BİLL KLİNTONUN KİTABI ÇAPDAN ÇIXACAQDIR
AZƏRTAC xarici agentliklərə istinadla xəbər verir ki, ABŞ-ın sabiq prezidenti Bill Klintonun “Fədakarlıq bacarığı, yaxud hər birimiz dünyanı necə dəyişə bilər” adlı yeni kitabı sentyabrın 4-də 750 min nüsxə tirajla çapdan çıxacaqdır. Bu barədə Nyu-Yorkun “Alfred Hopf” nəşriyyat evi məlumat vermişdir.
ABŞ-ın 42-ci prezidentinin nəşriyyat evi tərəfindən yayılmış bəyanatında deyilir: “Xeyriyyə fondumun Afrikada və bütün dünyada fəaliyyəti timsalında mən bu kitabımda imkanım daxilində göstərməyə çalışmışam ki, sizin hər bir köməyinizin böyük müsbət nəticəsi ola bilər. Mən əmin oldum ki, imkanından, asudə vaxtından, yaşından və bacarığından asılı olmayaraq, hər bir adam başqaları üçün nəsə edə və bu, ümumbəşəri evimizi möhkəmləndirə bilər”.
Naşir A.Nopf demişdir ki, kitabdan götürülən gəlir dünyanı dəyişmək prosesinə öz töhfəsini verən xeyriyyə fondlarının hesablarına daxil olacaqdır.
Bəzi məlumatlara görə, “Alfred Nopf” nəşriyyat evinin Bill Klintonun üç il əvvəl çapdan buraxdığı “Mənim həyatım” adlı xatirələr kitabı müəllifinə 10-12 milyon dollar qonorar gətirmiş, kitabın ümumi tirajı isə 2 milyon nüsxəni ötmüşdür.
Bölmənin digər xəbərləri
