BAEA-NIN YENİ BAŞ DİREKTORU SEÇİLMİŞDİR
Vyana, 14 sentyabr (AZƏRTAC). Sentyabrın 14-də Beynəlxalq Atom Enerjisi Agentliyinin (BAEA) Vyanada yerləşən mənzil-qərargahında agentliyin Baş Konfrasının iclasında yeni baş direktor seçilmişdir.
İclacda 62 yaşlı yaponiyalı Yukiya Amano noyabrın sonunda vəzifəsini tərk edəcək baş direktor Məhəmməd əl-Baradeinin yerinə təsdiqlənmiş və yeni rəhbərin andiçmə mərasimi keçirilmişdir.
Yukiya Amano 2005-ci ildən Vyanada BAEA-nın mənzil- qərargahında çalışmağa başlamış və bir il qurumun Qubernatorlar Şurasına rəhbərlik etmişdir. Hüquq təhsili almış Amano 1972-ci ildən Yaponiyanın xarici işlər nazirliyində işləmişdir.
Y.Amano nüvə təhlükəsizliyi məsələləri üzrə ekspert qismində nüvə silahlarının ləğvi məqsədi ilə aparılan bir sıra beynəlxalq danışıqlarda iştirak etmiş, uzun müddət Brüssel və Vaşinqtonda diplomat kimi fəaliyyət göstərmişdir.
Y.Amano vəzifə səlahiyyətlərinin icrasına bu ilin dekabrından başlayacaqdır.
Xatırladaq ki,
12 il baş direktor vəzifəsində çalışdıqdan sonra könüllü olaraq istefaya çıxan Məhəmməd əl-Baradei 2005-ci ildə rəhbərlik etdiyi qurumla birlikdə Nobel sülh mükafatına layiq görülmüşdür.
Elgün Niftəliyev
AZƏRTAC-ın xüsusi müxbiri
Vyana
Bölmənin digər xəbərləri
