BİNƏZİR BHUTTONUN VƏKİLLƏRİ İNTERPOLLA DANIŞIQLAR APARIRLAR

30.01.2006 [16:31]
Çap et
A⁺ A^-

AZƏRTAC-ın İTAR-TASS Agentliyindən aldığı xəbərə görə, Pakistanın sabiq Baş naziri Binəzir Bhuttonun vəkilləri onun beynəlxalq axtarışına son qoymaq məqsədi ilə İnterpolla danışıqlar aparırlar. Bunu Pakistan hökumətinin sabiq başçısı, hazırda isə Pakistanın müxalif Xalq Partiyasının sədri yanvarın 29-da Si-En-En telekanalına müsahibəsində bildirmişdir.

Bundan əvvəl İnterpol Pakistan hökumətinin sorğusu ilə Binəzir Bhuttonun və onun həyat yoldaşı Asif Əli Zərdarinin axtarışını elan etmişdi. Onlar korrupsiya və maliyyə fırıldaqlarında təqsirləndirilirlər.

1990-cı illərdə iki dəfə hökumət başçısı vəzifəsini tutan Bhutto əmindir ki, Pakistanın hazırkı hakimiyyət orqanları onun İnterpol vasitəsilə axtarışını elan etməklə, sadəcə, ABŞ-a səfərini pozmaq məqsədi güdürlər. Xanım Bhutto hazırda Amerika paytaxtındadır. O bildirmişdir ki, istənilən halda, 2007-ci ildə keçiriləcək növbəti seçkilərədək vətənə qayıtmağı planlaşdırır.

Xatırladaq ki, Bhutto 1999-cu ildən xaricdə - Böyük Britaniyada, Birləşmiş Ərəb Əmirliklərində sürgün həyatı yaşayır.