Azərbaycanın “Agro AI” startapı “Microsoft for Startups” proqramına qəbul edilib
Bakı, 4 sentyabr, AZƏRTAC
“Azərkosmos”un həyata keçirdiyi “National Space Incubation” layihəsinin ilk iştirakçısı olan Azərbaycanın “Agro AI” startapı beynəlxalq “Microsoft for Startups” proqramına qəbul edilib.
“Azərkosmos”dan AZƏRTAC-a bildirilib ki, startapın proqramda iştirakı “National Space Incubation” layihəsi çərçivəsində kosmik sektorda innovativ ideyaların və startapların dəstəklənməsinin nəticələrindən biri olub.
“Agro AI” radiolokasiya peyklərindən əldə olunan məlumatlar vasitəsilə torpağın rütubətini təhlil edən və fermerlərə suvarma üçün optimal qərarları müəyyənləşdirməyə kömək edən platformadır.
“Microsoft for Startups” proqramı çərçivəsində startap server və hostinq resurslarına, GPU-nun hesablama imkanlarına (çiplərin məlumatları paralel emal etməklə çoxsaylı riyazi əməliyyatları eyni vaxtda yerinə yetirmək qabiliyyəti – red.), həmçinin “Microsoft Copilot” süni intellekt modelinin imkanlarına çıxış əldə edəcək.
Təqdim olunan resurslar startapa platformanın texnoloji imkanlarını genişləndirməyə, məhsulun hazırlanmasını və bazara çıxarılmasını sürətləndirməyə imkan verəcək.
Bölmənin digər xəbərləri
