BAĞDADDA TERROR AKTLARI SƏNGİMİR
AZƏRTAC xarici saytlara istinadla xəbər verir ki, İraq paytaxtının qərbində minalanmış benzindaşıyan maşını idarə edən intiharçı terrorçu avtomobili benzindoldurma məntəqəsinə çırpmışdir: 50 nəfər ölmüş, 60 nəfər yaralanmış, 10 maşın isə yanmışdır.
Avqustun 1-də paytaxtın mərkəzində, şiə əhalinin çoxluq təşkil etdiyi məhəllədə avtomobil dayandığı yerdəcə partladılmışdır. Polisin verdiyi məlumata görə, terror aktı 17 dinc vətəndaşın həyatına son qoymuş, 32 nəfər isə yaralanmışdır.
ABŞ ordu komandanlığının məlumatına görə, Bağdadın digər bir rayonunda yolun kənarında qoyulmuş partlayıcı qurğu da işə düşmüşdür. Nəticədə ABŞ-ın üç hərbi qulluqçusu həlak olmuş və altı nəfər yaralanmışdır.
Ölkənin müdafiə və səhiyyə nazirlikləri avqustun 1-də kədərli statistikanı açıqlamışlar: təkcə iyul ayı ərzində İraqda azı 1652 dinc sakin həlak olmuşdur.
Bölmənin digər xəbərləri
