BMT BAŞ MƏCLİSİNİN SESSİYASI BAŞA ÇATDI
BMT. İTAR-TASS xəbər verir ki, BMT Baş Məclisinin 55-ci sessiyası il ərzində gündəliyin regional münaqişələrdən və tərksilah problemlərindən tutmuş, ətraf mühitin qorunub saxlanması vəzifəsinədək beynəlxalq həyatın bütün sahələrinə aid 187 məsələni müzakirə edərək işini başa çatdırmışdır.
BMT Baş Məclisi 55-ci sessiyasının sədri Harri Holkeri /Finlandiya/ sessiyanın axırıncı ümumi iclasındakı yekun çıxışında bildirmişdir ki, Baş Məclisin son 12 ayda müzakirə etdiyi məsələlərin müxtəlifliyi və vacibliyi bəşəriyyət qarşısında duran fundamental problemlərə dair qlobal dialoq aparılması üçün Baş Məclisin nə dərəcədə mühüm olduğunu göstərir.
O, eyni zamanda nəzərə çarpdırmışdır ki, 2000-ci ilin sentyabrında Birləşmiş Millətlər Təşkilatının iqamətgahında keçirilmiş minilliyin zirvə toplantısında müəyyənləşdirilmiş məqsədlərin yerinə yetirilməsinin zəruriliyini ötən sessiyanın gedişində özünün başlıca vəzifəsi hesab etmişdir. Beynəlxalq birliyin həmin çox mötəbər məclisində 155-dən artıq ölkənin dövlət və hökumət başçıları iştirak etmişdilər. Onların qəbul etdikləri Minilliyin bəyannaməsində hazırda bəşəriyyət qarşısında duran problemlər qeyd edilmiş və bu problemlərin cari yüşillikdə həlli üçün tədbirlər müəyyənləşdirilmişdir. H.Holkeri demişdir: “BMT-nin üzvü olan ölkələrin nümayəndə heyətləri başa çatmış BMT ilində bu yolda xeyli faydalı işlər görmüşlər, lakin hələ gələcəkdə də çox iş görülməlidir”.
Bölmənin digər xəbərləri
