 qəpik ödəməlidirlər.
Ov icazəsi Bakı Şəhər Ekologiya və Təbii Sərvətlər Departamentindən, ərazi ekologiya və təbii sərvətlər şöbələrindən alınmalıdır.
Ağdam, Göygöl, Goranboy, Daşkəsən, Gədəbəy və Tərtər rayonlarında, Xəzər dənizinin adalarında, yaşıl zonalarda, xüsusi mühafizə olunan ərazilərdə, şəhərlərin və kurortların ətrafındakı 1 kilometrə qədər sahələrdə ov qadağan edilmişdir.
Bölmənin digər xəbərləri
