BƏRDƏDƏ YENİ İSTEHSAL SAHƏSİ
Mayın 28-də Bərdə Qum-çınqıl Açıq Tipli Səhmdar Cəmiyyətinin yeni istehsal sahəsi istifadəyə verilmişdir.
Açılış mərasimində çıxış edənlər respublikamızın Prezidenti Heydər Əliyevin yerli və xarici iş adamları ilə keçirdiyi görüşlərin əhəmiyyətindən, dövlətimizin başçısının ölkə iqtisadiyyatının inkişafına göstərdiyi diqqət və qayğıdan söhbət açdılar.
Səhmdar Cəmiyyətin sədri İlham Ağayev yeni yaradılmış cəmiyyətin fəaliyyəti barədə ətraflı məlumat verdi. O bildirdi ki, əvvəllər Tərtərçay qum-çınqıl karxanası kimi fəaliyyət göstərən obyekt ötən ildən səhmdar cəmiyyətə çevrilmişdir. İndi burada dörd adda məhsul istehsal olunur. Həmin məhsullardan tikinti sahələrində əvəzsiz xammal kimi istifadə edilir. Yeni texnika və texnologiyanın tətbiqi, müasir avadanlığın quraşdırılması nəticəsində Bərdə qum-çınqıl karxanasının istehsal gücü ötən illərə nisbətən 4-5 dəfə artmışdır.
Səhmdar cəmiyyət respublikamızda doğranmış daşa olan böyük tələbatı nəzərə alaraq, yeni istehsal sahəsi yaratmış, burada müasir tələblərə cavab verən avadanlıq quraşdırılmışdır. Karxananın illik istehsal gücü 360 min kubmetrə çatdırılmışdır.
Yeni istehsal sahəsinin açılışını bildirən lent kəsilmiş, daş doğrayan aqreqatlar işə düşmüşdür.
Bölmənin digər xəbərləri
