MƏDƏNİYYƏT
Bişkekdə Azərbaycan və Qırğızıstan opera müğənnilərinin konserti olacaq
Bişkek, 10 oktyabr, AZƏRTAC
Oktyabrın 16-da Toktaqul Satılqanov adına Qırğızıstan Milli Filarmoniyasında Azərbaycan və Qırğızıstan opera müğənnilərinin konserti olacaq.
Konsertin dirijorları Cumaxmatov adına Qırğızıstan Dövlət akademik simfonik orkestrinin dirijoru, Qırğızıstanın Əməkdar Artisti Raxat Osmanaliyev və beynəlxalq müsabiqələr laureatı, M.F.Axundzadə adına Azərbaycan Dövlət Akademik Opera və Balet Teatrının dirijoru Əyyub Quliyev olacaq.
Azərbaycan tərəfdən Opera və Balet Teatrının solistləri, əməkdar artistlər İlahə Əfəndiyeva, Fərid Əliyev və başqaları çıxış edəcəklər.
Qırğızıstanı isə Moldıbayev adına Opera və Balet Teatrının solistləri, beynəlxalq müsabiqələr laureatları Bakıt Ibıkeev, Daniyar Musayev, Kunduz Karıpaeva, Zaira Raimbekova və başqaları təmsil edəcəklər.
Qulu Kəngərli
AZƏRTAC-ın xüsusi müxbiri
Bişkek