İQTİSADİYYAT
Bakıda məşhur neftçi və dövlət xadimi Nikolay Baybakovun büstü açılıb
Bakı, 6 mart, AZƏRTAC
Martın 6-da Bakının Sabunçu qəsəbəsindəki 67 nömrəli tam orta məktəbin qarşısında Azərbaycanda neft sənayesinin inkişafına böyük töhfələr vermiş tanınmış ictimai xadim, Sosialist Əməyi Qəhrəmanı Nikolay Baybakovun büstü açılıb.
AZƏRTAC xəbər verir ki, mərasimdə SOCAR-ın vitse-prezidentləri, Sabunçu rayon İcra Hakimiyyətinin təmsilçiləri və ictimaiyyət nümayəndələri iştirak ediblər.
Sabunçu Rayon İcra Hakimiyyətinin başçısı Adil Vəliyev deyib ki, görkəmli dövlət xadimi və ictimai-siyasi xadim, Azərbaycanın və Rusiyanın neft sənayesinin görkəmli təşkilatçısı Nikolay Baybakov qeyri-adi şəxsiyyət, parlaq və mənalı həyat yolu keçmiş və yüksək vətəndaşlıq keyfiyyətləri ilə, son dərəcə peşəkarlığı, tükənməz əməksevərliyi və əzmkarlığı, seçdiyi işə sədaqəti ilə fərqlənən gözəl insan kimi daim xatirələrdə qalacaq.
SOCAR-ın birinci vitse-prezidenti, akademik Xoşbəxt Yusifzadə vurğulayıb ki, N.Baybakovun ümumilikdə keçmiş sovetlər ittifaqının neft sənayesinin təkmilləşdirilməsində böyük rolu olub. Sabunçu qəsəbəsində anadan olmuş N.Baybakov Azərbaycanda neft sənayesinin inkişafında böyük xidmətləri olan şəxsdir. O, uzun illər keçmiş SSRİ-də yüksək vəzifələrdə çalışıb, amma heç vaxt ona doğma olan Azərbaycanı unutmayıb, hər zaman onu dəstəkləyib.
Görkəmli neftçinin həyat yolundan danışan akademik bildirib ki, N.Baybakov 1941-1945-ci illər müharibəsində Bakıda neft hasilatının xeyli artırılmasında yaxından iştirak edib, Azərbaycanın SSRİ-nin bu müharibədə qələbə qazanmasında əvəzolunmaz rolunu dəfələrlə qeyd edib. N.Baybakov 1999-cu ildə ümummilli lider Heydər Əliyevin Sərəncamı ilə “Şöhrət”, 2006-cı ildə isə Prezident İlham Əliyevin Sərəncamı ilə “İstiqlal” ordenləri ilə təltif olunub. X.Yusifzadə ümummilli lider Heydər Əliyevin Nikolay Baybakovla dostluğu haqqında da danışıb.
Sonda N.Baybakova həsr edilmiş film nümayiş etdirilib.
Qeyd edək ki, 1911-ci ildə Bakının Sabunçu qəsəbəsində anadan olmuş N.Baybakov neft sahəsində bir sıra səmərəli təkliflərin, o cümlədən “Baybakov üsulu”nun müəllifidir. O, bütün ömrü boyu Azərbaycanla sıx bağlı olub, xüsusilə SSRİ Dövlət Plan Komitəsinin sədri olarkən respublikamızın inkişafına böyük diqqət yetirib.
N.Baybakovun uzun bir dövrü əhatə edən ictimai fəaliyyəti daim yüksək qiymətləndirilib. O, bir çox fəxri adlar alıb, müxtəlif orden və medallarla təltif edilib, müstəqil Azərbaycanın ali mükafatlarına layiq görülüb.