Paris, 18 oktyabr (AZƏRTAC). Mənzil qərargahı Amsterdamda yerləşən Benilüks Azərbaycanlılar Konqresinin (BAK) mətbuat xidmətindən AZƏRTAC-a bildirmişlər ki, qurum son günlər Moskvada baş verən hadisə ilə əlaqədar Rusiyada azərbaycanlıların sıxışdırılması ilə bağlı bəyanat qəbul etmişdir. Bəyanatda deyilir: Hamıya məlumdur ki, belə hadisələr dünyanın hər bir ölkəsində tez-tez baş verir. Əlbəttə, istənilən halda cinayət baş vermiş və ortada insan həyatına qəsd olunmuşdur və qatil mütləq cəzasını almalıdır. Amma belə hadisəsini Rusiyanın bəzi maraqlı dairələri milliləşdirməyə, Azərbaycan və rus xalqları arasında tarixi dostluğu pozmağa səy göstərmələri təəssüf hissi doğurur. Bütün qeyri-rus xalqlarına, o cümlədən azərbaycanlılara kəskin düşmənçilik münasibəti bəsləyən və dəfələrlə xalqımız barəsində xoşagəlməz ifadələr işlədən Y. Jirinovski azərbaycanlıların Rusiyadan deportasiya olunması üçün imzatoplama kampaniyasına rəhbərlik etməyə başlamış, qatı millətçi A. Novalinin hərəkətləri Rusiyada formalaşmaqda olan antisemitizm meyllərinin bariz nümunəsidir.

BAK mahiyyətindən asılı olmayaraq hər cür qətl hadisəsinə qarşıdır. Eyni zamanda, təşkilat Rusiyada bəzi qüvvələrin digər millətlərin nümayəndələrinə, o cümlədən azərbaycanlılara qarşı apardıqları kampaniyanı qətiyyətlə pisləyir və bildirir ki, dünyanın heç bir hüquqi dövlətində bir nəfərə görə bütün xalq günahlandırılmır və onlara qarşı diskriminasiya hərəkətlərinə əl atılmır.

Amerika və Avropanın müxtəlif ölkələrində ruslardan ibarət cinayətkar dəstələr mövcuddur və onlar fəaliyyət göstərdikləri dövlətlərdə onlarla insanı qətlə yetirirlər. Onların törətdikləri cinayətlərə görə heç kim rus xalqını günahkar hesab etmir və həmin ölkələrdə yaşayan digər ruslara qarşı hər hansı antisemitizm hərəkətlərə yol verilmir və onlar deportasiya olunmurlar.

Moskvanın Biryuzova ticarət mərkəzinə və Porkovka meyvə-tərəvəz bazarına skinhedlərin hücumları, Tverdə 100-dən artıq azərbaycanlının saxlanılması və həbs olunması, 27 yaşlı gənc Qaraxanlının məhz azərbaycanlı olduğu üçün qətlə yetirilməsi kimi faktlar Rusiya kimi böyük bir dövlətə baş ucalığı gətirmir.

BAK azərbaycanlılarla bağlı digər tarixi faktları diqqətə çatdırmağı özünə borc bilir. İkinci Dünya müharibəsində hərbi texnikanın 90 faizini yanacaqla təmin etmək üçün arxa cəbhədə gecəni gündüzə qatıb var gücləri ilə çalışmış və qələbənin əldə edilməsinə öz layiqli töhfələrini vermiş baba-nənələr, ata-analar bu gün deportasiyaya məruz qalanların valideynləri olmuşlar.

Böyük Vətən müharibəsi zamanı müxtəlif millətlərin nümayəndələri ilə birlikdə çiyin-çiyinə vuruşaraq rus torpaqlarını azad edən yüzlərlə azərbaycanlı Sovet İttifaqı Qəhrəmanı adına layiq görülmüşdür. General Həzi Aslanov, partizan hərəkatının qorxmaz döyüşçüsü “Mixaylo” ləqəbli Mehdi Hüseynzadə, Leninqrad səmasını faşist bombardmanından qoruyan mərd şahin Hüseynbala Əliyev, sinəsini düşmən pulemyotunun qarşısında sipər edərək yüzlərlə döyüşçü yoldaşlarının həyatını xilas edən, amma özü həlak olan Qafur Məmmədov və müharibənin gedişində fədakarlıq göstərən digər döyüşçülər Azərbaycan xalqının nümayəndələri idilər. Döyüş tarixinə şanlı salnamələr yazan 416-cı diviziya məhz azərbaycanlılardan təşkil olunmuşdu. On minlərlə azərbaycanlı müharibədə həlak olmuş, itkin düşmüş və yaralanmışdı. Bu tarixi faktlar heç vaxt yaddan çıxmamalıdır.

BAK digər bir mühüm faktı da diqqətə çatdırmağı lazım bilir. Bu yaxınlarda Niderland Krallığının inzibati mərkəzi Haaqada rus diplomatının qanun pozuntusuna görə saxlanılması Rusiyada böyük hay-küyə səbəb olmuşdu. Rəsmi Moskvanın təkidi ilə Niderlandın Xarici İşlər Nazirliyi Rusiyadan üzr istəmişdi. Buna qane olmayan Rusiya tərəfi həmin polisin həbs olunmasını tələb etmişdi. Amma görəsən Rusiya naməlum şəxslər tərəfində öz evində vəhşicəsinə döyülən niderlandlı diplomata görə Niderland dövlətindən üzr istəyəcək və cinayətkarı həbs edəcəkmi?

Benilüks Azərbaycanlıları Konqresi bütün bunları nəzərə alaraq Rusiyadakı bəzi qeyri-sağlam qüvvələrin millətçilik addımlarını qətiyyətlə pisləyir və bu məsələnin beynəlxalq gərginliyə səbəb olacağından narahatlığını vurğulayır. BAK baş verənləri Azərbaycan dövlətinə siyasi təzyiq kimi qiymətləndirir.

Əsgər Əliyev

AZƏRTAC-ın xüsusi müxbiri

Paris