ELM VƏ TƏHSİL
Bakı Şəhəri üzrə Təhsil İdarəsi təhsil şurasının növbəti iclası keçirilmişdir
Bakı, 18 mart (AZƏRTAC). Bakı Şəhəri üzrə Təhsil İdarəsi (BŞTİ) təhsil şurasının növbəti iclası keçirilmişdir.
BŞTİ-dən AZƏRTAC-a bildirmişlər ki, iclasın gündəliyinə cari məsələlər, 2011-2012-ci il məzunlarının buraxılış və qəbul imtahanlarının nəticələri, məktəblərin V siniflərində dərs aparan müəllimlərin fənn kurikulumlarının tətbiqi üzrə təlim kurslarından keçməsi, eləcə də Binəqədi rayonu məktəblərində informasiya-kommunikasiya texnologiyalarından (İKT) istifadə vəziyyətinə dair monitorinqin nəticələri olmaqla ümumilikdə 4 məsələ daxil edilmişdir.
İclasda BŞTİ-nin müdiri Nailə Rzaquliyeva çıxış edərək birinci siniflərə şagird qəbulu prosesinə hazırlıq, şagirdlərin dərsə davamiyyəti, məktəbli geyiminə riayət, yeni direktorların kurslarda iştirakı kimi cari məsələlər ətrafında tapşırıq və tövsiyələrini vermişdir.
İclasda Binəqədi rayonunun təhsil müəssisələrində İKT-dən istifadə və informatika fənninin tədrisi vəziyyətinə dair monitorinqin nəticələri təqdim edilmişdir. Bildirilmişdir ki, rayon üzrə 32 məktəbdə 68 informatika kabineti yaradılmış və həmin otaqlarda 1.385 kompyuter quraşdırılmışdır. Ümumilikdə rayon məktəblərinin bu sahədəki fəaliyyəti kafi qiymətləndirilmiş, bəzi irad və təkliflər bildirilmişdir.
BŞTİ-nin strateji təhlil, planlaşdırma və kadrların idarə olunması sektorunun müdiri Bəhman Nəbiyev məktəblərin V siniflərində dərs aparan müəllimlərin fənn kurikulumlarının tətbiqi üzrə təlim kurslarından keçməsi barədə araşdırmanın nəticələrini təqdim etmişdir. B.Nəbiyev bildirmişdir ki, Nazirlər Kabinetinin qərarı ilə 1999-cu ildə təsdiq edilmiş “Azərbaycan Respublikasında ümumi orta təhsilin dövlət standartları” qəbul edilmiş və 2005-ci ildən etibarən kurikulum islahatı çərçivəsində yeni təhsil standartlarının (fənn kurikulumlarının) hazırlanmasına başlanılmışdır. Qeyd edilmişdir ki, 2008-2012-ci illərdə ümumtəhsil məktəblərinin ibtidai təhsil pilləsində (I-IV siniflərdə) tətbiq olunan fənn kurikulumlarının 2012/2013-cü dərs ilindən etibarən ümumi orta təhsil səviyyəsində (V-IX siniflərdə) tətbiqinə başlanılmış və bu islahat müvəffəqiyyətlə həyata keçirilir. Təhsil müəssisələrindən alınan diaqnostik məlumatlar əsasında BŞTİ-nin tabeliyində olan tam orta təhsil məktəblərində kurikulum kurslarının tətbiqi ilə bağlı I-IV, V siniflərdə dərs aparan müəllimlərin təlim kurslarından keçmə vəziyyəti araşdırılmışdır. Bu araşdırmaların nəticələrinin təhlil edilməsində məqsəd məktəblərin idarə olunması, gözlənilən nəticəyə nail olmaq üçün imkan və şəraitdən düzgün istifadə edilməsi vəziyyətini qiymətləndirmək və müəyyən tədbirlər görməkdir.
Təhsil şurasının müzakirəyə çıxardığı növbəti məsələ 2012-ci ilin buraxılış və qəbul imtahanlarının nəticələrinin statistik təhlili olmuşdur. İdarənin ümumi təhsil sektorunun müdiri Firidun Həmzəyevin təqdim etdiyi statistik məlumatlar məktəblərin IX və XI siniflərində buraxılış imtahanlarının, eləcə də ali məktəblərə qəbul imtahanlarının nəticələrinin müqayisəli təhlili olmuşdur. Müxtəlif fənlər üzrə məzunların əldə etdiyi nəticələr, eləcə də ayrı-ayrı məktəblərin son illərdəki göstəriciləri, təhsil müəssisələrinin inkişaf dinamikası diaqram və cədvəllərlə iclas iştirakçılarının diqqətinə çatdırılmışdır.
Sonra müzakirəyə çıxarılan mövzularla bağlı geniş müzakirə aparılmış və BŞTİ-nin təhsil şurasının müvafiq qərarları qəbul edilmişdir.