Bakı, 29 aprel (AZƏRTAC). Aprelin 29-da Bakıda Azərbaycan Respublikasının Gənclər və İdman Nazirliyinin və Xəzər İnvestisiya Mərkəzinin birgə təşkilatçılığı ilə mobil texnologiyalar üzrə Dünya gənclər forumu öz işinə başlamışdır.

AZƏRTAC xəbər verir ki, iki gün davam edəcək tədbirin əhəmiyyətini vurğulayan gənclər və idman nazirinin müavini İntiqam Babayev forumun məqsədinin mobil texnologiyaların son nailiyyətləri ilə tanış olmaq, mobil applikasiyaların hazırlanması və istifadə edilməsi sahəsində beynəlxalq təcrübəni öyrənmək, həmçinin gənclərin yeni texnologiyalara marağını artırmaqdan ibarət olduğunu bildirmişdir.

Bakıda keçirilən bu forumu yüksək qiymətləndirən nazir müavini qeyd etmişdir ki, informasiya texnologiyalarının inkişafı gənclərin məşğulluğunu təmin edir və onlar tərəfindən bu sahədə yeni ideyaların üzə çıxmasına təkan verir.

Cari ilin ölkədə “İnformasiya-kommunikasıya texnologiyaları ili” elan olunduğunu xatırladan rabitə və informasiya texnologiyaları nazirinin müavini İltimas Məmmədov bildirmişdir ki, bu il informasiya-kommunikasiya texnologiyaları (İKT) sahəsində yeni layihələr həyata keçiriləcəkdir. Azərbaycanda mobil rabitə sahəsinin sürətlə inkişaf etdiyini deyən nazir müavini bildirmişdir ki, artıq ölkədə fəaliyyət göstərən mobil rabitə operatorları tərəfindən 3G və 4G xidmətlərinin göstərilməsinə başlanılmışdır. Matın 1-dən etibarən Azərbaycanda mobil telefonların qeydiyyatı sistemi işə düşəcək, yaxın zamanlarda isə mobil telefon nömrələrinin daşınması xidməti istifadəyə veriləcəkdir.

Tədbirdə iştirak edən Dünya Bankının “infoDev” proqramının nümayəndəsi xanım Haydi Humala layihə çərçivəsində inkubator və texnoparklar şəbəkəsinin yaradıldığını bildirmişdir.

Proqram üzrə dünyanın 8 ölkəsində, o cümlədən Azərbaycanda mobil texnologiyalar mərkəzinin (Mobile Technology Hub) yaradıldığını qeyd edən H.Humala bildirmişdir ki, gəncləri bu sahəyə cəlb etməkdə məqsədimiz onlara layihə çərçivəsində dəstək vermək və təcrübə mübadiləsi aparmaqdır.

Beynəlxalq forumda dünyanın 20 ölkəsindən İKT sahəsində çalışan 30 xarici ekspert və mobil applikasiyaları üzrə tanınmış mütəxəssislər iştirak edirlər.

Forum çərçivəsində “Mobil texnologiyalar sahəsində innovasiyalar və onlara yatırılan sərmayələr”, “Mobil texnologiyalar: gənclərin virtual sahibkarlığı üçün yeni məkan”, “Tələbələr üçün texnoloji yeniliklər”, “Texnoloji inkişafda “Lego robotları”nın rolu” mövzularında sessiyalar təşkil olunacaq, “Mobile Monday” şəbəkəsinin təqdimatı keçiriləcəkdir.

Aprelin 30-da forum işini davam etdirəcəkdir.