Bakı, 4 avqust, AZƏRTAC

Azərbaycanlı rejissor Cavid Əhədov 2015-ci il sentyabrın 20-dən 28-dək keçiriləcək “KROK” XXII Beynəlxalq Animasiya Filmləri Festivalına dəvət edilib. Bu gənc və istedadlı rejissorun filmləri dəfələrlə mükafatlara layiq görülüb.

Cavid Əhədov AZƏRTAC-ın müxbiri ilə söhbətində bildirib ki, o, 2009-cu ildə Tbilisidə “Tofuzzi” kinofestivalında “Mərhəmətin dadı” filmi ilə debüt edib.

Rejissor Azərbaycanı digər beynəlxalq festivallarda da təmsil edib. Son illərdə onun “Səmada şəkil” filmi “Şlingel” qısametrajlı filmlər festivalında nümayiş etdirilib. XXII Beynəlxalq “Qızıl Pəhləvan” kinoforumunda Cavid Əhədovun Mədəniyyət və Turizm Nazirliyinin sifarişi ilə “Birlik” kinostudiyasında çəkdiyi “Səmada şəkil” adlı cizgi filmi kinofestivalın müsabiqə proqramına daxil edilib. Bu animasiya filmi Xemnitsdə uşaq və gənc tamaşaçıların 18-ci beynəlxalq kinofestivalında, İranda və digər ölkələrdə nümayiş olunub. Rejissor 2013-cü ildə Ştutqartda ssenaristlərin forumunda iştirak edib.

KROK festivalına təqdim edilən 900-dək filmdən 176-sı, o cümlədən Mədəniyyət və Turizm Nazirliyinin maliyyə dəstəyi ilə “Azanfilm” studiyasında istehsal olunmuş 9 dəqiqəlik “Köhnə saat” filmi seçilib. Cavid Əhədov bu filmin həm rejissoru, həm də ssenari müəllifidir. Filmin bədii rəhbəri əməkdar incəsənət xadimi Firəngiz Qurbanovadır.

KROK 1989-cu ildən (əvvəlcə iki ildən bir, 1998-ci ildən sonra hər il olmaqla) Rusiyada və Ukraynada keçirilən beynəlxalq cizgi filmləri festivalıdır. 1991-ci ildən bu festival MDB ərazisindəki çaylarda teploxod kruizlərində keçirilir. Bu il kruiz Moskva - Dubna - Cerepovets - Qoritsı - Petrozavodsk - Mandroqi - Sankt-Peterburq marşrutu üzrə keçiriləcək.

Festivalın təsisçiləri Rusiya Federasiyasının Mədəniyyət Nazirliyi və RF Kinematoqrafçılar İttifaqı, əsas tərəfdaşı Rusiya Animasiya Kino Assosiasiyasıdır.

Festivalın açılışı sentyabrın 20-də Moskvada, bağlanışı 27-də Sankt-Peterburqda keçiriləcək.

KROK Ukrayna dilində “addım” deməkdir. Bu həm də festivalın təşkilinin rəmzidir, yəni tədbir bir məkanda deyil, hərəkətdə olan teploxodun göyərtəsində keçirilir.

“KROK” Beynəlxalq Kinofestivalı MDB-də yeganə animasiya filmləri festivalıdır ki, haqlı olaraq dünya reytinqində planetin ən yaxşı festivallarından biri kimi qəbul edilib. O, Rusiya və Ukrayna kinematoqrafiyaları yaradıcı birliklərinin özünəməxsus aksiyasıdır. KROK təkcə ən yaxşı animasiya kinosu deyil, həm də maraqlı ustad dərsləri, konsertlər “re-animasiya” axşamları və ya yuxarı göyərtədə gecə əyləncə məclisləridir. Bu, tamaşaçılarla çoxsaylı görüşlər və arası kəsilməyən ünsiyyət sevincidir.