Belarusda “Nar bayramı” qeyd edilib
Kiyev, 28 oktyabr, AZƏRTAC
Azərbaycanın Belarusdakı səfirliyinin və Maksim Tank adına Belarus Dövlət Pedaqoji Universitetinin nəzdində fəaliyyət göstərən Azərbaycan Dili və Mədəniyyəti Mərkəzinin birgə təşkilatçılığı ilə Universitetdə “Nar bayramı” adlı tədbir keçirilib.
Səfirlikdən AZƏRTAC-a bildiriblər ki, tədbirdə çıxış edən səfir Ülvi Baxşəliyev Prezident İlham Əliyevin təşəbbüsü ilə 2006-cı ildən Azərbaycanın Göyçay şəhərində ənənəvi olaraq hər il keçirilən “Nar bayramı” haqqında məlumat verib, ölkəmizin kənd təsərrüfatı sahəsində narçılığın əhəmiyyətindən bəhs edib.
Səfir əcdadlarımızın narın becərilməsi ilə bağlı ənənələrinin ədəbiyyatımızda, şeirlərimizdə və mahnılarımızda da öz əksini tapdığını vurğulayıb, “Nar bayramı, ənənəvi nar festivalı və mədəniyyəti”nin UNESCO-nun Bəşəriyyətin Qeyri-Maddi Mədəni İrsi üzrə Reprezentativ Siyahısına daxil edildiyini tədbir iştirakçılarının diqqətinə çatdırıb.
Sonra Belarus Dövlət Pedaqoji Universitetinin rektoru Aleksandr Juk çıxış edərək bütün sahələrdə olduğu kimi, Azərbaycan-Belarus əlaqələrinin humanitar sahədə də daim inkişaf etdiyini vurğulayıb. Bakı Slavyan Universiteti ilə əlaqələrin dərinləşdirilməsinin əhəmiyyətindən bəhs edən rektor Azərbaycan dili və mədəniyyəti mərkəzinin fəaliyyətinin bərpa olunmasının bu əlaqələrin inkişafına töhfə verəcəyinə əminliyini ifadə edib.
Ardınca Universitetin tələbələrinin ifasında nara həsr olunmuş şeirlər dinlənilib, Azərbaycanda “Nar bayramı” və narçılıq ənənələrini əks etdirən videoçarx nümayiş olunub.
Sonda Azərbaycan Dili və Mədəniyyəti Mərkəzinin direktoru Fuad İbrahimov Azərbaycanın zəngin mədəniyyətinin tərkib hissəsi olan “Nar bayramı” ilə tanış olmaq üçün yaradılan şəraitə görə Universitet rəhbərliyinə minnətdarlığını bildirib, Mərkəzin fəaliyyətinin universitetlərin elmi-pedaqoji fəaliyyətində mühüm əhəmiyyət kəsb edəcəyini vurğulayıb.
Tədbirin rəsmi hissəsindən sonra qonaqlar Azərbaycan milli mətbəxinin nümunələrindən ibarət süfrəyə dəvət olunub.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
