Bakı, 22 sentyabr (AZƏRTAC). Sentyabrın 21-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilib. Paytaxt əhalisinin kənd təsərrüfatı məhsullarına tələbatını ödəmək məqsədilə keçirilən yarmarkalara mövsümə uyğun meyvə-tərəvəz məhsulları çıxarılıb.

Bazar günü “Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 13,15 ton məhsul, o cümlədən 0,3 ton ət, 0,1 ton ağartı, 4 ton meyvə, 1,5 ton bostan məhsulları və s. təklif olunurdu. Ümumilikdə şənbə və bazar günlərində yarmarkada 26,15 ton məhsul satılıb.

Yarmarkada nümunəvi səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlıq etməyə gələn paytaxt sakinlərinə əlverişli şəraitin yaradılması diqqəti daha çox cəlb edirdi. Paytaxt sakinləri onlara sərfəli qiymətə payız mövsümünə uyğun təklif edilən bol meyvə-tərəvəzi, o cümlədən pomidor, xiyar, badımcan, lobya, kartof, soğan, yerkökü, kələm, üzüm, gavalı, alma, armudu, ağartını həvəslə alırdılar.

Bütün məhsulların sanitar-gigiyenik vəziyyəti Kənd Təsərrüfatı Nazirliyi yayında Dövlət Fitosanitar Nəzarəti Xidməti tərəfindən diqqətlə yoxlanılırdı.

Alıcılar qiymətlərdən və burada yaradılan nümunəvi şəraitdən razılıq edirdilər.

Kənd Təsərrüfatı Nazirliyinin nümayəndəsi Səfəralı Nəsirov dedi ki, yarmarkadakı qiymətlər bazarlardakından 20-25 faiz ucuzdur. Yarmarkada kələm 70-90, badımcan 30-40, yerkökü 70-90 qəpiyə, lobya 2 manata, alma 50-80 qəpiyə, armud 70 qəpik - 1 manata, üzüm 80 qəpik -1 manat 20 qəpiyə təklif edilir. Burada, həmçinin qoyun ətinin kiloqramı 6 manata, mal əti 5 manata, yumurtanın 1 ədədi 6-8 qəpiyə və s. satılır.

Yasamal rayonunda, Bakı Rabitə və Nəqliyyat Kollecinin həyətində təşkil edilmiş kənd təsərrüfatı məhsullarının satış yarmarkasına istirahət günlərində bu əraziyə təhkim olunmuş Salyan, Qusar, Astara, Şabran rayonlarının, bundan əlavə, Sabirabad, Kürdəmir, Bərdə, Xaçmaz, Quba, Göyçay və Gədəbəy rayonlarının fermerləri və torpaq mülkiyyətçiləri 141,8 ton meyvə-tərəvəz, bostan məhsulları, mal və qoyun əti, ağartı, göyərti və digər məhsullar gətirmişdilər.

Kənd Təsərrüfatı Nazirliyinin nümayəndəsi Vidadi Bayramov məlumat verdi ki, paytaxt sakinləri mövsümə uyğun meyvə-tərəvəzlərdən kartof, soğan, badımcan, kələm, lobya, alma, armud, çiyələk, ərik, gavalı, şaftalı, üzüm, zoğal, əncir, moruq, qarağat, həmçinin yemiş, qarpız, balqabaq və digər bostan məhsullarını daha həvəslə alırlar.

Şənbə günündə olduğu kimi, sentyabrın 21-də də yarmarkada səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlığa gələn paytaxt sakinlərinə əlverişli şəraitin yaradılması diqqəti daha çox cəlb edirdi.

Məhsullar bazarlardakından 25-30 faiz ucuz qiymətə təklif olunurdu. Başqa sözlə, burada kartof 40-65, soğan 25-30 qəpiyə, pomidor 70 qəpik- 1 manata, xiyar 50-60, qarpız 30-35, yemiş 50-70, alma 50-80 qəpiyə, armud 70 qəpik-1 manata, üzüm 80 qəpik-1 manat 20 qəpiyə idi. Bunun nəticəsində istirahət günlərində yarmarkaya daxil olmuş məhsulların təqribən 90 faizi satılmışdı.

Bütün məhsulların sanitar-gigiyenik vəziyyəti Kənd Təsərrüfatı Nazirliyi yayında Dövlət Fitosanitar Nəzarəti Xidməti tərəfindən diqqətlə yoxlanılırdı.

Yarmarkada qoyulmuş nəzarət tərəzisində hər kəs aldığı məhsulun çəkisini yoxlaya bilərdi.

Kənd Təsərrüfatı Nazirliyinin nümayəndəsi Samir Hidayətov məlumat verdi ki, bazar günü Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (19,8 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (3,7 ton) satışa bir gün əvvəl Samux, Quba, Biləsuvar, Cəlilabad və Ağsu rayonlarından gətirilmiş ümumilikdə 23,5 ton məhsulun, demək olar ki, hamısı satılıb.

Hər iki yarmarkada meyvələrdən alma, armud, çiyələk, ərik, əncir, gavalı, şaftalı, qarağat, üzüm, zoğal, tərəvəzlərdən pomidor, xiyar, soğan, kartof, badımcan, bibər, göyərti, bostan məhsullarından yemiş, qarpız, balqabaq və digər mövsümi kənd nemətlərinin alıcıları çoxluq təşkil edirdi.

Bazarlarla müqayisədə qiymətlər 25-30 faiz ucuz idi. Məhsulların keyfiyyəti ciddi surətdə yoxlanılmış, ət və süd məhsulları baytar müayinəsindən keçirilmişdi.

Şənbə günü Xətai rayonunda, “Bakı” kinoteatrının yaxınlığındakı yarmarkaya Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən rayonlarından 305,6 ton meyvə-tərəvəz, ət və süd məhsulları gətirilmişdi.

Kənd Təsərrüfatı Nazirliyinin nümayəndəsi Mustafa Rüstəmov məlumat verdi ki, şənbə və bazar günlərində yarmarkada bazarlardakından 20-25 faiz ucuz qiymətə 300 tondan çox üzüm, alma, armud, pomidor, xiyar, badımcan, kartof, soğan, qarpız, yemiş və digər məhsullar satılıb.

Şəhər sakinləri yarmarkada yaradılan şəraitdən razılıq edirdilər.

Kənd Təsərrüfatı Nazirliyinin nümayəndəsi Qüdsi Rəhimov bildirdi ki, bazar günü Nərimanov rayonunda, metronun “Gənclik” stansiyasının yaxınlığındakı yarmarkaya bir gün əvvəl Xaçmaz, Tərtər, İmişli, Salyan, Tovuz, Neftçala, Oğuz rayonlarından gətirilmiş 59,7 ton kənd təsərrüfatı məhsulları satılıb qurtarmaq üzrədir.

Yarmarkada ilk baxışdan canlanma, bolluq və qızğın alış-veriş gözə çarpır, çeşidlərin müxtəlifliyi hiss olunurdu. Alıcılara mövsümə uyğun bostan bitkiləri-qarpız, yemiş, balqabaq, tərəvəzlərdən pomidor, xiyar, kələm, kartof, soğan, yerkökü, çuğundur, meyvələrdən alma, armud, çiyələk, şaftalı, gavalı, üzüm, qarağat, əncir, moruq, həmçinin ağartı, göyərti və s. kənd nemətləri təklif edilirdi.

Paytaxt sakinləri yarmarkadakı meyvə-tərəvəz, göyərti və ağartı məhsullarının təzə və keyfiyyətli, eyni zamanda, bazarlardakından 25-30 faiz ucuz qiymətə olmasından razılıq edirdilər. Məsələn, yarmarkada kələm 70-90, badımcan 30-40, yerkökü 70-90 qəpiyə, lobya 2 manata, alma 50-80 qəpiyə, armud 70 qəpik-1 manata, üzüm 80 qəpik-1 manat 20 qəpiyə satılırdı.

Binəqədi rayonu, 6 nömrəli Bakı Texniki Peşə Liseyinin qarşısındakı yarmarkaya Goranboy, Bərdə, Ağstafa, Siyəzən və digər rayonların fermerləri bazarlardakından 25-30 faiz ucuz qiymətlərə müxtəlif çeşiddə məhsullar çıxarmışdılar. Şəhər sakinləri burada təklif edilən meyvə-tərəvəzləri, süd və bostan məhsullarını həvəslə alırdılar.

Məhsulların arasında çoxluq təşkil edən kələmin kiloqramı 60-75, pomidor 50-90, badımcan 30-35, alma 30-50, qarpız 25-30 qəpiyə təklif edilirdi.

Kənd Təsərrüfatı Nazirliyinin nümayəndəsi Qadir Həsənov bildirdi ki, şənbə və bazar günlərində yarmarkada 23,5 ton məhsul satılıb.