İDMAN
Beynəlxalq Güləş Federasiyası tərəfindən yeni çəki dərəcələri müəyyənləşdirilmişdir
Bakı, 18 yanvar (AZƏRTAC). Beynəlxalq Güləş Federasiyası (FİLA) tərəfindən yeni çəki dərəcələri müəyyənləşdirilmişdir.
Bu barədə AZƏRTAC-a müsahibəsində Azərbaycan Güləş Federasiyasının baş katibi, Olimpiya dərəcəli hakim Əjdər Cəvərov demişdir.
Bildirmişdir ki, 2014-cü ilin yanvarından etibarən FİLA-nın təqvim planı üzrə bütün yarışlar dəyişilmiş çəki dərəcələri üzrə təşkil olunacaqdır. Sərbəst güləş üzrə yarışlar 57, 61, 65, 70, 74, 86, 97, 125 kiloqram, yunan-Roma güləşi üzrə 59, 66, 71, 75, 80, 85, 98, 130 kiloqram, qadın güləşi üzrə isə 48, 53, 55, 58, 60, 63, 69 və 75 kiloqram çəki dərəcələri üzrə keçiriləcəkdir.
Baş katib qeyd etmişdir ki, 2016-cı ildə Braziliyanın Rio de Janeyro şəhərində keçiriləcək Yay Olimpiya Oyunlarında isə güləşçilər 6 çəki dərəcəsində mübarizə aparacaqlar. Sərbəst güləşçilər 57, 65, 74, 86, 97, 125 kiloqram, yunan-Roma güləşi üzrə 59, 66, 75, 85, 98, 130 kiloqram, qadın güləşi üzrə isə 48, 53, 58, 63, 69, 75 kiloqram çəki dərəcələri üzrə yarışacaqlar.
Vurğulanmışdır ki, güləş qaydalarında da bəzi dəyişikliklər olmuşdur. Texniki qələbə üçün sərbəst güləşdə 10 xal, yunan-Roma güləşində isə 8 xal fərqinə nail olmaq lazımdır. Sərbəst güləşçilər hər aşırma fəndinə görə 4 xal qazanacaqlar. Yunan-Roma güləşində rəqibi aşırma və nəzarətdə saxlama fəndinə görə 4 xal, rəqibə effektli fənd tətbiq etməyə görə 5 xal veriləcəkdir. Ardıcıl iki 3 xallıq və bir 5 xallıq fənd görüşün başa çatması ilə nəticələnəcəkdir. Yunan-Roma güləşində hesab 0:0 olarsa, sonuncu xəbərdarlıq alana məğlubiyyət veriləcəkdir.
Bildirmişdir ki, ölkəmizdəki klub və cəmiyyətlərdə fəaliyyət göstərən güləş üzrə məşqçi müəllimlər üçün respublika seminarları keçirilmişdir. Məqsəd FİLA tərəfindən güləş qaydalarında və çəki dərəcələrində edilən dəyişikliklər barədə yerli məşqçi və mütəxəssisləri məlumatlandırmaq, son yarışlardan videogörüntülər izlənilməklə qaydaları izah etmək, güləşçilərin hazırlığı üçün müasir məşq metodları barədə nəzəri və praktiki bilikləri paylaşmaqdan ibarət olmuşdur.