Bakı, 9 sentyabr (AZƏRTAC). Sentyabrın 8-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Paytaxt əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara mövsümə uyğun olaraq əsasən meyvə-tərəvəz məhsulları çıxarılmışdır. 

Bazar günü “Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 12,7 ton məhsul, o cümlədən 0,4 ton ət, 0,1 ton ağartı, 3 ton meyvə və s. təklif olunurdu. Ümumilikdə şənbə və bazar günlərində yarmarkada 27,6 ton məhsul satılmışdır.

Paytaxt sakinləri təzə və keyfiyyətli məhsullar alır, bəzi məhsulların bazarlardakından ucuz olduğuna görə yarmarkanın təşkilatçılarına və fermerlərə minnətdarlıqlarını bildirirdilər.

Kənd Təsərrüfatı Nazirliyinin nümayəndəsi Rövşən Əliyev dedi ki, yarmarkadakı qiymətlər bazardakından 20-25 faiz ucuzdur. Qoyun ətinin kiloqramı 6 manata, mal əti 5 manat 50 qəpiyə, soğan 40-50, kartof 40-60, yumurtanın 1 ədədi 10 qəpiyə və s. satılır.

Yasamal rayonunda, Bakı Rabitə və Nəqliyyat Kollecinin həyətində təşkil edilmiş kənd təsərrüfatı məhsullarının satış yarmarkasına istirahət günlərində bu əraziyə təhkim olunmuş Salyan, Qusar, Astara, Şabran rayonlarının, bundan əlavə, Göyçay və Gədəbəy rayonlarının fermerləri və torpaq mülkiyyətçiləri 65,4 ton meyvə-tərəvəz, bostan məhsulları, ağartı, göyərti, digər kənd nemətləri gətirmişdilər.

Kənd Təsərrüfatı Nazirliyinin nümayəndəsi Fəxrət Eminov məlumat verdi ki, bu dəfəki yarmarkaya çıxarılan məhsullar arasında göyərti, kartof-soğan, kələm, kahı, lobya, badımcan, bibər, meyvələrdən alma, armud, alça, gavalı, şaftalı, üzüm, zoğal, bostan məhsullarından qarpız, yemiş və digər mövsümə uyğun məhsullar üstünlük təşkil edir.

Şənbə günündə olduğu kimi, sentyabrın 8-də də yarmarkada səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlıq etməyə gələn paytaxt sakinlərinə əlverişli şəraitin yaradılması diqqəti daha çox cəlb edirdi. Bunun nəticəsində istirahət günlərində yarmarkaya daxil olmuş məhsulun yarıdan xeyli çoxu satılmışdır.

Bütün məhsulların sanitar-gigiyenik vəziyyəti Kənd Təsərrüfatı Nazirliyi yayında Dövlət Fitosanitar Nəzarəti Xidməti tərəfindən diqqətlə yoxlanılır.

Yarmarkada qoyulmuş nəzarət tərəzisi vasitəsilə hər kəs aldığı məhsulun çəkisini yoxlaya bilər.

Kənd Təsərrüfatı Nazirliyinin nümayəndəsi Mustafa Rüstəmov məlumat verdi ki, bazar günü Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (20,3 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,5 ton) satışa bir gün əvvəl Şəki, Samux, Quba, Biləsuvar, Cəlilabad və Ağsu rayonlarından gətirilmiş ümumilikdə 22, 8 ton məhsul satılıb qurtarmaq üzrədir.

Hər iki yarmarkada meyvələrdən üzüm, zoğal, alma, armud, alça, gavalı, şaftalı, tərəvəzlərdən pomidor, xiyar, soğan, kartof, lobya, badımcan, bibər, göyərti, bostan məhsullarından yemiş, qarpız və digər mövsümi məhsulların alıcıları çoxluq təşkil edir.

Bazarlarla müqayisədə qiymətlər 25-30 faiz ucuzdur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.

Xətai rayonunda, “Bakı” kinoteatrının yaxınlığındakı yarmarkaya Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən rayonlarından 211 ton meyvə-tərəvəz, ət və süd məhsulları gətirilmişdir.

Şənbə və bazar günlərində yarmarkada bazarlardakından 20-30 faiz ucuz qiymətə 207,5 ton çox qarpız, şaftalı, üzüm, gavalı, zoğal, pomidor, xiyar, kartof, soğan, badımcan, bibər, göyərti və digər məhsullar satılmışdır.

Bazar günü Binəqədi rayonu, 6 nömrəli Bakı Texniki Peşə Liseyinin qarşısındakı yarmarkaya Siyəzən, Goranboy, Ağstafa, Bərdə və başqa rayonların fermerləri və digər torpaq mülkiyyətçiləri paytaxt sakinlərinə satmaq üçün bol və keyfiyyətli meyvə-tərəvəzlər, süd və bostan məhsulları gətirmişdilər.

Alıcılar burada bazarlıq etməyə maraq göstərirdilər. Satıcılar isə öz növbələrində məhsulları onlara bazarlardakından 25-30 faiz ucuz qiymətlərə təklif edirdilər.

Yarmarkada nümunəvi xidmət üçün hər cür şərait yaradılmışdı.

Kənd Təsərrüfatı Nazirliyinin nümayəndəsi Qadir Həsənov bildirdi ki, şənbə və bazar günlərində yarmarkada 33,5 ton meyvə-tərəvəz, süd və bostan məhsulları satılmışdır.