REGİONLAR
Bakıda Novruz bayramı ilə əlaqədar kənd təsərrüfatı məhsullarının satış yarmarkaları başlamışdır
Bakı, 15 mart (AZƏRTAC). Xəbər verdiyimiz kimi, Novruz bayramında əhalinin bazar qiymətlərindən daha ucuz ərzaq və kənd təsərrüfatı malları ilə təmin olunması məqsədi ilə Kənd Təsərrüfatı Nazirliyi martın 15-dən 20-dək Bakı şəhərinin müxtəlif yerlərində satış yarmarkaları təşkil edir.
Yarmarkalar bu ünvanlarda keçirilir: Xətai rayonu üzrə - Məhəmməd Hadi küçəsində (Ukrayna dairəsindən H.Aslanov metrosuna gedən yolda); Yasamal rayonu üzrə - Bakı Rabitə və Nəqliyyat Kollecinin həyətində; Nərimanov rayonu üzrə - metronun “Gənclik” stansiyasının yaxınlığında; Binəqədi rayonu üzrə - Dərnəgül yaşayış sahəsindəki 6 nömrəli peşə liseyinin həyətində; Suraxanı rayonu üzrə - Yeni Günəşli qəsəbəsi, “Günəş” ticarət mərkəzinin yanında; Nəsimi rayonu üzrə - Təzə bazarın ərazisində; Səbail rayonu üzrə - Badamdar qəsəbəsindəki 239 nömrəli məktəbin yanında.
Azərbaycan Respublikası Prezidentinin “Kənd təsərrüfatı və ərzaq məhsulları bazarının fəaliyyətinin təkmilləşdirilməsi sahəsində əlavə tədbirlər haqqında” 2014-cü il 16 yanvar tarixli Sərəncamında Kənd Təsərrüfatı Nazirliyinə yerli icra hakimiyyəti orqanları ilə birlikdə Bakıda keçirilən kənd təsərrüfatı məhsullarının satış yarmarkalarının daha səmərəli təşkili tapşırılmışdır. Sərəncama əsasən, yarmarkaların fəaliyyətinə normal şərait yaradılmalı, əhali və fermerlər üçün əlverişli ticarət mühiti formalaşdırılmalı, sui-istifadə hallarının aradan qaldırılması üçün təxirəsalınmaz tədbirlər görülməli, habelə kənd təsərrüfatı məhsulları istehsalçılarının topdan və pərakəndə satış bazarlarına çıxış imkanlarının genişləndirilməsi məqsədi ilə şəhərlərdə və rayon mərkəzlərində yarmarkalar təşkil olunmalıdır.
Sərəncamdan irəli gələn vəzifələrin icrası məqsədi ilə Bakıda kənd təsərrüfatı məhsullarının satış yarmarkaları üçün ayrılan yerlər müasir standartlara uyğun və qapalı formada qurulmuş, əhali və fermerlər üçün daha əlverişli ticarət mühiti yaradılmışdır.
Martın 15-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının bayram satış yarmarkaları başlamışdır. Bayram yarmarkalarına mövsümə uyğun olaraq əsasən meyvə-tərəvəz, ərzaq, həmçinin Novruz süfrələrimi bəzəmək üçün müxtəlif çərəzlər, şirniyyatlar və digər məhsullar çıxarılmışdır.
“Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 40 tondan çox məhsul, o cümlədən 0,6 ton ət, 0,2 ton ağartı, 5 ton tərəvəz, 25 ton kartof və s. təklif olunurdu.
Yarmarkada Novruzun gəlişindən xəbər verən səmənilər göz oxşayırdı. Həmişəkindən fərqli olaraq qoz, fındıq, quru meyvələr, ədviyyat daha çox alınırdı.
Kənd Təsərrüfatı Nazirliyinin nümayəndəsi Rövşən Əliyev dedi ki, yarmarkadakı qiymətlər bazarlardakından 20-25 faiz ucuzdur. Qoyun ətinin kiloqramı 6 manata, mal əti 5 manata, soğan 45-60 qəpiyə və s. satılır.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkada Novruz bayramı ilə əlaqədar qoz, fındıq, şabalıd və meyvə qurusu çoxluq təşkil edirdi. Baharın rəmzi olan qırmızı lentli yaşıl səmənilər xüsusilə göz oxşayırdı.
Burada satışa Ağdaş, Salyan, Masallı və digər rayonlardan gətirilmiş 15 tondan çox kənd təsərrüfatı məhsulları çıxarılmışdır.
Yarmarkaya ət gətirmiş sabirabadlı fermer Nurəddin Məmmədov bildirdi ki, ətin kiloqramını 5 manat 50 qəpiyə təklif edir. Onun sözlərinə görə, son aylarda burada 1 tonadək ət satmışdır.
Kənd Təsərrüfatı Nazirliyinin nümayəndəsi Məmməd Həziyev bildirdi ki, yarmarkalarda məhsulların keyfiyyəti ciddi surətdə yoxlanılmış, xüsusilə ət və süd məhsulları baytar müayinəsindən keçirilir.
Paytaxt sakinləri burada təklif olunan kartof, soğan, alma, naringi, kələm, yerkökü, çuğundur, yumurta, ət, süd, həmçinin Novruz çərəzlərini həvəslə alırdılar.
Yarmarkada təklif edilən məhsulların keyfiyyətli və bazarlardakından 25-30 faiz ucuz olması alıcılar tərəfindən razılıqla qarşılanır.
Yasamal rayonunda, Bakı Rabitə və Nəqliyyat Kollecinin həyətində - qapalı şəraitdə, göz oxşayan səliqə-sahman yaradılmış məkanda təşkil edilmiş yarmarkaya bu əraziyə təhkim olunmuş Salyan, Qusar, Astara, Şabran, bundan əlavə, Quba, Göyçay və Gədəbəy rayonlarının fermerləri və torpaq mülkiyyətçiləri tərəfindən beş gün üçün 241,8 ton meyvə-tərəvəz, bostan bitkiləri, mal və qoyun əti, ağartı, Novruz çərəzləri və digər məhsullar gətirilmişdir. Azərbaycanda qida məhsullarının istehsal edən şirkətlər də bayramla bağlı öz məhsullarını yarmarkaya çıxarmışlar.
Kənd Təsərrüfatı Nazirliyinin nümayəndəsi Fəxrət Eminov məlumat verdi ki, bugünkü yarmarkaya çıxarılan məhsullar arasında mövsümə uyğun kənd nemətləri, o cümlədən kartof, soğan, kələm, yerkökü, çuğundur, badımcan, balqabaq, bibər, alma, armud, nar, heyva, göyərti, həmçinin qoz, fındıq, şabalıd və meyvə qurusu və digər çərəzlər üstünlük təşkil edir. Məhsullar bazarlardakından 20-30 faiz ucuz təklif olunur.
Yarmarkaya daxil olan bütün məhsulların sanitar-gigiyenik vəziyyəti Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən diqqətlə yoxlanılır.
Yarmarkada nəzarət tərəzisi qoyulmuş, bütün məhsulların bazarlarla müqayisəli qiymətləri göstərilmişdir.
Şənbə günü Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (12 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,4 ton) satışa Samux, Quba, Biləsuvar, Cəlilabad və Ağsu rayonlarından gətirilmiş, ümumilikdə, iki gün üçün 14,4 ton məhsul çıxarılmışdır. Sonrakı üç gündə isə “Günəş” ticarət mərkəzində (20,5), “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,5 ton), ümumilikdə 23 ton məhsulun satılması planlaşdırılır. Beş gün ərzində Suraxanı rayonu ərazisində, ümumilikdə, 37,4 ton məhsulun satılacaqdır.
Kənd Təsərrüfatı Nazirliyinin nümayəndəsi Mustafa Rüstəmov bildirdi ki, hər iki yarmarkada müxtəlif çərəzlər, meyvələrdən alma, armud, nar, heyva, tərəvəzlərdən pomidor, xiyar, göyərti, həmçinin mövsümi kənd nemətlərindən kartof, soğan, balqabaq və digər məhsulların alıcıları çoxluq təşkil edir. Qiymətlər bazarlarla müqayisədə 25-30 faiz ucuzdur.
Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Binəqədi rayonu, 6 nömrəli Bakı Texniki Peşə Liseyinin qarşısında 5 gün davam edəcək yarmarkaya, ümumilikdə, 45 tondan çox müxtəlif çeşiddə meyvə-tərəvəzlər, süd və bostan məhsulları çıxarılacaqdır.
Bayram ərəfəsində şəhər sakinləri burada daha həvəslə bazarlıq edirdilər.
Siyəzən, Goranboy, Bərdə, Ağstafa və digər rayonların fermerləri kartof, kələm, yerkökü, çuğundur, pomidor, alma, nar, qoz, fındıq və digər məhsulları bazardakından 20-30 faiz ucuz qiymətə satırdılar.
Kənd Təsərrüfatı Nazirliyinin nümayəndəsi Qadir Həsənov bildirdi ki, martın 15-də yarmarkaya 22,6 ton meyvə-tərəvəz, süd və bostan məhsulları gətirilmişdir.