Azərbaycan Dövlət İnformasiya Agentliyi

İDMAN

Azərbaycanın milli komandası buzadırmanma üzrə Dünya Kuboku yarışlarında ölkəmizi müvəffəqiyyətlə təmsil etmişdir

28.01.2014 [22:10]
Çap et
A⁺ A^-

Bakı, 28 yanvar (AZƏRTAC). İsveçrənin Saas Fee şəhərində keçirilmiş buzadırmanma üzrə Dünya Kuboku yarışlarında Azərbaycan Hava və Ekstremal İdman Növləri Federasiyasının (FAİREX) idmançılarından təşkil olunmuş milli komanda ölkəmizi müvəffəqiyyətlə təmsil etmişdir.

FAİREX-dən AZƏRTAC-a bildirmişlər ki, kişilər və qadınlar arasında mürəkkəblik və sürət üzrə iki gün davam edən yarışlarda FAİREX-in dörd nəfərdən ibarət heyəti iştirak etmişdir.

Yarışda idmançımız Qalib Şıxrəhimov sürət üzrə təsnifat yarışlarında ilk dəfə ən yaxşı nəticələrdən birini göstərərək 10-cu yerə çıxmışdır.

Komandalar üzrə yekun nəticəyə görə Azərbaycan Rusiyadan sonra ikinci yeri tutmuşdur.