BİRGƏ MƏTBUAT KONFRANSI
AZƏRTAC-ın xüsusi müxbiri xəbər verir ki, aprelin 23-də Seulda, “Çonqvade” sarayında sənədlərin imzalanma mərasimi başa çatdıqdan sonra Azərbaycan Respublikasının Prezidenti İlham Əliyev və Koreya Respublikasının Prezidenti Ro Mu Hyun birgə mətbuat konfransı keçirmişlər.
Dövlət başçıları bəyanatlarla çıxış etdilər.
Koreya Prezidenti Ro Mu Hyun Azərbaycan ilə fəal əməkdaşlığa üstünlük verdiklərini, iqtisadi sahədə əlaqələrin daha da genişləndirilməsinə, yeni texnologiyaların tətbiqi sahəsində əlaqələrin dərinləşdirilməsinə böyük maraq göstərdiklərini bildirdi. O dedi ki, beynəlxalq təşkilatlar çərçivəsində əməkdaşlıq yüksək səviyyədədir və bütün məsələlərdə Azərbaycanın tutduğu mövqeyi dəstəkləyirik. İqtisadi dirçəliş dövrünü yaşayan Azərbaycanda qeyri-neft sektorunda, o cümlədən nəqliyyat, kənd təsərrüfatı, energetika, informasiya texnologiyaları, humanitar və digər sahələrdə birgə layihələr həyata keçiririk.
Azərbaycan Prezidenti İlham Əliyev bəyanatında Cənubi Koreyaya dövlət səfərinin yüksək səviyyədə keçdiyini söylədi. Göstərilən qonaqpərvərliyə görə minnətdarlığını bildirən dövlətimizin başçısı imzalanan birgə bəyannamədə iqtisadi, siyasi, mədəni və digər sahələrdə əməkdaşlıq haqqında müddəaların əks olunduğunu xatırlatdı. Prezident İlham Əliyev Ermənistan-Azərbaycan, Dağlıq Qarabağ münaqişəsinin ədalətli həllində tutduğu mövqeyə görə Koreya Respublikasının Prezidentinə təşəkkürünü bildirdi və Azərbaycanın bu münaqişənin beynəlxalq hüquq normaları əsasında, ölkəmizin ərazi bütövlüyü çərçivəsində sülh yolu ilə həllinə tərəfdar olduğunu vurğuladı. Dövlətimizin başçısı iqtisadiyyatın inkişafında ölkəmizin əldə etdiyi uğurlardan, həyata keçirilən beynəlxalq enerji layihələrindən, infrastruktur proqramlarından, Azərbaycanda xarici sərmayədarlara yaradılan əlverişli şəraitdən və digər məsələlərdən bəhs etdi.
Sonra prezidentlər jurnalistlərin suallarına cavab verdilər.
Prezident İlham Əliyev enerji, informasiya texnologiyaları, infrastruktur sahəsində və digər layihələrdə Cənubi Koreyanın iş adamlarının iştirak edə bilməsi üçün Azərbaycanda hər cür şəraitin olduğunu vurğuladı və hər iki ölkənin iş adamlarının iştirakı ilə keçiriləcək biznes forumda konkret layihələrin müəyyənləşdiriləcəyini söylədi. Dövlətimizin başçısı Azərbaycanın neft və qaz sektoru barədə də geniş məlumat verdi.
Mətbuat konfransında ölkələrimiz arasında bütün sahələrdə əlaqələrin daha da genişləndirilməsinin zəruriliyi vurğulandı. İqtisadi cəhətdən dünyanın inkişaf etmiş ölkələrindən biri kimi, Cənubi Koreyanın hazırda iqtisadi inkişaf sürətinə görə dünyada lider olan Azərbaycanla yaxın perspektivdə konkret layihələrin həyata keçirilməsində əməkdaşlığından söhbət açıldı. Müasir texnologiyalara malik Koreya Respublikasının yüksək texnologiyaların tətbiqinin genişləndirilməsinə xüsusi əhəmiyyət verən Azərbaycanla bu sahədə əməkdaşlığının perspektivlərindən danışıldı və imzalanan sənədlər üzrə konkret işlərin görüləcəyi bildirildi.
Koreya Respublikasının Prezidenti Xəzər dənizinin Azərbaycan sektorunda yerləşən “İnam” yatağına maraq göstərdiklərini bildirdi və bununla bağlı danışıqların aparıldığını xatırlatdı. O bildirdi ki, Azərbaycanla ikitərəfli əlaqələrin daha da genişləndirilməsi üçün hökumət işçi qrupu yaratmışdır.
Prezident İlham Əliyev Azərbaycanın Koreya şirkətləri ilə əməkdaşlığa maraq göstərdiyini, gələcəkdə, əsasən energetika, nəqliyyat, kənd təsərrüfatı, informasiya texnologiyaları sahəsində əməkdaşlığın genişləndirilməsinə hazır olduğunu bildirdi. Dövlətimizin başçısı “İnam” yatağı ilə əlaqədar dedi ki, hazırda danışıqlar gedir və yəqin ki, müsbət nəticələr əldə olunacaqdır.
X X X
Mətbuat konfransı başa çatdıqdan sonra, Prezident Ro Mu Hyun Azərbaycan Prezidenti İlham Əliyevi Prezident sarayının qarşısında böyük hörmət və ehtiramla yola saldı.
Bölmənin digər xəbərləri
