İQTİSADİYYAT
«Azərikimya» İB İzmirdə keçirilən beynəlxalq sərgidə Azərbaycanı təmsil etmişdir
Sumqayıt, 17 may (AZƏRTAC). ARDNŞ «Azərikimya» İstehsalat Birliyinin nümayəndələri may ayının 10-dan 13-ə kimi Türkiyənin İzmir şəhərində keçirilmiş Beynəlxalq plastik məmulatlar və texnologiyalar «PLASTECH-2012» sərgisində iştirak etmişlər.
AZƏRTAC «Azərikimya» İB mətbuat xidmətinə istinadən xəbər verir ki, mayın 10-da İzmir şəhər meriyasının, Türkiyənin Sənaye Palatasının və dünyanın bir çox nüfuzlu şirkət rəhbərlərinin iştirakı ilə təntənəli açılış mərasimi keçirilmişdir.
Dörd gün fəaliyyət göstərmiş sərgidə «Azərikimya» İB də «Petkim Petrokimya Holding» şirkətlər qrupu ilə yanaşı bir pavilyonda geniş stendlə təmsil olunmuşdur.
Sərgidə Türkiyənin İstanbul, Ankara, İzmir, Kayseri, Manisa, Uşak və digər şəhərlərində fəaliyyət göstərən 150-yə yaxın şirkətin istehsal etdiyi müxtəlif məhsullar və texnologiyalar nümayiş etdirilirdi. Bununla yanaşı Azərbaycan kimyaçılarının istehsal etdikləri qiymətli kimyəvi məhsulların - yüksək təzyiqli polietilenin, mütləq izopropil spirtinin, müxtəlif qətranların və s. nümunələri sərgidə iştirak edənlərin diqqətini cəlb edirdi.
Tədbirin ilk günündə Yaponiya, Almaniya, Rusiya, Braziliya, Çin, Fransa, Cənubi Koreya, Hollandiya, İspaniya, Gürcüstan, İraq, Makedoniya və İordaniyadan gələn qonaqlarla bərabər «Azərikimya» İB-nin nümayəndələri İzmir Ölkələrarası Sərgi Mərkəzində təşkil olunmuş ekspozisiyalarla, yeni məhsul və texnologiyalarla yaxından tanış olmuşlar.
Diqqətəlayiqdir ki, sərgidə «Azərikimya» İB-yə və onun istehsal etdiyi məhsullara maraq göstərən bir çox yerli və xarici şirkətlər Azərbaycan kimyaçıları ilə işgüzar münasibətlər qurmaq, Birliyin müəssisələri ilə inteqrasiya əlaqələri yaratmaq istəklərini ifadə etmişlər. «Azərikimya»nın nümayəndə heyəti də öz növbəsində yeni, qabaqcıl texnologiyaların yaradıldığı və tətbiq edildiyi nüfuzlu firma və şirkətlərin nümayəndələri ilə görüşərək, gələcək işgüzar münasibətlərin təməlini qoymuşlar.
Kimyaçılarımızın sərgidə iştirak etməklə yanaşı «Petkim» şirkətində də olmuş, orada tətbiq olunan yeni texnologiyalar, müasir nəzarətölçü, energetika, texniki təhlükəsizlik və əməyin mühafizəsi sistemləri ilə maraqlanmış, türkiyəli həmkarları ilə müxtəlif istehsalat məsələləri ilə bağlı fikir mübadiləsi aparmışlar. Görüşdə «Petkim Petrokimya Holding» şirkətlər qrupunun rəhbəri Hayati Öztürk də iştirak etmişdir.