Blokada şəraitində inkişaf möcüzəsi
Naxçıvan, 17 may, Rauf Kəngərli, AZƏRTAC
Düz 30 ildir ki, Naxçıvan blokada şəraitində yaşayır. Bu illər Naxçıvan üçün sanki bir sınaqdır. Qədim diyar bu sınaqdan da üzüağ çıxıb. Naxçıvan elə bir tarixi dövr keçir ki, bu, bütün dünya tarixində bir ilkdir. Muxtar respublikanın keçdiyi inkişaf yolu illər sonra da dünya tədqiqatçılarının mövzusuna çevriləcək. Çünki blokada və inkişaf anlayışı bir-birinə zidd anlayışlardır. Naxçıvan isə blokada vəziyyətində yaşasa da, sürətlə inkişaf edib. Azərbaycan Respublikasının Prezidenti, Ali Baş Komandan İlham Əliyevin mayın 10-da qalib ölkənin Prezidenti kimi muxtar respublikaya səfəri zamanı bu məqamlar bir daha diqqəti cəlb etdi.
AZƏRTAC-ın Naxçıvan bürosu Azərbaycan Respublikasının Əməkdar jurnalisti Mətanət Məmmədovanın Prezident İlham Əliyevin Naxçıvan Muxtar Respublikasına son səfəri ilə bağlı qeydlərini təqdim edir.
Dövlətimizin başçısının səfəri zamanı muxtar respublikanın inkişafını təsdiqləyən dəyərli fikirlərini xatırlayaq: “Naxçıvan Muxtar Respublikası son 20 il ərzində iqtisadi artımın templərinə görə rekordsmen bölgədir. Ümumi daxili məhsul 10 dəfədən çox artıb”.
Muxtar respublikada əldə edilmiş nailiyyətlər tarixi hadisədir. Belə hadisə tarixin heç bir dönəmində görünməyib. Hansı diyar belə vəziyyətdə ayaqları üzərində dura bilib? Hələ, üstəlik, gözəlliklər məkanına çevrilib? Hansı diyar çıraq işığının qaranlığını əlləri ilə boğub özünü nura boyayıb? Hansı diyar Naxçıvan kimi 30 ilin əvvəlindəki aclıqdan, səfalətdən ixracatçıya çevrilib?
Blokada ilə inkişafın qoşa addımlaması bir möcüzə yaradıb Naxçıvanda. Kəndləri, qəsəbələri, şəhərləri büsbütün abadlaşdırılıb, qazlaşdırılıb, elektrik enerjisi ilə təmin olunub. Ölkə başçısının söylədiyi kimi: “Vaxtilə Naxçıvanda işıq yox idi, enerji yox idi. Azərbaycandan gələn xətlər də Ermənistan tərəfindən kəsilmişdi. İndi isə Naxçıvan özünü elektrik enerjisi ilə tam təmin edir və bərpaolunan mənbədən istifadə edir. Bu, çox önəmlidir. Çünki bu, Naxçıvanın gözəl təbiətinə və ekoloji vəziyyətinə töhfə kimi qəbul edilməlidir”.
Naxçıvan şəhərindən şaxələnib Şərura, Kəngərliyə, Sədərəyə, Babəkə, Şahbuza, Culfaya, Ordubada uzanan yollar abadlaşıb. Bu gün muxtar respublikaya gələn qonaqlar kəndlərdəki ümumtəhsil məktəblərini universitet binalarına oxşadırlar. Ən ucqar kənddə belə səhiyyə müəssisələri, digər xidmət təşkilatları fəaliyyət göstərir. İnsanlar torpaq sahibinə çevriliblər, əkib-becərir, məhsul əldə edir, təsərrüfatlarını genişləndirir, dolanışıqlarını təmin edirlər. Hələ sovet dönəmindən bəri illərlə əl dəyməyən, ün yetməyən resursları ilə işıqlandı Naxçıvanımız. Məhsul, elektrik enerjisi ixracatçısına çevrildi. Turizm məkanlarının sorağını dünyaya yaydı. Ölkə başçısının söylədiyi kimi: “Naxçıvanın çox böyük turizm potensialı var. Bu gün yeni uçuş-enmə zolağının açılışını qeyd etdik və biz turistlərin Naxçıvana gəlməsini stimullaşdırmalıyıq. Əlbəttə, pandemiya ilə əlaqədar bütövlükdə turizm sektoru tənəzzülə uğrayıb. Amma əminəm ki, pandemiyadan sonra Naxçıvana gəlmək istəyən xarici qonaqların sayı daha da artacaq”.
İlbəil tikilənlər-yaradılanlar insan amilinə xidmət etdikcə firavan həyatımız blokadanın acılı günlərini, sadəcə, xatirəyə çevirdi. Ulu Öndərimiz burada Milli Ordumuzun təməlini qoydu. Bu ordu 90-cı illərdə Naxçıvanımızın sərhədlərinin təhlükəli vəziyyəti fonunda yarandı. Dünənki uşaqlar köksündəki acılı-şirinli günlərdə böyüyüb elə bir vətənpərvər gənc oldular ki, İkinci Qarabağ müharibəsində göstərdikləri rəşadət dillər əzbəri oldu. Ölkə başçısının dediyi kimi: “İkinci Qarabağ müharibəsində Naxçıvan Ordusunun hərbçiləri - həm xüsusi təyinatlılar, həm digər birləşmələrin hərbçiləri fəal iştirak etmişlər və şəhidlər vermişlər, böyük fədakarlıq göstərmişlər”.
Muxtar respublikanın digər gəncləri isə universitetlərdə, dövlət qurumlarında, iqtisadi, mədəni, ictimai həyatının ən fəal, nümunəvi fərdlərinə çevriliblər. Tək gənclərinmi? Xeyr, yaradılan şərait, dövlət dəstəyi, göstərilən isti münasibət, qayğı illərdir burada yaşayan insanların hər birinin həyat amalına çevrilib. Bu amalla da hər kəs öz sahəsində öz işi ilə məşğuldur. O tərzdə məşğuldurlar ki, o zəhmətin bəhrəsi bu gün muxtar respublikanın inkişaf göstəriciləridir. Birlik harada varsa, dirliyin orada olmasının təsdiqidir. Bir sözlə, Naxçıvanın inkişafı o qədər qürurvericidir ki, bu qürur bütün naxçıvanlıların qəlbində elə Naxçıvan boyda məhəbbətə çevrilib, rekordsmen diyarları ilə fəxr etmələrinə səbəb olub. Və hər kəs əmindir ki, bu inkişaf yaxın gələcəkdə daha yüksək səviyyəyə yüksələcəkdir. Ölkə başçısının qeyd etdiyi kimi: “Muxtar respublika hərtərəfli inkişaf edir və bu gün Naxçıvan ölkəmizin ən inkişaf etmiş bölgələrindən biridir. Əminəm ki, Naxçıvan bu liderliyi bundan sonra da saxlayacaqdır”.
Bölmənin digər xəbərləri
