Bakı, 13 mart (AZƏRTAC). Martın 13-də Bakı Biznes Universitetində (BBU) bu ali təhsil müəssisəsinin yaranmasının 20 illiyinə həsr olunmuş təntənəli tədbir keçirilmişdir.

AZƏRTAC xəbər verir ki, əvvəlcə tədbir iştirakçıları BBU-da ümummilli lider Heydər Əliyevin büstünün açılışında iştirak etmişlər.

Daha sonra universitetin yeni kitabxanasının açılışı olmuşdur.

Universitetin foyesində BBU-nun son nəşrlərindən ibarət sərgi nümayiş etdirilmişdir.

Yubiley mərasimində Azərbaycan Milli Elmlər Akademiyasının (AMEA), ali təhsil müəssisələrinin nümayəndələri, Milli Məclisin deputatları, səfirlər, Türkiyə, ABŞ, Rusiya, Avropa və Asiya ölkələrindən qonaqlar iştirak etmişlər.

Universitetin konfrans zalında keçirilən tədbir Azərbaycanın Dövlət himninin səslənməsi ilə başlanmışdır.

BBU-nun 20 illik fəaliyyətindən bəhs edən qısametrajlı sənədli film göstərilmişdir.

Tədbirdə BBU-nun rektoru, professor İbad Abbasovun universitetin 20 illik fəaliyyətinə dair hesabat məruzəsi dinlənilmişdir. Məruzədə cəmiyyətin və insanın formalaşmasında təhsilin rolundan, ölkəmizdə elm, təhsil sahələrinin inkişafına dövlət qayğısından, özəl ali təhsil müəssisələrinin təhsilimizə töhfələrindən danışılmışdır. Bildirilmişdir ki, ümummilli lider Heydər Əliyevin 1993-cü ildə hakimiyyətə qayıdışı və onun özəl təhsilə birmənalı müsbət münasibəti bu prosesin inkişafına inamlı təkan vermişdir. Respublikamızın özəl təhsil sistemində Bakı Biznes Universitetinin xüsusi xidməti və yeri vardır. Universitet 1989-cu ildə aparılan elmi axtarışlar və tədqiqatlar əsasında 1993-cü ildə təsis edilmişdir. BBU bakalavr və magistr pillələrində kadr hazırlığı üzrə dövlət siyasətini böyük uğurla icra edir.

Hazırda universitetdə bakalavr pilləsində 10 ixtisas üzrə mütəxəssis hazırlığı aparılır. Ötən 20 ildə universitetin bakalavr hazırlığı üzrə 16, magistr hazırlığı üzrə doqquz buraxılışı olmuşdur. BBU-nun məzunlarından bir çoxu ölkəmizin ali icra orqanlarının müxtəlif strukturlarında, ictimai qurumlarda, qeyri-hökumət təşkilatlarında çalışır.

Universitetdə pedaqoji kadr potensialının formalaşmasında da ciddi və məqsədyönlü işlər aparılmışdır. İyirmi il ərzində 25-dən çox doktorluq və namizədlik dissertasiyaları müdafiə olunmuşdur. Hazırda səkkiz nəfər doktorluq, 19 nəfər isə iqtisad üzrə fəlsəfə doktorluğu dissertasiyaları üzərində işləyir. Bu sahədə işlərin daha səmərəli qurulması üçün xarici ölkələrin aparıcı universitetlərinin ixtisaslaşdırılmış şuralarının imkanlarından da istifadə edilir.

İ.Abbasov bildirmişdir ki, universitetdə Heydər Əliyev Dövlət İdarəçiliyi Məktəbi fəaliyyət göstərir. Burada mütəmadi seminarlar keçirilir, tələbə gənclərlə milli vətənpərvərlik ruhunda tərbiyəvi işlər aparılır.

Rektor bildirmişdir ki, universitetdə tədris prosesinin təşkilində inkişaf etmiş ölkələrin təcrübəsinə istinad edilərək fəal təlim sistemlərindən istifadə olunur. Bolonya prosesinə uyğun olaraq, tədrisdə kredit sistemi tətbiq edilmişdir. Tələbələrin biliyinin qiymətləndirilməsi 100 ballıq sistem üzrə aparılır.

Bakı Biznes Universitetində 20 ildə 35 elmi forum təşkil edilmişdir. Bu forumlar iqtisadiyyatda şəffaflığın təmin edilməsinin vacibliyinə, milli iqtisadiyyatın inkişafı və səmərəliliyinin yüksəldilməsinə, respublikamızın sosial-iqtisadi inkişafı problemlərinə və digər mühüm məsələlərə həsr edilmişdir.

BBU bazar iqtisadiyyatı şəraitində dünya təcrübəsinin mütərəqqi metodologiyalarını öyrənmək, elm və təhsil sahəsində yeni nailiyyətlər əldə etmək məqsədi ilə xarici ölkələrin bir sıra qabaqcıl ali məktəbləri ilə elmi əlaqələr yaratmışdır.

Sonra İ.Abbasov BBU-nun 20 ildə qazandığı uğurlara görə və yubiley münasibətilə universitetin kollektivini təbrik etmiş, növbəti 10 ildə bu ali təhsil müəssisəsinin dünyada tanınmasının mühüm vəzifə kimi qarşıya qoyulduğunu vurğulamışdır.

Tədbirdə Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov çıxış edərək bildirmişdir ki, BBU-nun yaranması və onun 20 illik tarixi bütövlükdə Azərbaycanda təhsil sistemində, o cümlədən özəl təhsil sahəsində ulu öndər Heydər Əliyevin müəyyənləşdirdiyi islahatların həyata keçirilməsinin təzahürü və ifadəsidir. BBU 20 illik fəaliyyəti ilə Azərbaycan təhsilinin inkişafına əhəmiyyətli töhfələr vermişdir.

Ə.Əhmədov demişdir ki, müasir inkişafı, müasir cəmiyyətin formalaşmasını, gələcəyə ünvanlanan siyasətin müəyyən edilib həyata keçirilməsini elm, təhsil, universitetlər olmadan təsəvvür etmək mümkün deyildir. Təhsilin inkişafı, Azərbaycanda təhsil sahəsində həyata keçirilən islahatlar ölkəmizin gələcəyinin perspektivlərini müəyyənləşdirir. Bu gün müstəqil respublikamız əhəmiyyətli iqtisadi sistem əsasında sürətlə inkişaf edir. Əminəm ki, BBU-nun məzunları ölkəmizin iqtisadi inkişafının daha da qüdrətlənməsi işinə layiqli töhfələrini verəcəklər.

Təhsil nazirinin müavini Qulu Novruzov qeyd etmişdir ki, hazırda ölkədə fəaliyyət göstərən 15 özəl ali təhsil müəssisəsi arasında BBU-nun xüsusi yeri vardır. Bunu universitetin 20 illik uğurlu fəaliyyəti, qazandığı nailiyyətlər bir daha sübut edir. Q.Novruzov bildirmişdir ki, yubiley münasibətilə universitetin əməkdaşlarından doqquz nəfəri Təhsil Nazirliyinin “Qabaqcıl təhsil işçisi” adına, doqquz nəfəri isə fəxri fərmana layiq görülmüşdür. Təhsil nazirinin müavini kollektivi yubiley münasibətilə təbrik etmiş, daha böyük uğurlar arzulamışdır.

Sonra mükafatlar sahiblərinə təqdim edilmişdir.

Milli Məclisin iqtisadi siyasət komitəsinin sədri, akademik Ziyad Səmədzadə bildirmişdir ki, BBU yarandığı vaxtdan ölkəmizdə biznes iqtisadiyyatı üçün yüksəkixtisaslı kadrların hazırlanması işini müvəffəqiyyətlə həyata keçirir. Azərbaycanda iqtisad elminin inkişafında bu ali təhsil müəssisəsinin böyük rolu vardır. Əminəm ki, BBU müəyyənləşdirdiyi düzgün strategiyasını bundan sonra da davam etdirəcək, daha böyük uğurlara imza atacaqdır.

Dövlət Sosial Müdafiə Fondunun sədri Səlim Müslümov BBU-nun kollektivini yubiley münasibətilə təbrik etmişdir. Bu ali təhsil müəssisəsinin iqtisadi sahə üçün kadr hazırlığı prosesi kimi çətin işin öhdəsindən uğurla gəldiyini vurğulayan S.Müslümov BBU-nun bu sahədə rəqabətdə öz mövqeyini qoruyub saxlayacağına əminliyini ifadə etmişdir.

Bakı Metropoliteninin rəisi Tağı Əhmədov bildirmişdir ki, ölkənin qabaqcıl özəl ali təhsil müəssisələrindən olan BBU-nun məzunları təhsil illərində qazandıqları bilikləri bu gün ölkənin müxtəlif idarə və təşkilatlarında təcrübəyə tətbiq edirlər. Mən BBU-da yüksək hazırlıqlı kadrların yetişdirildiyinə əminəm. Ona görə də onun məzunlarının Bakı Metropolitenində də işləməsini çox istərdim. Kollektivi yubiley münasibətilə təbrik edirəm və inanıram ki, BBU bundan sonra da təhsil sahəsində fəal mövqe nümayiş etdirəcəkdir.

AMEA-nın birinci vitse-prezidenti, akademik Arif Həşimov qeyd etmişdir ki, ölkənin yüksəkixtisaslı kadr potensialı ilə təmin edilməsində böyük rol oynayan BBU həm də təhsil ilə elmi birləşdirən bir universitetdir. Burada AMEA-nın tanınmış alimlərinin fəaliyyət göstərməsi bunu sübut edir. Bu, olduqca təqdirəlayiq bir haldır. Çünki hər bir elmi işçi mütləq təhsil sahəsində də məşğul olmalı, müəllimlik missiyasını yerinə yetirməlidir.

A.Həşimov iqtisadiyyat sahəsində qazanılan nailiyyətlərə görə və yubiley münasibətilə universitetin kollektivini təbrik etmişdir.

YAP Yasamal rayon təşkilatının sədri, professor Fikrət İsmayılov BBU-nun müasir Azərbaycanın tələbləri ilə ayaqlaşan, onun iqtisadi gücünün artmasında rolu olan, ölkə iqtisadiyyatı üçün peşəkar kadrlar hazırlayan qabaqcıl təhsil müəssisəsi olduğunu vurğulamışdır.

Universitetin qazandığı uğurlarda əhəmiyyətli rolu olan, beş nominasiya üzrə dəyərləndirilmiş bir qrup müəllim və tələbəyə mükafatlar təqdim edilmişdir.

Tədbirdə Kazan Federal Universitetinin professoru Vitali İvaşkeviçə BBU-nun fəxri doktoru adı verilməsi haqqında universitet elmi şurasının qərarı oxunmuşdur. V.İvaşkeviçə fəxri doktor diplomu, mantiya və qiymətli hədiyyələr təqdim edilmişdir.

AMEA-nın, müxtəlif ali təhsil müəssisələrinin nümayəndələri çıxış edərək BBU-nun keçdiyi 20 illik şərəfli yoldan, qazandığı uğurlardan danışmış, kollektivi təbrik etmişlər.

Tədbir bədii hissə ilə davam etmişdir.