REGİONLAR
Balakən ziyalısı: Azərbaycanın Qurtuluş günündən başlanan yüksəlişi bu gün də davam edir
Balakən, 10 iyun, Mustafa Dadaşov, AZƏRTAC
Tariximizə Milli Qurtuluş Günü kimi daxil olmuş 15 iyun sadəcə təqvim bayramı deyil, böyük ictimai, siyasi və tarixi əhəmiyyətə malik gündür. Bu tarixi yaradan isə Azərbaycanın inkişafı, müstəqilliyi və gələcəyində müstəsna rol oynayan, daim xalqına arxalanan, ona arxa və dayaq olan dahi şəxsiyyət - ümummilli lider Heydər Əliyevdir.
Bu fikirləri AZƏRTAC-ın bölgə müxbirinə müsahibəsində Balakən rayonunun ziyalısı, Əməkdar müəllim Cavanşir Alqayev deyib.
1993-cü ilin iyununda Azərbaycan dövlətçiliyinin dağılma təhlükəsi ilə üzləşdiyini, ölkənin vətəndaş müharibəsi və parçalanma həddinə çatdığını bildirən balakənli ziyalı həmin illəri belə xatırlayır: “Hakimiyyətdə olan AXC-Müsavat cütlüyünün səriştəsiz rəhbərliyi nəticəsində dövlətçiliyimiz üçün çox təhlükəli vəziyyət yaranmışdı. Ölkədə anarxiya, xaos, özbaşınalıq tüğyan edirdi, iqtisadiyyat çökmüşdü, əhalinin sosial durumu son dərəcə ağırlaşmışdı. Torpaqlarımızın işğalı, getdikcə gərginləşən siyasi vəziyyət, əhalinin sosial durumu ölkəni bu bəlalardan xilas edə, xalqı öz arxasınca apara biləcək liderə ehtiyac olduğunu şərtləndirirdi. Cəmiyyətin bütün təbəqələri əmin idi ki, ölkəni düşmüş bu ağır vəziyyətdən çıxarmağa qadir yeganə şəxsiyyət məhz Heydər Əliyevdir. Azərbaycan xalqı bu dahi şəxsiyyətin ətrafında sıx birləşməklə gələcək taleyini həll etmək istəyirdi”.
Cavanşir Alqayev bildirib ki, Heydər Əliyev 1993-cü ilin iyununda hakimiyyətə tarixi qayıdışı ilə xilaskarlıq missiyasını ləyaqətlə yerinə yetirdi: “Ulu Öndərin hakimiyyətə qayıdışı ilə Azərbaycanın dövlətçiliyində həlledici dönüş baş verdi. Onun qayıdışından sonra çox ağır vəziyyətdə olan Azərbaycanın qarşılaşdığı problemlər həll olunmağa başladı, ayrı-ayrı şəxslərə, siyasi qruplaşmalara xidmət edən silahlı birləşmələr ləğv edildi, cinayətkar ünsürlər cəmiyyətdən təcrid olundu. Ölkədə əmin-amanlıq, siyasi sabitlik yarandı. Azərbaycanın Qurtuluş günündən başlanan yüksəlişi bu gün də davam edir. Ölkəmizin iqtisadiyyatı güclənir, qüdrəti artır, siması yeniləşir. Ulu Öndərin qurduğu müstəqil, müasir Azərbaycan hazırda Prezident İlham Əliyevin rəhbərliyi altında qüdrətli, zəngin bir ölkəyə çevrilib”.