CƏMİYYƏT
Bakıda sağlamlıq imkanları məhdud 100-dən çox uşağa səyyar formada reabilitasiya xidmətləri göstərilir
Bakı, 21 fevral, AZƏRTAC
Əmək və Əhalinin Sosial Müdafiəsi Nazirliyinin tabeliyində yaradılan Sosial Xidmətlər Agentliyinin ötən il başladığı xidmət çərçivəsində hazırda sağlamlıq imkanları məhdud 110 uşaq səyyar formada (evlərində) reabilitasiya xidmətləri ilə təmin olunur.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, onlar Daun sindromlu, uşaq serebral iflici, eşitmə məhdudiyyətli, hidrosefaliya, mikrosefaliya, sağ və sol yuxarı ətrafların inkişaf geriliyi olan 6 yaşadək uşaqlardır.
Agentliyin psixoloq, pedaqoq, sosial işçi və loqopedlərdən ibarət mütəxəssis qrupları həmin uşaqların yaşadıqları ünvanlara gedərək onları kompleks sosial-psixoloji və sosial-pedaqoji reabilitasiya xidmətləri ilə təmin edir.
Həmin uşaqlarda davranış pozuntuları, diqqət çatışmazlığı, hiperaktivlik, adaptasiya problemi və s. kimi halların reabilitasiyası üçün işlər aparılır.
Bu məqsədlə müxtəlif proqram və terapiyalardan, pedaqoji texnika və pediatrik reabilitasiya üsullarından istifadə olunur.
Valideynlər üçün maarifləndirici təlim və seminarlar, dəstək qrupları da təşkil edilir. Sağlamlıq imkanları məhdud 16 uşağın səyyar sosial reabilitasiyası kursu isə artıq uğurla başa çatıb.