Bakı, 11 oktyabr, AZƏRTAC

Oktyabrın 11-də Azərbaycan Skaut Assosiasiyasının (ASA) yaradılmasının 20 illik yubileyi qeyd olunub.

AZƏRTAC xəbər verir ki, tədbirdə əvvəlcə Azərbaycanın dövlət himni səsləndirilib.

Sonra skaut hərəkatının inkişafı barədə videoçarx nümayiş olunub.

Assosiasiyanın fəaliyyəti barədə məlumat verən ASA-nın sədri İlyas İsmayıllı skautinqin gənclərin inkişafında oynadığı roldan danışıb. O bildirib ki, Azərbaycanda skautinqin kütləviliyinin artırılması üçün lazımi şərait var. Azərbaycan skautları öz bacarıqları ilə seçilir və beynəlxalq arenada ölkəmizi layiqincə təmsil edirlər.

Cari ilin avqustunda Bakının ev sahibliyi etdiyi 41-ci Dünya Skaut Konfransının ölkə və iştirakçı sayına görə qurumun tarixində ən böyük tədbir olduğunu vurğulayan İ.İsmayıllı tədbirə 166 ölkədən 1500 skautun qatıldığını xatırladıb.

Gənclər və idman nazirinin müavini İntiqam Babayev assosiasiyanın fəaliyyətini yüksək qiymətləndirib. ASA-nın dövlət gənclər siyasətinin inkişafında mühüm rol oynadığını xatırladan nazir müavini gənclərin formalaşmasında, onların həyat məktəbinə yaxından bələd olmasında qurumun fəaliyyətinin vacibliyini diqqətə çatdırıb.

Sonra İ.Babayev gənclər və idman naziri Azad Rəhimovun adından xatirə plaketini İ.İsmayıllıya təqdim edib.

Azərbaycan Respublikası Gənclər Təşkilatları Milli Şurasının sədri Seymur Hüseynov ASA-nın əldə etdiyi uğurlardan danışıb, gənclərin skautinqə cəlb olunmasının əhəmiyyətini vurğulayaraq assosiasiyaya gələcək fəaliyyətində uğurlar arzulayıb.

Sonra Dünya Skaut Hərəkatı Təşkilatının (WOSM) baş katibi Əhməd əl-Hindavinin təbrik videosu nümayiş etdirilib.

Azərbaycan skautlarının himni səsləndirildikdən sonra Bakıda təşkil olunan 41-ci Dünya Skaut Konfransından bəhs edən videoçarx nümayiş etdirilib.

13-cü Dünya Skaut Gənclər Forumunu və 41-ci Dünya Skaut Konfransını geniş şəkildə işıqlandırdığına görə yubiley tədbirində AZƏRTAC-a təşəkkürnamə təqdim edilib.