SİYASƏT
BİZ ADP-DƏN NİYƏ AYRILDIQ?! ONA GÖRƏ Kİ, QARAGURUHÇULARLA BİR MÖVQEDƏ DURA BİLMƏDİK
Bu gün biz öz həyatımızda yol verdiyimiz səhvlə bağlı həmyaşıdlarımıza səmimi müraciət etmək istəyirik. Əslində isə bizi “xoşbəxt” həyata səsləyən, ancaq onların göstərdiyi yolla gedəriksə daha “demokratik” bir dövlətə qovuşacağımızı, süd gölündə üzəcəyimizi vəd edən bir qrup saxtakar və yalançının zorakı təsirindən qurtulduğumuz üçün öz ürək sözlərimizi demək istəyirik. Azərbaycan Demokrat Partiyasının “nüfuzlu baronları” Rəsul Quliyev, Sərdar Cəlaloğlu, onların fitvası ilə özünü “amalçı” adlandırıb, əslində amalsız mövqedə dayanan bu cür adamlar bizi öz məqsədlərinə uyğun xülyalara inandırmağa çalışır, hər gün beynimizi yalan və böhtanlarla doldururdular. Okeanın o tayında Azərbaycan xalqından qarət edilmiş sərvətlər hesabına kef çəkən rəhbərlərinin tezliklə gələcəyini, özünün gəlişi ilə səadət, xöşbəxtlik, zənbillərlə dolu vəzifələr gətirəcəyini söyləyən bu “ideoloqlar” mövcud iqtidara qarşı hər cür qara yaxırdılar. Bu söhbətlər sanki İsa Peyğəmbərin zühurunu xatırladan İncil nəğmələrinə oxşayırdı. Lakin atalar yaxşı deyib: “Yalan ayaq tutar, yeriməz”. Bir qədər sonra biz özümüz dərk etdik ki, bu cür böhtançı adamlardan, üfunətli yalanları təbliğ edən “nəzəriyyəçi”lərdən ayrılmaq zamanı çatmışdır. İnanın ki, bu cür yalan və böhtanlara normal insan ağlı tab gətirə bilməzdi. ADP-nin böhtan tribunası olan “Hürriyyət” qəzetinin hansı yazısının sərlövhəsini oxuyurduqsa xəcalət çəkirdik. Elə bil ki, bu adamlar heç də bu dövlətdə yaşamır, bu torpağın çörəyini yeyib, suyunu içmirlər. Sanki bu torpaq onların vətəni deyildir. Bu gün Naxçıvan Muxtar Respublikasında Əmralı Babayev ADP Ali Məclisinin sədri kimi, Nurəddin Bayramov “ideloji” katib kimi, Tofiq Əhmədov təşkilat katibi kimi özlərini əsas yerli partiya funksionerləri hesab edirlər. Yasin Rüstəmov isə özünü partiyanın təşkilat sədri adlandırır. Vallah, 15-20 üzvü olan partiyada bu cür vəzifələri saymağa belə, adam xəcalət çəkir. Biz aşkar surətdə görürük ki, bu cür şər və böhtançı adamlarla uzağa getmək olmaz. Ona görə də bu cür üzdəniraq demokratlarla, boş vəd sahibləri ilə bir mövqedə dura bilmərik. Biz bu gün dərk edirik ki, müdrik insanlar - Vətəninə, elinə, millətinə bağlı adamlar həmişə saf hisslərlə, gözəl arzularla, xoş və ülvi diləklərlə ömür sürür, xalqın qəlbində, yaddaşında əbədi yaşayırlar. Tale heç də hər xalqa güclü lider, böyük xilaskar bəxş etmir. Azərbaycan xalqı xoşbəxtdir ki, onun Heydər Əliyev kimi mahir siyasətçisi, müdrik dövlət xadimi, xilaskarı və qüdrətli milli lideri vardır. Azərbaycanı böyük fəlakətlərdən qurtaran bu müdrik şəxsiyyət xalqının yolunda, sözün əsl mənasında, yanar çıraqdır. Bu bir həqiqətdir ki, Heydər Əliyev dühası, Heydər Əliyev şəxsiyyəti və qətiyyəti Azərbaycanı həqiqi müstəqilliyə qovuşdurmuş, ölkəyə əsl azadlıq, real demokratiya və möhkəm siyasi sabitlik gətirmişdir. Ərazicə Azərbaycandan qat-qat böyük ölkələr var ki, rəhbərləri dünyada tanınmır. Bu gün dünyada tanınan müstəqil Azərbaycanın rəhbəri yüksək şəxsiyyətinə və nüfuzuna görə ən qüdrətli dövlət rəhbərləri ilə yanaşı dayanır. Bu ucalığa, Heydər Əliyev zirvəsinə həsədlə baxan nankor və nadan demokratlar, onların rəhbərləri Rəsul Quliyev, Sərdar Cəlaloğlu, Aydın Quliyev kimi böhtançılar olsa-olsa dağın ətəyinə yaxınlaşa bilərlər. Hər addımda çırkin mənəviyyatlarını göstərən bu bədnam insanlar ağı qaradan seçməyi bacaran Azərbaycan xalqının gözündə artıq layıq olduqları nifrət damğasını qazanıblar. Bu gün biz bir həqiqəti də dərk edirik. Gənc siyasətçi İlham Əliyev qısa müddət ərzində respublikamızda və beynəlxalq aləmdə böyük nüfuz və hörmət qazana bilmişdir. Son hadisələr göstərdi ki, İlham Əliyevə hər yerdə hörmət edilir, o sayılır və onun sözünün xüsusi çəkisi vardır. O hətta Avropada əyani şəkildə göstərdi ki, Azərbaycan nümayəndəsi İlham Əliyev sözü havayı demir, öz iradəsini dərin və əsaslı məntiqlə, bacarıqla təlqin edə bilir. İlham Əliyevin bir siyasətçi kimi özünəməxsusluğu onun yersiz hücumlara dərhal reaksiya verməməsidir. Aramsız və həmişə də haqsız ittiham və tənqidlərə məruz qalan İlham Əliyev səbrlə, təmkinlə, ağılla, inadla siyasət Olimpinin zirvəsinə doğru irəliləməkdədir. Fikrimizcə, burada nəticə birdir: İlham Əliyevə dünya miqyasında tanınan bir siyasətçi kimi qısqanclıq edənlərin, Avropa Şurasında onun nailiyyətlərinin üstünə kölgə salanların mövqeyi erməni daşnakların mövqeyi ilə üst-üstə düşür. Bircə həqiqəti başa düşmək lazımdır ki, İlham Əliyev bu xalqın layiqli oğludur və onun da seçib-seçilmək və ölkə prezidenti olmaq hüququ vardır. Onsuz da hər şeyi xalq müəyyən edir və məhz bu səbəbdən özünü “demokrat” adlandıran başabəla partiya nümayəndələrinin böhtan və qarayaxmaları, su bulandırmaları, İlham Əliyevə vurulan siyasi badalaqlar haqsız, yersiz və hədərdir. Biz görürük ki, İlham Əliyev Azərbaycan gəncliyinin, real sabahımızın, gələcəyimizin siyasətçisidir. Gələcək isə xalqın rifahi uğrunda yorulmadan çalışanlara, onun uğrunda hər cür savaşa girməyə hazır olanlara məxsusdur. Biz bu qısa müddətdə gördük ki, hər dəfə okeanın o tayından “bos”un öz kanalları ilə Naxçıvana göndərilən çirkli pulları üstündə “peşəkar”lar arasında əsl döyüş başlayır, hər bir sent üstündə şivənlər qopur, dava-dalaş düşür. “Demokratların” pul ehtirası uğrundakı mübarizəsi və bu zaman aralarındakı yaramaz münasibətlər bizim bu cür insanları ancaq varlanmaq, qazanmaq üçün yaşadıqlarını dərk etməyimizi reallaşdırdı. Məhz həmin pul bölgülərində partiyanın əvvəlki maliyyə katibi, Zeynəddin kənd sakini, keçmiş polis əməkdaşı Ələkbər Bayramov, keçmiş təşkilat katibi Bayram Rəhimov öz vəzifələri ilə vidalaşmalı oldular. Hətta iş o yerə çatmışdı ki, döyüşdə uduzan ali təhsilli Bayramı orta təhsilli Tofiq əvəz etmişdi. Onlar zor gücünə yığılmış üzvlük haqlarını da eyş-işrət məclislərinə xərcləyir, dostlarının sağlığına tostlar deyir, bu pullardan yalnız öz şəxsi məqsədləri üçün istifadə edirdilər. Onlar sıravi partiya üzvlərinə müxtəlif müəssisə rəhbərləri, bəzi şəxslər haqda gələcək böhtanlar üçün donos yığmaq tapşırığı verirdilər. Bu gün biz görürük ki, müxalifətə xas olan “xəstəlik” ADP-dən yan keçmir. Artıq ADP-nin sıralarında da növbəti parçalanma hiss olunur. Xüsusilə bu hal partiya sədrinin ABŞ-da olmasından istifadə edən bəzi funksionerlərin onun əleyhinə kampaniya aparmasında özünü göstərir. Bu məsələ ADP-nin baş katibi Sərdar Cəlaloğlunun özünü bəzi rayon təşkilatlarında prezidentliyə namizəd kimi qələmə verməsindən sonra daha da dərinləşib. Partiya sədri isə okeanın o tayından bu proseslərə münasibət bildirməkdən çəkinir. Partiyada isə Rəsul Quliyev qarşısında baş katibi “vurub”, irəli getməyə can atan Aydın Quliyev kimi qəzet redaktoru da vardır. ADP-nin təbliğat maşını da məzhəkə doğurur. Rəsul Quliyevin okeanın o tayından keçirdiyi selektor müşavirələri 50 il bundan əvvəl aparılan bolşevizm təbliğatının bir formasını xatırladır. Bu cür təbliğat “yenilikləri” partiya üzvlərinin özlərini də gülüş obyektinə çevirmişdir. Artıq “liderlər lideri”nin vətənə gəlmək cəsarətsizliyi partiya üzvlərini çaşbaş salmışdır. Bu gün artıq heç kəs “İskra” ruhlu “Hürriyyət”in böhtan dolu cağırışlarına inanmır. Artıq ölkədə prezident seçkiləri kampaniyası başlanmışdır. İndiyə qədər yol verdiyimiz bütün yanlışlıqlara baxmayaraq, bir həqiqəti də demək istəyirik. Hazırda ölkəmizin Prezidenti Heydər Əliyev, eləcə də İlham Əliyevlə mübarizə aparacaq nəzəri rəqiblərin hamısı məlumdur. Hamıya məlumdur ki, hələlik mətbuatda adları hallandırılan 20-dək namizədin heç biri mövcud iqtidara qalib gəlmək üçün zəruri olan siyasi, ideoloji və təşkilatı potensiala, sosial bazaya malik deyildir. Ümumiyyətlə, dövlətimizin gələcək rəhbəri olmaq üçün müxalifətin, xüsusilə “demokratların” səyləri və arzuları əsassızdır. Zaman bütün müxalifətçilərdən proqmatik yol tutmağı və öz imkanlarını daha real qiymətləndirməyi tələb edir. Müxalifətçilərin fəaliyyət proqramı ilə dünyanın heç bir ölkəsində, hətta banan respublikasında da qalib gəlmək mümkün deyildir. Amma deyəsən, nə vaxtsa təsirinə düşdüyümüz “demokrat” müxalifət qüvvələrinin illər boyu sınanmış başqa bir silahı da vardır: Növbəti məğlubiyyətdən sonra seçkilərin guya qeyri-demokratik keçirildiyini və saxtalaşdırıldığını iddia etmək və yeni seçilən prezidentin legitimliyini qəbul etməmək üçün hay-küy salmaq. Ancaq belə mənasız mübarizə üsullarına həm ölkəmizdə, həm də xaricdə daha inanmırlar. Bu gün, prezident seçkiləri qarşısında meydan təfəkkürü ilə yaşayan həmin adamlar adi səs toplamaq qabiliyyətinə belə malik deyillər. Təəsadüfü deyildir ki, onlar keçmiş parlament seçkiləri və ümumxalq səsverməsindən (referendum) qalmış köhnə siyahıları axtarıb tapır, yenidən köçürür, “ölü canları” dirildir, saxta imzalarla siyahı tərtib edib, Bakıdakı rəhbərlərinə göndərirlər. Artıq Yasin Rüstəmov kimi xəyanətkarlar indidən öz aralarında hay-küy salır, məğlubiyyətin qorxusunu hiss edərək beynəlxalq təşkilatlara məktublar hazırlamaqla Azərbaycanın uzun illər ərzində qazandığı nüfuzu hörmətdən salmaq üçün start xəttinə çıxmağa hazırlaşırlar. Vallah, adam xəcalətindən yerə girir. Ehtiyatda olan bu demokrat “silah”ı da artıq qəbul edilən variant deyildir. Biz gənclər səhv etdiyimizi dərindən dərk edərək, Rəsul Quliyev “işığına” yığışıb qaranlıqda səadət və xoş gün axtaran yarasalardan birdəfəlik ayrılır, onların dövlətçiliyimiz əleyhinə olan mənasız fəaliyyətinə “bəsdir, əbəsdir” deyirik. Qoy bizim səhvlərimiz təkrarlanmasın. Biz görürük ki, onların heç bir sosial bazası yoxdur, xalq onlara inanmır, onlar ancaq öz dərnəkləri daxilində kimi isə aldada bilərlər. Ancaq nə edəsən ki, xarakterində dağıdıcılıq və pozuculuq hissləri tüğyan edən belə müxalif partiyalar və onların baş funksionerləri bu həqiqəti görə bilmirlər. Bu, mənəvi korluq da deyildir. Ötən on ildə keçilmiş yola, qazanılmış böyük uğurlara qısqanclıq hissidir, nankorluqdur. Qurmaq və yaratmaq kimi xeyirxah fəaliyyətdən uzaq olan belə nankorlardan bundan özgə nə gözləmək olar? Onlar yaxşı başa düşürlər ki, 8 milyonluq xalq məhz Heydər Əliyev kimi böyük, parlaq şəxsiyyətin düşünülmüş, sınaqdan çıxmış siyasəti və yorulmaz fəaliyyəti hesabına xoş və firavan günlərdə yaşamaq hüququ qazanmışdır. Əminik ki, bu iqtidarla biz həmişə irəliləyəcəyik, daim inkişaf edəcəyik. Heç bir təsirə məruz qalmadan bu sətirləri yekunlaşdırır, əziz oxucular, sizi əmin edirik ki, biz də müstəqil respublikamızın çiçəklənməsi üçün öz dövlətimizə sədaqətimizi sübut edəcək, heç bir böhtana uymadan yuxarıda ifadə etdiyimiz arzuların həyata keçməsi üçün var qüvvəmizi sərf edəcəyik. Naxçıvan Dövlət Universitetindən: Hacıyev Faiq Nəbi oğlu bədən tərbiyəsi və idman fakültəsinin birinci kurs tələbəsi Abdullayev Cəsarət Ərrəman oğlu mühəndis-pedaqoji fakültəsinin birinci kurs tələbəsi Fərəcov Beytulla Niyazi oğlu tarix-filologiya fakültəsinin üçüncü kurs tələbəsi Mahmudov Bəhruz Seyfəli oğlu mühəndis-pedaqoji fakültəsinin birinci kurs tələbəsi Ələkbərov Nəsurulla Allahverdi oğlu fizika-riyaziyyat fakültəsinin dördüncü kurs tələbəsi