SİYASƏT
AZƏRBAYCANIN DİNAMİK İNKİŞAFI, REGİONAL LAYİHƏLƏRDƏ FƏAL İŞTİRAKI DİQQƏT MƏRKƏZİNDƏDİR
AZƏRTAC xəbər verir ki, sentyabrın 20-də ölkəmizdə səfərdə olan İtaliya Respublikası Parlamentinin Deputatlar Palatasının xarici işlər daimi komissiyasının sədri Umberto Ranierinin başçılıq etdiyi nümayəndə heyəti Milli Məclisə gəlmişdir. Əvvəlcə qonaqlar Milli Məclisin iclas zalı ilə tanış olmuş, parlament binasındakı Heydər Əliyev muzeyinə baxmışlar.
Sonra İtaliya parlamentinin nümayəndələri Milli Məclisin sədri Oqtay Əsədovla görüşmüşlər.
Oqtay Əsədov demişdir ki, müstəqilliyini yenidən bərpa etdikdən sonra Azərbaycanın İtaliya ilə əlaqələri daha da genişlənmiş, bütün sahələri əhatə etmişdir. İtaliya həm də bizim ən yaxın ticarət tərəfdaşımızdır. Cari ilin 6 ayında ticarət dövriyyəmiz 430 milyon ABŞ dolları təşkil etmişdir. Bu rəqəmin daha da artırılması üçün geniş imkanlar vardır.
Parlamentin sədri onu da bildirmişdir ki, bu gün Azərbaycan iqtisadi inkişafına görə lider dövlətdir və ölkəmiz regionda həyata keçirilən bütün layihələrin iştirakçısıdır. BTC və BTƏ neft və qaz kəmərlərinin istismara verilməsi, Bakı-Tbilisi-Qars dəmir yolunun tikintisi ilə bağlı görülən işlər Azərbaycanın nüfuzunu daha da artırır.
Parlamentlərarası əlaqələrin inkişafına toxunan O.Əsədov demişdir ki, deputatlarımızın beynəlxalq tədbirlərdən bir sıra qlobal məsələlərdə eyni mövqedən çıxış etmələri bizi daha da yaxınlaşdırır və ümid edirik ki, sizin bu səfərinizdən sonra əlaqələrimiz daha da genişlənəcəkdir.
Ermənistan-Azərbaycan, Dağlıq Qarabağ probleminə toxunan O.Əsədov qeyd etmişdir ki, münaqişə təkcə Azərbaycan üçün deyil, eləcə də Avropa üçün ciddi təhlükə mənbəyidir. BMT Təhlükəsizlik Şurası problemlə əlaqədar 4 qətnamə və Avropa Şurası iki qərar qəbul etmişdir. Amma təcavüzkar Ermənistan nə bu sənədlərə, nə də beynəlxalq hüquq normalarına məhəl qoymur. Avropa İttifaqı isə balanslaşdırılmış siyasət yürüdür. Əslində isə təcavüzkara təzyiq göstərilməli, münaqişənin dinc yolla, beynəlxalq hüquq prinsipləri əsasında həllinə nail olunmalıdır.
Umberto Ranieri demişdir ki, səfərdən məqsəd ölkələrimiz arasında bütün sahələr üzrə əlaqələrin genişləndirilməsinə dair fikir mübadiləsi aparmaqdır.
Qonaq bildirmişdir ki, İtaliya Azərbaycana böyük maraq göstərir. Azərbaycanın dinamik inkişafı, regionda həyata keçirilən irimiqyaslı layihələrdə iştirakı diqqət mərkəzindədir. Bu gün doğrudan da ticarət dövriyyəsinin həcmini artırmaq üçün geniş imkanlar vardır.
Sonra görüşdə enerji təhlükəsizliyi, Dağlıq Qarabağ münaqişəsi, parlamentlərarası əlaqələrin inkişaf perspektivləri və digər məsələlər ətrafında geniş fikir mübadiləsi aparılmışdır.