İDMAN
Azərbaycanın gənclər və idman naziri birinci Avropa Oyunlarına hazırlıq məsələləri ilə bağlı Qətərin “Aljazeera” telekanalına müsahibə vermişdir
Bakı, 6 mart (AZƏRTAC). Martın 6-da Azərbaycanın gənclər və idman naziri Azad Rəhimov Qətərin “Aljazeera” telekanalına müsahibə vermişdir.
Nazirliyin mətbuat xidmətindən AZƏRTAC-a bildirmişlər ki, müsahibə əsasən, 2015-ci ildə Bakıda keçiriləcək birinci Avropa Oyunlarına hazırlıq məsələləri ilə bağlı olmuşdur.
Telekanalın əməkdaşı Riçard Parın suallarını cavablandıran nazir bildirmişdir ki, Bakının mövcud idman infrastrukturu ilə yanaşı, hazırda inşası davam edən nəhəng idman mərkəzləri bu oyunları yüksək səviyyədə keçirməyə imkan verəcəkdir.
Olimpiya kəndinin də vaxtında hazır olacağını və hər bir şəraitlə təmin ediləcəyini vurğulayan A.Rəhimov yarışların təşkil ediləcəyi idman növlərinin bəzilərinin artıq dəqiqləşdiyini, tam siyahının isə martın ortalarında müəyyən ediləcəyini diqqətə çatdırmışdır. Nazir qeyd etmişdir ki, sovetlər ittifaqı dağılanda, Azərbaycanın müstəqilliyinin ilk illərində Bakıda cəmi bir stadion və 2 idman mərkəzi vardı. Lakin onların da yenidənqurmaya ciddi ehtiyacı var idi. Hazırda isə ölkəmizdə yeni olimpiya kompleksləri və stadionlarla yanaşı, müxtəlif idman növləri üçün mərkəzlər də inşa edilməkdədir.
Müxbir güləşin 2020-ci il olimpiadasının proqramından çıxarılması məsələsinə nazirin münasibətini də öyrənmişdir. A.Rəhimov bildirmişdir ki, Beynəlxalq Olimpiya Komitəsinin bu tövsiyəsi hər kəs üçün gözlənilməz olmuşdur. Güləş bütün dünyada sevilən idman növüdür. Elə ötən il London Olimpiadasında da bunun şahidi olduq. Bu idman növünün güclü inkişaf etdiyi ölkələrin sayı dünyada çoxluq təşkil edir. Ona görə də, güləşin olimpiya proqramında qalacağına inanıram.
Nazir A.Rəhimov telekanal əməkdaşının Azərbaycan idmanı ilə bağlı müxtəlif suallarını da cavablandırmışdır.