Tbilisi, 3 mart, AZƏRTAC

Azərbaycanın basketbol üzrə milli komandası Bakıda keçiriləcək ilk Avropa Oyunları ərəfəsində Gürcüstanda təlim-məşq toplanışı və bir neçə yoldaşlıq oyunu keçirib.

Martın 2-də Azərbaycan millisi Gürcüstan yığması ilə qarşılaşıb. Oyun 88:79 hesabı ilə millimizin xeyrinə başa çatıb.

Azərbaycan millisi keçirdiyi 6 yoldaşlıq oyunun hamısını qələbə ilə başa vurub.

Milli komandanın ikinci məşqçisi Tahir Baxşıyev AZƏRTAC-a müsahibəsində deyib: “Hazırda Azərbaycan çempionatında fasilədir. Biz bu fasilədən istifadə edərək Gürcüstanda təlim-məşq toplanışları keçirdik. Qonşu ölkədə olduğumuz müddətdə Gürcüstanın birinci liqa və super liqa komandaları ilə də oynadıq. Eyni zamanda, super liqanın iki komandası - “Olimpiya” və “Suxumi” komandaları ilə qarşılaşdıq. Sevindirici haldır ki, hər iki komandaya qalib gəldik. Ümumilikdə 6 oyun keçirmişik və hamısında qələbə qazanmışıq. İdmançılarımızın ümumi hazırlığı bizi qane edir”.

T.Baxşıyev bildirib ki, komanda Bakıda keçiriləcək ilk Avropa Oyunlarına da ciddi hazırlaşır: “Avropa Oyunlarında basketbol 3x3 üzrə yarışlar olacaq. Komandamızın iki üzvü - Fuad Niftəliyev və Amil Həmzəyev həmin yarışda iştirak edəcəklər. Onlar da burada təlim-məşq toplanışında oldular və hesab edirik ki, bu yarışlarda iştirak etməklə zəngin təcrübə qazandılar”.

Azərbaycan millisinin üzvü, ilk Avropa Oyunlarında basketbol yarışlarında iştirak edəcək idmançı Amil Həmzəyev deyib: “İlk Avropa Oyunlarında basketbol 3x3 yarışlarında iştirak edəcəyəm. Bu yarış bir az fərqlidir və açıq havada keçirilir. Havalar soyuq olduğu üçün zallarda məşq edirik. Gürcüstanda oyunlarımız bizim üçün çox səmərəli oldu. Bu təlim-məşq toplanışından sonra - aprelin əvvəllərindən basketbol 3x3 üzrə hazırlıqlara başlayacağıq. İnanıram ki, məşqlərimiz bizə qələbə qazanmağa imkan verəcək”.

Xətayi Əzizov

AZƏRTAC-ın xüsusi müxbiri

Tbilisi