Azərbaycan Baş nazirinin müavini ABİD ŞƏRİFOV görüşü açaraq demişdir: “Bolqarıstan Prezidentini ölkəmizdə bir daha salamlayıram. Sizi Azərbaycanda görməyimizə çox şadıq və bu görüşdə iştirak etmək üçün vaxt tapdığınıza görə sağ olun. Sizə məlumat verdiyimiz kimi, dünən Azərbaycan-Bolqarıstan komissiyasının birgə iclası keçirilmişdir. Doğrusu, hələlik iqtisadi münasibətlərlə öyünməli bir şey yoxdur. Bu gün qeyd olunduğu kimi, biz gələcək haqqında düşünməliyik. Bizim böyük planlarımız var. Gələcək münasibətlərimizi inkişaf etdirmək üçün görəcəyimiz işlər barədə ümid və inamla məlumat verə bilərik. Çox hörmətli Prezidentimiz də bu barədə Sizə danışmışdır. Bunun üçün Azərbaycanda bütün imkanlar var.

Sonra görüşdə iqtisadi inkişaf naziri FƏRHAD ƏLİYEV çıxış edərək dedi:

- Bolqarıstan Respublikasının Prezidenti çox hörmətli cənab Georgi Pırvanov!

Hörmətli qonaqlar, xanımlar və cənablar!

Avropa ölkələri ilə hərtərəfli münasibətlərin inkişaf etdirilməsi Azərbaycan üçün öncül istiqamətlərdən biridir. Bu mənada, Bolqarıstanla müxtəlif sahələrdə münasibətlərin inkişafı da ölkəmiz üçün maraq doğurur.

İkitərəfli münasibətlərimiz xalqlarımızın mənafelərinə uyğun olan qarşılıqlı surətdə faydalı və bərabər hüquqlu əməkdaşlıq əsasında qurulur.

Azərbaycanda ümummilli lider Heydər Əliyevin rəhbərliyi ilə hazırlanmış sosial-iqtisadi inkişaf strategiyası həyata keçirilir. Keyfiyyətcə yeni bazar iqtisadi münasibətlərinin yaradılması, mülkiyyət hüququnun təminatı, mülkiyyətin toxunulmazlığı prinsipinə riayət olunması, azad rəqabət şəraitinin yaradılması və bununla makroiqtisadi sabitliyə, ÜDM-in artımına, inflyasiyanın idarə edilən səviyyədə saxlanmasına nail olunması aparılan iqtisadi islahatların nəticəsidir.

Bu gün burada Azərbaycanın və Bolqarıstanın işgüzar dairələrinin nümayəndələri geniş təmsil edilmişlər. Azərbaycanda biznesin inkişafı üçün şəraitin yaradılması və sərmayə mühitinin yaxşılaşdırılması sahəsində aparılan islahatlar haqqında məlumat almaq qonaqlarımız üçün də maraqlı olacaqdır.

İqtisadi islahatların indiki mərhələsində qarşımızda duran vəzifələrin həlli üçün ölkəmizdə sahibkarlığın inkişafını sürətləndirmək, bu sektorun rolunu gücləndirmək və sosial-iqtisadi problemləri həll etmək, buna kömək göstərmək və ölkənin regionlarında sahibkarlığın mövcud potensialını işə salmaq lazımdır.

Təcili həllini gözləyən problemlərin nəzərdən keçirilməsi, sahibkarlarla dövlət orqanları arasında birbaşa dialoq yaradılması, habelə sahibkarlığa dövlət yardımının əsas istiqamətlərinin müəyyənləşdirilməsi məqsədi ilə Prezident Heydər Əliyev hələ 2002-ci ildə yerli və xarici sahibkarlarla görüşlər keçirmişdir. Bu görüşlərin nəticəsi olaraq, bir sıra mühüm fərmanlar imzalanmışdır. Həmin meyil bu gün də davam etdirilir.

Belə ki, Azərbaycan Prezidenti İlham Əliyevin 2004-cü ilin fevralında sahibkarlarla görüşündə onları maraqlandıran bir çox məsələlər tam qarşılıqlı anlaşma və açıqlıq şəraitində müzakirə olunmuşdur. Sahibkarlar görüşün yekunlarını həm biznes mühitinin yaxşılaşmasında, həm də inkişaf üçün yeni imkanlar açılmasında əyani surətdə hiss etmişlər.

Misal üçün, sahibkarların dövlət tərəfindən dəstəklənməsi və maliyyə yardımı sistemi, texniki yardım, informasiya xidmətləri göstərilməsi, məsləhətlər verilməsi üzrə struktur yaradılmışdır. Bununla yanaşı, sahibkarlığın inkişafı və dəstəklənməsi üçün müvafiq qurumlar da təsis olunmuşdur. Bu işin və sərmayələrin qorunması və təşviqi üzrə lazımi normativ-hüquqi baza yaradılması nəticəsində Azərbaycan adambaşına düşən xarici sərmayələrin həcminə görə MDB ölkələri arasında liderlərdən biri olmuşdur.

Deyilənlərdən göründüyü kimi, ölkələrimizin təsərrüfat subyektləri arasında birbaşa əlaqələrin inkişaf etdirilməsi üçün bütün lazımi şərait yaradılmışdır. Bolqarıstanla Azərbaycan arasında gələcək əməkdaşlıq aşağıdakı istiqamətlərdə davam etdirilə bilər: yoxsulluğun azaldılmasına və iqtisadi inkişafa, kiçik və orta sahibkarlığın inkişafına, Azərbaycan regionlarının sosial-iqtisadi inkişafına dair proqramların həyata keçirilməsində Bolqarıstanın dövlət və özəl strukturlarının iştirakı; Azərbaycan müəssisələrinin özəlləşdirilməsində Bolqarıstan şirkətlərinin iştirakı; maşınqayırma, qara və əlvan metallurgiya, kimya sənayesi, yüngül sənaye, kənd təsərrüfatı məhsullarının istehsalı və emalı sahəsində Azərbaycan sahibkarları ilə müştərək biznes yaradılması; müştərək müəssisələr yaradılması, turizm obyektlərinin tikilməsi və yenidən qurulması. Təbii ki, bundan ötrü müqavilə-hüquq bazasını genişləndirmək lazımdır.

X X X

Sonra görüşdə Bolqarıstan Baş nazirinin müavini, nəqliyyat və kommunikasiyalar naziri NİKOLAY VASİLYEV çıxış etdi. O dedi:

- Çox hörmətli Prezident!

Xanımlar və cənablar!

Bu gün Azərbaycan Prezidenti İlham Əliyev və Bolqarıstan Prezidenti Georgi Pırvanov Azərbaycan Respublikası ilə Bolqarıstan Respublikası arasında Birgə bəyannamə imzaladılar.

Azərbaycan Dövlət Teleqraf Agentliyi (AZƏRTAC) və Bolqarıstan Teleqraf Agentliyi (BTA) arasında əməkdaşlıq haqqında saziş, Azərbaycan Respublikasının hökuməti ilə Bolqarıstan Respublikasının hökuməti arasında səhiyyə və tibb elmi sahəsində, investisiyaların təşviqi və qarşılıqlı qorunması haqqında, ticarət-iqtisadi və elmi-texniki əməkdaşlıq haqqında, ticarət gəmiçiliyi haqqında, beynəlxalq kombinə edilmiş yük daşımaları haqqında sazişlər də imzalandı.

Azərbaycan Respublikası ilə Bolqarıstan Respublikası arasında ticarət-iqtisadi və elmi-texniki əməkdaşlıq üzrə müştərək komissiyanın ikinci iclasında bir sıra mühüm məsələlər müzakirə edildi və konkret qərarlar qəbul olundu. Tərəflər ticarət, sənaye, sərmayələr, kiçik və orta biznes və iqtisadiyyatın digər sahələrində, habelə təhsil, turizm sahəsində əməkdaşlığın müxtəlif cəhətlərini müzakirə etdilər.

Lakin statistika sahəsində problemlər var. Bolqarıstan mənbələrinin məlumatına görə, ötən il Azərbaycan mallarının Bolqarıstana ixracı cəmi bir neçə on min dollar olmuşdur. Azərbaycan tərəfinin məlumatına görə isə, bu rəqəm onlarca milyon dollara bərabərdir. Odur ki, biz bu problemləri birlikdə həll etməliyik.

X X X

Bolqarıstan Prezidenti Georgi Pırvanov görüşdə nitq söylədi.