Azərbaycan Respublikası Prezidenti və Polşa Respublikası Prezidenti

Beynəlxalq məsələlərdə əməkdaşlıq da daxil olmaqla, Azərbaycan və Polşa arasında ümumi maraq kəsb edən sahələrdə ikitərəfli əlaqələr və əməkdaşlığın vəziyyəti və inkişaf istiqamətləri barədə faydalı fikir mübadiləsinə istinad edərək,

İki ölkə arasında dostluq əlaqələrinin və əməkdaşlığın daha da inkişafı və genişləndirilməsi üçün Azərbaycan Respublikası Prezidentinin hazırkı səfərinin vacibliyini, o cümlədən iki dövlətin rəsmiləri arasında gələcək yüksək səviyyəli görüşlərin əhəmiyyətini vurğulayaraq,

Hər iki ölkə beynəlxalq aləmdəki mühüm məsələlərlə bağlı oxşar və ya çox yaxın mövqelərinin olması faktı və strateji tərəfdaşlıq və hərtərəfli əməkdaşlıq üçün aralarındakı ikitərəfli əlaqələri bərabərlik, qarşılıqlı etimad və anlaşma əsasında inkişaf etdirmək zərurəti mövqeyindən çıxış etdiklərini vurğulayaraq,

Beynəlxalq hüququn ümumtanınmış normalarına, o cümlədən Birləşmiş Millətlər Təşkilatının Nizamnaməsində əks olunmuş məqsəd və prinsiplərə sadiqliklərini təsdiq edərək,

Münaqişələrin dövlətlərin suverenliyi, ərazi bütövlüyü və sərhədlərinin toxunulmazlığına hörmət və riayət əsasında, BMT Nizamnaməsinə uyğun olaraq, sülh yolu ilə həllini dəstəklədiklərini qeyd edərək,

Hər iki Tərəfin siyasi, iqtisadi, mədəni, elmi və humanitar əməkdaşlıq, o cümlədən qarşılıqlı səmərə verə biləcək digər sahələrdə faydalı əlaqələri inkişaf etdirməyə mövcud potensial və hazırlıqlarını məmnuniyyətlə qeyd edərək,

Ümumi iqtisadi əməkdaşlığı dərinləşdirmək və genişləndirməyin ən mühüm komponenti kimi Azərbaycan-Polşa ticarət mübadiləsinin genişləndirilməsi və diversifikasiya edilməsinin əhəmiyyətini xüsusilə vurğulayaraq,

Enerji resurslarının beynəlxalq bazarlara etibarlı çıxışını təmin etmək və enerji əməkdaşlığını təşviq etməkdə güclü, qarşılıqlı maraqlara malik olaraq,

aşağıdakıları bəyan edirlər:

1. Tərəflər strateji tərəfdaşlığı möhkəmləndirmək məqsədilə qarşılıqlı maraq doğuran siyasi və iqtisadi məsələlər üzrə məsləhətləşmələrin həyata keçirilməsi, regional və qlobal təhlükəsizliyin gücləndirilməsi üzrə dialoq və qarşılıqlı maraq doğuran digər məsələlərə dair fikir mübadiləsi aparmaq barədə hazırlıqlarını təsdiqlədilər. Tərəflər əlaqələrini qanunun aliliyi, demokratiya, insan hüquqları və bazar iqtisadiyyatı kimi dəyərlər əsasında inkişaf etdirmək öhdəliklərini qeyd edirlər.

2. Tərəflər BMT, ATƏT, GUAM və digər beynəlxalq təşkilatlar çərçivəsində əməkdaşlıqlarının səmərəliliyini artırmaq istiqamətində səylərini davam etdirəcəklər.

3. Avropada təhlükəsizliyin təmin edilməsinin əhəmiyyətini vurğulayaraq və beynəlxalq səviyyədə tanınmış sərhədlərin güc yolu ilə dəyişdirilməsinin qəbul edilməzliyinə dair mövqelərini təsdiq edərək, Tərəflər qeyd etdilər ki, beynəlxalq birliyin, o cümlədən Avropa dövlətlərinin beynəlxalq sülh və təhlükəsizliyə, dövlətlərin suverenliyi və ərazi bütövlüyünə təhlükə törədən təcavüz aktlarına qarşı səylərinin birləşdirilməsi qlobal təhlükəsizliyin təmin edilməsinin mühüm amilidir.

4. Tərəflər Dağlıq Qarabağ münaqişəsinin BMT Təhlükəsizlik Şurasının müvafiq qətnamələri və ATƏT-in Lissabon Sammitinin üç prinsipinə uyğun olaraq, Azərbaycan Respublikasının suverenliyi, ərazi bütövlüyü və sərhədlərinin toxunulmazlığına hörmət əsasında sülh yolu ilə həllinin əhəmiyyətini vurğuladılar.

5. Tərəflər sülh əməliyyatları, silahlı qüvvələrə demokratik nəzarət, müdafiə və təhlükəsizlik sektorunda islahatlar sahəsində əməkdaşlığı genişləndirmək məqsədilə, Avratlantika Tərəfdaşlıq Şurası və NATO-nun Sülh Naminə Tərəfdaşlıq Proqramı çərçivəsində sıx əməkdaşlığı dəstəklədiklərini ifadə etdilər.

6. Tərəflər Azərbaycanın Avropa təsisatlarına inteqrasiyasının inkişafı baxımından Avropa Qonşuluq Siyasətinin həyata keçirilməsinin, Avropa İttifaqı və Azərbaycan arasında Fəaliyyət Planının qəbul edilməsinin əhəmiyyətini qeyd etdilər və iki dövlət arasında bu sahədə fəal əməkdaşlığı dəstəklədilər. Bu kontekstdə, Tərəflər 2007-ci il 1 mart tarixində Bakı şəhərində imzalanmış “Azərbaycan Respublikası Xarici İşlər Nazirliyi və Polşa Respublikası Xarici İşlər Nazirliyi arasında Avropaya inteqrasiya üçün 2007-2008-ci illərdə əməkdaşlıq haqqında Memorandumu”n əhəmiyyətini vurğuladılar və bu sənədin həyata keçirilməsi istiqamətində növbəti addımların atılması niyyətlərini ifadə etdilər.

7. Tərəflər ikitərəfli əlaqələrin və regional sabitliyin genişləndirilməsi üçün regional əməkdaşlığın əhəmiyyətini vurğuladılar. Bu kontekstdə, onlar Polşa-GUAM tərəfdaşlığını alqışladılar və “V4+” mexanizmləri vasitəsilə Azərbaycan və Vişeqrad qrupu arasında sıx əməkdaşlığın əhəmiyyətini vurğuladılar.

8. Polşa tərəfi Azərbaycan Respublikası tərəfindən həyata keçirilən iqtisadi islahatların əhəmiyyətini vurğulayaraq, onun DTT-yə üzv olmaq niyyətini dəstəkləyir və Azərbaycanın DTT ilə danışıqlar prosesində texniki yardım göstərməyə hazır olduğunu ifadə etdi.

9. Tərəflər Avropa enerji təhlükəsizliyinin əhəmiyyətini vurğuladılar və bununla əlaqədar, Avropanın enerji tələbatının təmin edilməsində Xəzər dənizi regionunun enerji ehtiyatlarının artan rolunu xüsusilə qeyd etdilər. Bu kontekstdə, Tərəflər Bakı-Tbilisi-Ceyhan və Bakı-Tbilisi-Ərzurum neft və qaz kəmərlərinin həyata keçirilməsinin strateji əhəmiyyətini qeyd edərək, Xəzər neftinin Avropa və dünya bazarlarına tranziti üçün dəhliz layihəsinə öz (Odessa-Brodı-Plotsk-Qdansk) dəstəklərini ifadə etdilər. Tərəflər yeni enerji layihələrini həyata keçirəcəklərini, xüsusilə Xəzər dənizindən Azərbaycan Respublikası, Gürcüstan, Ukrayna və Polşa Respublikası vasitəsilə Avropa və beynəlxalq bazarlara nəqliyyat sistemi imkanlarını araşdıraraq yeni Sarmatia konsorsiumunun yaradılmasını məmnuniyyətlə qeyd edirlər. Bu baxımdan Tərəflər cari ilin may ayında Kiyev şəhərində keçiriləcək növbəti Enerji Sammitinin əhəmiyyətini vurğuladılar.

10. Tərəflər tranzit azadlığı və qeyri-ayrıseçkilik prinsipləri əsasında Azərbaycan Respublikasında və Xəzər dənizi regionunda hasil olunan təbii qazın müvafiq ölkələr vasitəsilə Avropa istehlakçılarına məhdudlaşdırılmayan və iqtisadi cəhətdən cəlbedici tranzitinin təmin edilməsi üzrə əməkdaşlıq edəcəklər.

11. Tərəflər Avropa-Qafqaz-Asiya nəqliyyat dəhlizini inkişaf etdirmək üçün bütün nəqliyyat vasitələri sahəsində ikitərəfli və regional səviyyədə əməkdaşlığın gücləndirilməsi zərurətini dəstəkləyirlər. Tərəflər Cənubi Qafqazı Mərkəzi və Şərqi Avropa regionları ilə birləşdirən Şərq-Qərb dəhlizinin elementini təşkil edən infrastruktur layihələrinin inkişafının əhəmiyyətini qeyd etdilər.

12. Tərəflər enerji təhlükəsizliyinin təmin edilməsinin təxirəsalınmaz zərurətini etiraf edərək və ətraf mühitin mühafizəsini ən vacib tapşırıq kimi nəzərdən keçirərək, BMT-nin bütün üzv dövlətlərini qlobal istiləşmənin və onun bəşəriyyətə vura biləcəyi zərərli fəsadların azaldılması istiqamətində birgə səy göstərməyə çağırırlar. Bununla əlaqədar, Tərəflər bütün dövlətlərin, azad bazar şərtləri əsasında, enerji resurslarına sərbəst çıxışının zəruriliyini bir daha təsdiq etdilər.

13. Tərəflər hərbi və hərbi-texnoloji sahələrdə əməkdaşlıq edəcək və hər iki dövlətin müvafiq qurumları arasında əlaqələrin inkişaf etdirilməsinə yardım edəcəklər.

14. Tərəflər hər iki dövlət arasında ticarətin həcmi və iqtisadi əməkdaşlığın səviyyəsinin iqtisadiyyatlarının imkanlarına və potensialına uyğun şəkildə artırılması və sərmayələrin təşviqi də daxil olmaqla, hər növ biznes fəaliyyəti üçün əlverişli hüquqi, institusional və digər şəraitin təmin edilməsi barədə əlavə tədbirlər görəcəklər.

15. Tərəflər təhsil, mədəni, texnoloji və elmi sahələrdə əlaqələrin inkişafını müvafiq qurumlar arasında birbaşa əməkdaşlığı, böyük universitet əməkdaşlığını, daha çox tələbə və məktəbli mübadiləsi proqramlarını və bu sahələrdə digər birgə layihələri həyata keçirməklə həvəsləndirəcəklər.

Varşava, 26 fevral 2008-ci il