Bakı, 1 avqust (AZƏRTAC). Birləşmiş Ərəb Əmirliklərinin Abu-Dabi turizm və mədəniyyət idarəsinin “Asfaar” jurnalında Azərbaycanın, xüsusən də paytaxt Bakının turizm imkanlarından bəhs edən “Gözü qamaşdıran təbii oazis və Şərqlə Qərbin kəsişdiyi yer: Bakı... tarix ilə nəfəs alan və sakitlikdən danışan şəhər” sərlövhəli məqalə dərc olunmuşdur.

Azərbaycanın Birləşmiş Ərəb Əmirliklərindəki səfirliyindən AZƏRTAC-a bildirmişlər ki, yazıda ölkəmizə səyahət etmək istəyən turistlər üçün respublikamızın, xüsusən də Bakının görməli yerləri ilə bağlı maraqlı məlumatlar yer almışdır. Məqalədə İslam ölkələrinin ən gözəl ölkələrindən olan, Şərqlə Qərbin kəsişməsində yerləşən Azərbaycanın cazibədar ölkə olduğu diqqətə çatdırılmışdır.

Bildirilmişdir ki, Bakı şəhəri özünəməxsus memarlığı ilə seçilir. Burada qədim binalarla yanaşı, ən müasir memarlıq üslubu ilə inşa edilmiş tikililər, beşulduzlu otellər və möhtəşəm qüllələr vardır. Burada hər addımbaşı əzəməti ilə diqqəti cəlb edən binalara və teatrlara, geniş küçələrə, metro stansiyalarının girişlərinə, yaraşıqlı parklara rast gəlmək mümkündür. Bakının çoxlu millətlərin nümayəndələrini birləşdirən, möhtəşəm abidələrinin üzərində islam əlamətləri olan qədim tarixi vardır. Tolerantlığın hökm sürdüyü şəhər dinindən, irqindən, millətindən asılı olmayaraq xarici turistlərin üzünə qapılarını təbəssümlə açır.

Vurğulanmışdır ki, Azərbaycan mədəniyyətini kəşf etmək üçün Bakıya dünyanın hər yerindən turistlər gəlir. Çünki burada türk, rus, ərəb və Azərbaycan mədəniyyəti bir-birinə qarışmışdır. Burada çoxsaylı restoran, kafe və qədim binaları olan tarixi dar küçələr vardır. Gözəl arxitekturaya malik olan bu yerlər əzəməti, təmizliyi və xidmətlərinin çoxluğu ilə seçilir.

Yazıda diqqətə çatdırılmışdır ki, iki min il əvvəl inşa edilən və hazırda Bakının rəmzi sayılan Qız qalası hər zaman turistlərin üzünə açıqdır. Qalanın yuxarısından Xəzər dənizini, Hökumət evinin binasını, müxtəlif parkları və şəhərin digər gözəlliklərini seyr etmək mümkündür. Qalanın ətrafında yerli xalça və suvenir mağazaları yerləşir. Azərbaycan xalçasının tarixi qədim zamanlara söykənir, Çünki Azərbaycan xalçaçılıq üzrə Şərqin ən məşhur mərkəzlərindən biri sayılır və keçmişdə olduğu kimi, indiyə qədər xalçaçılıqda milli ənənələri və ornamentləri qoruyub saxlaya bilmişdir.

Müəllif vurğulamışdır ki, Azərbaycan, xüsusən də Bakı şəhəri, ailəvi turizmi sevənlər üçün olduqca münasib yerdir. Çünki burada ailə üzvləri ilə birlikdə əylənmək üçün çoxlu sayda istirahət mərkəzləri vardır. Bu istirahət mərkəzlərinin sahil boyunca uzanan təmiz parkları və küçələri ailə üzvləri ilə birlikdə istirahət etməyə imkan verir. Şəhərin mərkəzində yerləşən teatrlar, muzeylər, mağazalar və restoranlar turistlər üçün eyni yerdə həm gəzməyə, həm də alış-veriş etməyə imkan verir. Azərbaycan mətbəxi ölkə mədəniyyətinin mühüm hissəsini təşkil edir. İqlim şəraitindən asılı olaraq burada müxtəlif növ yeməklər hazırlanır. Yerli qoyun və yaxud dana əti ilə hazırlanmış zəfəranlı plov Azərbaycanın ən əsas yeməklərindən, qara çay isə ən məşhur içkilərindən sayılır.