İDMAN
Azərbaycanın həvəskar idmançılardan ibarət yığması Hannoverdə beynəlxalq futbol turnirində uğurla təmsil olunmuşdur
Hannover, 16 iyun (AZƏRTAC). Almaniyanın Aşağı Saksoniya federal əyalətinin paytaxtı Hannover şəhərində həvəskar idmançılar arasında beynəlxalq futbol turniri keçirilmişdir. Dünya çempionatına bənzər mini futbol yarışında 20 ölkəni təmsil edən komandalar, o cümlədən Azərbaycan yığması mübarizə aparmışdır. Azərbaycanın dövlət müstəqilliyinin qorunması, ölkəmizin inkişafı üçün əvəzolunmaz xidmətlər göstərmiş ulu öndər Heydər Əliyevin siyasi hakimiyyətə qayıdışı günündə - iyunun 15-də Almaniyanın mərkəzi şəhərlərinin birində belə bir futbol çempionatının keçirilməsi heç də təsadüfi deyildir. Milli Qurtuluş Günü Hannoverdə, eləcə də Aşağı Saksoniya federal əyalətində məskunlaşmış azərbaycanlıların yaddaşına tarixi gün kimi həkk olunmuşdur.
Yarışdan əvvəl Hannover şəhərində fəaliyyət göstərən “Xəzər” Alman-Azərbaycan Dostluq Cəmiyyəti “Erika-Fisch” stadionunun konfrans zalında növbədənkənar yığıncağını keçirmişdir. Yığıncağı açan cəmiyyətin sədri Etibar Qəniyev Milli Qurtuluş Gününün tarixi haqqında danışmışdır. E.Qəniyev Azərbaycanın ən çətin vaxtlarında xalqımızın təkidli tələbi ilə hakimiyyətə qayıdan Ulu Öndərin ölkəmizi üzləşdiyi xaos, anarxiya kimi bir çox bəlalardan xilas etdiyini söyləmişdir. Azərbaycanın son illərdə idmanın inkişafı istiqamətində böyük nailiyyətlər qazandığını deyən cəmiyyətin sədri Hannover şəhərində Heydər Əliyev adına idman klubunun yaradılması təklifi ilə çıxış etmişdir. Təklif məmnunluqla qarşılanmışdır. Digər çıxış edənlər Azərbaycan idmanının böyük uğurlarının xarici ölkələrdə yüksək səviyyədə təbliğ edilməsinin zəruriliyini vurğulamışlar.
Daha sonra yarış başlamışdır. “Erika-Fisch” stadionunda keçirilən mübarizə Hannover şəhərinin bələdiyyə rəisi Bernd Strauç tərəfindən açıq elan edilmişdir.
Qrup oyunlarında Azərbaycan yığma komandası İtaliya, Portuqaliya, Fil Dişi Sahili və Latın Amerikasının komandaları ilə üzləşmişdir. İlk dəfə olaraq belə bir turnirə qatılan Azərbaycan komandasının gözəl oyunu azarkeşlərə xoş təsir bağışlamışdır.
Turnirdə Azərbaycan bayrağının dalğalanması və himnimizin səsləndirilməsi həmvətənlərimizdə xoş təəssüratlar yaratmışdır. Belə bir beynəlxalq futbol turnirində ilk dəfə olaraq çıxış edən Azərbaycan yığma komandası bir çox güclü rəqibləri arxada qoyaraq layiqli yer tuta bilmişdir.
Futbol çempionatı bir çox beynəlxalq kütləvi informasiya vasitələri tərəfindən işıqlandırılmışdır. Almaniyanın nüfuzlu “Neue Presse” qəzetinə verdiyi müsahibədə “Xəzər” cəmiyyətinin sədri Etibar Qəniyev Milli Qurtuluş Günü, ulu öndər Heydər Əliyevin Azərbaycan xalqı qarşısındakı misilsiz xidmətlərindən bəhs etmişdir.
Etibar Qəniyev “Hannover Cup 2013” beynəlxalq turnirinin təşkilatçısı Həsən Yılmaz ilə görüşündə Azərbaycan yığma komandasının 2014-cü ildə keçiriləcək futbol çempionatına da qatılmaq arzusunda olduğunu diqqətə çatdırmışdır.
Hannoverdə üçüncü dəfədir keçirilən bu beynəlxalq turnirdə Yunanıstan komandası birinci, Türkiyə yığması isə ikinci yeri tutmuşdur.
Vüqar Seyidov
AZƏRTAC-ın xüsusi müxbiri
Hannover