AZƏRBAYCANIN İSTEDADLARI
Yeva Kovalenko
Bakı, 9 avqust, Anara Axundova, AZƏRTAC
AZƏRTAC Azərbaycanın istedadları haqqında məqalələr silsiləsini davam etdirir. Növbəti həmsöhbətimiz gimnast, bir sıra respublika və beynəlxalq yarışların iştirakçısı və qalibi Yeva Kovalenkodur.
Yevanın 7 yaşı var. İdmanla cəmi bir ilyarım məşğul olmasına baxmayaraq, bu müddət ərzində əla nəticələr əldə edə bilib. Yeva Dubayda bədii gimnastika üzrə “Dynasty Cup” beynəlxalq yarışının çempionu, Pekində beynəlxalq “Global Asia” müsabiqə-festivalının qalibi, bədii gimnastika üzrə milli yarışların çempionudur. O, bu yaxınlarda Olimpiya Oyunlarının gümüş mükafatçısı, 13 dəfə dünya çempionu və beşqat Avropa çempionu rusiyalı gimnast Yana Kudryavtsevanın ustad dərsində iştirak edib.
Yeva birinci yeri tutduğu beynəlxalq “Princess Cup” yarışlarında gürzlərlə ilk çıxışını xüsusilə xatırlayır. Qeyd etmək lazımdır ki, balaca gimnast əvvəllər alətlərlə çıxış etməyib. Lent və ya topdan fərqli olaraq, gürzlər olduqca mürəkkəb alətdir. Ancaq Yeva çətin tapşırığın öhdəsindən gəlib və qısa müddət ərzində yeni nömrəni öyrənib.
Yarışlardakı ab-havadan danışan qızcığaz deyir ki, uşaqlar bir-birini dəstəkləyir və çox vaxt aralarında dostluq münasibətləri qururlar. Həyəcana gəlincə, həmsöhbətimiz çıxışlardan əvvəl o qədər də həyəcan keçirmir: “Əvvəllər daha çox həyəcan keçirirdim. Birinci yeri tutacağıma inanırdım və bu, mənə kömək edirdi”.
Yeva gələcəkdə peşəkar gimnast olmaq istəyir və Avropada yarışlarda çıxış etmək xəyalı ilə yaşayır. O, tərəddüd etmədən, nümunə götürdüyü məşqçisi Fərid Kazakov kimi olmaq istədiyini deyir: “Məşqçim bir ulduzdur! O, səmimi, mehriban, şən insandır və həmişə zarafat edir. Belə bir məşqçi ilə işləmək çox gözəldir”.
Fərid Kazakov azərbaycanlı və rusiyalı quruluşçu xoreoqraf, rəqqas, balet artisti, Bakı Xoreoqrafiya Akademiyasının və Moskva Dövlət Mədəniyyət İnstitutunun məzunudur. “World Dance Olympiad”ın (Ümumdünya Rəqs Olimpiadasının) mütləq çempionu, Azərbaycan milli mükafatının üçqat laureatı, “Solo Star Russia” titulunun ikiqat sahibi, Türkiyənin “Türkiye Zirve Ödülleri” milli mükafatı laureatı, “Türkiyənin ən istedadlı rəqqası” adının sahibi, beynəlxalq, Ümumrusiya və respublika Qran-Pri müsabiqələrinin qalibidir.
Fərid xatırlayır: “Yanıma gəldiyində, Yeva ətrafa təəccüblə baxan bir uşaq idi. O vaxt onun zülfü var idi. Amma gimnastikada zülf qadağandır... Qeyd etmək istərdim ki, o, heç bir ilkin hazırlıq olmadan, yaşına görə böyük uğurlar qazanıb. Yevanın elastik kürəyi yox idi... Demək olar ki, mənim prototipimdi. (Gülür.) Amma dərhal diqqətimi çəkən o oldu ki, bu qız deyilənlərə diqqətlə qulaq asır. Mənim üçün isə ən önəmlisi uşağın diqqəti və zəhmətsevərliyidir. Biz məşqlərə böyük çətinliklə başladıq və uğur qazandıq”.
Fərid Kazakovun fikrincə, yarışlar gənc idmançılar üçün çox vacibdir.
“Uşaq məhz rəqabət prosesində böyüyür və daha həvəsli olur. Amma bu, həm uşaq, həm məşqçi, həm də valideynlər üçün böyük stresdir”, - deyə həmsöhbətimiz bildirir. - Mən uşaqların ustad dərslərində iştirakını və mümkün qədər tez-tez səfər etməsini dəstəkləyirəm. Çünki xaricdə olanda başqa ölkələrdə kimin hansı səviyyədə olduğunu görürlər və bu, onlar üçün çox faydalıdır”.
Şagirdlərinin qələbə qazanmasının nə qədər mühüm olması barədə fikir söyləyən Fərid Kazakov vurğulayır ki, gənc idmançıların özlərinə qalib gəlməsi, daha yaxşı çıxış etməsi vacibdir.
Məşqçi əlavə edir: “Hətta yüksək nəticələr əldə edə bilmirsənsə, daha da çox işləməli və inkişaf etməlisən. Mən bundan uşağı motivasiya etmək üçün də istifadə edirəm. Amma uşaqlara təzyiq etməyin əleyhinəyəm. Çıxışdan əvvəl uşağı hazırlaşdırmaq və onu sakitləşdirmək vacibdir. Mənim şagird olduğum illərdə şərtlər çox sərt idi. Sevgi, səmimilik, dəstək yox idi... Amma buna çox ehtiyacım var idi. İndi mən bunu uşaqlara tam şəkildə vermək və onları daha da həvəsləndirmək istəyirəm. Çünki bu yolla uşaq özünü təhlükəsiz hiss edir, kiməsə arxalanır”.
Söhbətdə Yevanın anası Tamara Kazakova da iştirak edir. Tamara xanımın sözlərinə görə, onlar belə nəticə gözləməyiblər və gimnastika ilə sırf özləri üçün məşğul olmağa başlayıblar.
“Yeva hələ məktəbə getməmişdi və onun üçün hansısa məşğuliyyət axtarırdım. O, həmişə çox aktiv idi, insanlar arasında olmağı, şeir oxumağı, diqqət mərkəzində olmağı sevirdi. Qızımın belə yüksək enerjini düzgün istiqamətə yönəltmək lazım idi. Düşünürdüm ki, gimnastika onun üçün əla bazadır: bu, həm sağlamlıq, həm çeviklik, həm də fiqura deməkdir. Həmin vaxt instaqramı açdım və orada Fəridin səhifəsini tapdım. Yevanın heç bir hazırlığı yox idi, bunu mənə dərhal dedilər. Lakin məşqçi onun uğur qazanacağına çox inanırdı və bu etimad öz nəticəsini verdi. Əvvəlcə o, bir saat çalışırdı, sonra 3 saat məşq etməyə başladı; bunlar artıq xoreoqrafik dərslər idi. Elə alındı ki, cəmi bir ay sonra ilk çıxışı oldu. O, sıfırdan başladı, amma bir ay sonra artıq ilk yarışmasında iştirak etdi və hətta üçüncü yeri tutdu”.
Tamara Kazakovanın sözlərinə görə, idmançının yetişməsində məşqçinin rolu böyükdür.
“Övladımızla kimin məşğul olması önəmlidir”, - deyə o bildirir. - Bir ana kimi, məşqçi ilə əlaqənin uşaq üçün nə qədər vacib olduğunu başa düşürdüm. Fəridlə ilk anlardan yaxşı əlaqə yarandı. Yeva məşqə qaçırdı, çünki orada şən mühit var, daim selfi çəkirlər. (Gülür.) Bu, onun çox xoşuna gəlir. Mənim üçün önəmli olan məşqçinin Yevaya olan inamıdır. O, qızıma məndən də çox can yandırır! Onu o qədər dəstəkləyir ki, yarışlarda çıxışlar zamanı özü də rəqs edir. Yeva daim əmindir ki, səhnədə olanda məşqçisi pərdə arxasında durur və onu dəstəkləyir. Fərid işinə can yandırır, onu sevgi və səylə yerinə yetirir. Yeva da onun sevgisini və dəstəyini hiss edir”.
Yevanın gələcəyi barədə düşünən Tamara xanım deyir ki, seçimi qız özü etməlidir.
“Hər şeyin necə olacağını gələcək göstərəcək, bu, onun həyatıdır. Biz valideynlər ona ancaq dəstək və kömək edə bilərik”, - deyə istedadlı gimnastın anası sözlərini yekunlaşdırır.
Bölmənin digər xəbərləri
