BİRGƏ BƏYANNAMƏ
Bundan sonra “Tərəflər” adlanan Qazaxıstan Respublikası və Azərbaycan Respublikası,
Qazaxıstan Respublikası ilə Azərbaycan Respublikası arasında ənənəvi dostluq münasibətlərini və hərtərəfli münasibətləri inkişaf etdirmək əzmində olduqlarını ifadə edərək,
Qazaxıstan ilə Azərbaycan arasındakı əməkdaşlığın Avrasiyada sülhün və sabitliyin möhkəmlənməsinə kömək etdiyini vurğulayaraq,
2005-ci il mayın 24-də imzalanmış Qazaxıstan Respublikası ilə Azərbaycan Respublikası arasında strateji tərəfdaşlıq və müttəfiqlik münasibətləri haqqında müqavilənin əhəmiyyətini nəzərə alaraq,
İkitərəfli siyasi dialoqun və beynəlxalq və regional təşkilatlar çərçivəsində əməkdaşlığın əhəmiyyətini vurğulayaraq,
Qarşılıqlı maraq doğuran aktual beynəlxalq və regional məsələlərə dair oxşar mövqeləri bölüşərək,
Qlobal enerji təhlükəsizliyinin təmin olunmasında iki ölkənin mühüm rolunu nəzərə alaraq,
İki dövlətin mövcud potensialına uyğun olaraq siyasi, ticarət-iqtisadi, humanitar və mədəni əlaqələri möhkəmləndirməyin zəruriliyini qeyd edərək,
aşağıdakıları bəyan etmişlər:
İki ölkə arasında strateji tərəfdaşlıq münasibətlərini dərinləşdirmək məqsədi ilə Tərəflər dialoqun davam etdirilməsinin və hökumətlər, parlamentlər və vətəndaş cəmiyyətləri səviyyəsində mübadilələrin genişləndirilməsinin mühüm əhəmiyyətini qeyd edirlər.
Tərəflər qanunun aliliyi, demokratiya, insan hüquqlarının müdafiəsi və bazar iqtisadiyyatı prinsipləri əsasında ikitərəfli münasibətləri möhkəmləndirmək əzmində olduqlarını vurğulayırlar.
Tərəflər iki ölkə arasında ticarət-iqtisadi, elmi-texniki, mədəni və humanitar əməkdaşlığı genişləndirmək səylərində qətiyyətlidirlər.
Tərəflər iqtisadi əməkdaşlıq üzrə hökumətlərarası komissiyanın fəaliyyətini ikitərəfli iqtisadi münasibətlərin inkişafı üçün mühüm əlaqələndirici mexanizm və əldə olunmuş razılaşmaların həyata keçirilməsinin səmərəli vasitəsi hesab edirlər.
Tərəflər energetika sahəsində və yüngül sənayedə, habelə qeyri-neft sektorunun digər sahələrində iki ölkənin müəssisələri arasında qarşılıqlı surətdə faydalı əməkdaşlığı təşviq etməyə hazırdırlar.
Avropa-Qafqaz-Asiya nəqliyyat dəhlizinin bir hissəsi olan Bakı-Tbilisi-Ceyhan boru kəmərinin istismara verilməsinin əhəmiyyətini vurğulayaraq, Tərəflər əmin olduqlarını bildirmişlər ki, onlar qlobal enerji təhlükəsizliyinə töhfə verəcək və region ölkələrinin sabit iqtisadi inkişafına xidmət edəcəklər.
Tərəflər Şərq-Qərb nəqliyyat dəhlizinin uğurla fəaliyyət göstərməsində, Xəzər dənizi vasitəsilə birgə nəqliyyat və enerji layihələrinin reallaşdırılmasında qarşılıqlı fəaliyyətin, Qazaxıstan mallarının Azərbaycan ərazisi vasitəsilə və Azərbaycan mallarının Qazaxıstan ərazisi vasitəsilə fasiləsiz tranzitinin təmin edilməsinin, əlverişli qarşılıqlı sərmayə mühiti formalaşdırılmasının əhəmiyyətini təsdiq edirlər.
Tərəflər Avropa ilə Asiya arasında nəqliyyat-kommunikasiya əlaqələrinin inkişaf etdirilməsini və yük daşımalarının genişləndirilməsini regional əməkdaşlığın prioritet vəzifəsi hesab edirlər.
BMT Təhlükəsizlik Şurasının müvafiq qətnamələrini, ATƏT-in Lissabon zirvə görüşünün üç prinsipini bütünlüklə dəstəkləyərək, Tərəflər Ermənistan-Azərbaycan, Dağlıq Qarabağ münaqişəsinin beynəlxalq hüququn hamılıqla qəbul edilmiş prinsipləri və normaları, dövlətlərin suverenliyi, ərazi bütövlüyü və sərhədlərinin toxunulmazlığı əsasında dinc vasitələrlə həll edilməsinin vacibliyini qeyd edirlər.
Tərəflər Ermənistan-Azərbaycan, Dağlıq Qarabağ münaqişəsinin tezliklə sülh yolu ilə həlli məqsədi ilə ATƏT-in Minsk qrupu tərəfindən səmərəli və qətiyyətli tədbirlər görülməsinin mühümlüyünü vurğulayırlar.
Tərəflər beynəlxalq təhlükəsizliyə və sabitliyə qorxu törədən hədələri, o cümlədən beynəlxalq terrorizmi, ekstremizmin bütün formalarını, narkotik vasitələrin, psixotrop maddələrin və onların prekursorlarının gizli yolla dövriyyəsini, transmilli mütəşəkkil cinayətkarlığı, qanunsuz silah və insan alverini, kütləvi qırğın silahının yayılmasını pisləyir və onlara qarşı mübarizədə beynəlxalq səylərin birləşdirilməsinin zəruriliyinə tərəfdardırlar.
Tərəflər BMT və onun ixtisaslaşdırılmış strukturları çərçivəsində, habelə müxtəlif beynəlxalq və regional təşkilatlarda əməkdaşlığı davam etdirmək niyyətlərini təsdiqləyir və beynəlxalq münaqişələrin həllində BMT-nin rolunun gücləndirilməsinin vacibliyini qeyd edirlər.
Tərəflər Xəzər regionunun sülh, sabitlik, mehriban qonşuluq və əməkdaşlıq zonasına çevrilməsinə hərtərəfli kömək göstərəcəklər.
Tərəflər Xəzər dənizinin dibinin bölünməsi haqqında Azərbaycan, Qazaxıstan və Rusiya arasında imzalanmış ikitərəfli və çoxtərəfli sazişlərə xüsusi əhəmiyyət verir və onları Xəzər dənizinin hüquqi statusunun müəyyənləşdirilməsi prosesinə fundamental töhfə hesab edir və bu istiqamətdə birgə səyləri davam etdirməyə sadiq olduqlarını bəyan edirlər.
Tərəflər Xəzər dənizinin hüquqi statusunun müəyyənləşdirilməsinə dair danışıqlar çərçivəsində konstruktiv dialoqun zəruri olduğunu bildirirlər. Bu baxımdan Tərəflər Xəzəryanı dövlətlərin xarici işlər nazirlərinin müavinləri çərçivəsində Xüsusi işçi qrupunun fəaliyyətini müsbət qiymətləndirirlər.
Ali və yüksək səviyyələrdə görüşlərin müsbət rolunu məmnunluqla vurğulayan Tərəflər regional və qlobal təhlükəsizliyin möhkəmləndirilməsinə yönəldilmiş siyasi və iqtisadi məsləhətləşmələrin, dialoqların keçirilməsini, qarşılıqlı maraq doğuran bütün başqa məsələlərə dair fikir mübadiləsini bundan sonra da dəstəkləyəcəklər.
Tərəflər əmin olduqlarını bildirmişlər ki, bu Birgə Bəyannamə Qazaxıstan Respublikası ilə Azərbaycan Respublikası arasında münasibətlərin intensivləşməsinə və hərtərəfli inkişafına xidmət edəcəkdir.
Astana, 7 avqust 2007-ci il.
Bölmənin digər xəbərləri
