BMT-nin Baş katibi G20 ölkələrinə müraciət edib
Bakı, 23 noyabr, AZƏRTAC
“Böyük iyirmilik” - dünyanın ən böyük iqtisadiyyatlarına malik olan G20 qrupunun liderlərinin virtual görüşündə çıxış edən BMT-nin Baş katibi Antonio Quterreş iqlim üzrə Paris Sazişinə uyğun olaraq, istiləşmə prosesini 1,5 dərəcə Selsi həddində saxlamaq üçün tədbirlər görməyə çağırıb.
AZƏRTAC BMT-nin saytına istinadla xəbər verir ki, təşkilatın Baş katibi Antonio Quterreş Hindistan Baş nazirinin sədrliyi ilə keçirilən iclasa Çilidən rabitə vasitəsilə qatılıb. O, bu Latın Amerikası ölkəsinin paytaxtına Antarktidaya gedərkən gəlib. Buzlaqların əriməsi probleminə diqqəti cəlb etmək üçün nəzərdə tutulan səfər noyabrın sonunda başlayacaq BMT-nin 28-ci İqlim Konfransı ilə eyni vaxta təsadüf edir.
BMT-nin Baş katibi G20 virtual toplantısındakı çıxışına Qəzzada olan vəziyyətdən danışaraq başlayıb. O, Qətərin vasitəçiliyi, Misir və ABŞ-ın dəstəklədiyi İsrail və HƏMAS arasında əldə olunan razılaşmanı alqışlayıb. BMT rəhbəri əmin edib ki, dünya təşkilatı sazişin şərtlərinin həyata keçirilməsini dəstəkləmək və “Qəzzada dramatik humanitar vəziyyətə müsbət təsirini artırmaq” üçün bütün potensialını səfərbər edəcək.
Baş katib əlavə edib: "Dünyamız, xüsusən də inkişaf etməkdə olan ölkələr real bir fırtına - artan bərabərsizlik, iqlim xaosu, münaqişələr və aclıq ilə üz-üzədir. Bu arada, bir çoxları üçün fiskal sahə daralır və bu, borc yüklərinin ağırlaşmasına və qiymətlərin sürətlə artmasına gətirib çıxarır”. O, bu vəziyyəti “qlobal qeyri-sabitlik üçün resept” adlandırıb.
BMT rəhbərinin sözlərinə görə, dünyanın ən böyük iqtisadiyyatları üç istiqamətdə hərəkətə keçməklə böhrana təsir edə bilər. O, xüsusilə Dayanıqlı İnkişaf Məqsədlərinin (SDG) həyata keçirilməsi üçün G20-nin maliyyə dəstəyini yüksək qiymətləndirib. Baş katib əlavə 500 milyard dollar uzunmüddətli inkişafın maliyyələşdirilməsini təmin etmək üçün SDG-nin Stimul Proqramının icrasına nəzarət mexanizmi yaratmaq niyyətini açıqlayıb. O, bu fəaliyyət sahəsini “maliyyə ədaləti” adlandırıb.
BMT rəhbərinin tövsiyələrindəki ikinci məqam “struktur ədaləti”dir. O, "bugünkü köhnəlmiş, işlək olmayan və qeyri-bərabər qlobal maliyyə arxitekturasında" islahatlara davam etmək çağırışını təkrarlayıb. A.Quterreş bu kontekstdə G20-nin çoxtərəfli inkişaf banklarının islahatı üzrə fəaliyyətini yüksək qiymətləndirib.
Quterreşin sözlərinə görə, üçüncü fəaliyyət sahəsi “iqlim ədalətinə” nail olmaq üçün tədbirlər olmalıdır. O, istiləşməni 1,5 dərəcə Selsi səviyyəsində saxlamağa və bu baxımdan “ön cəbhə xəttində” olan insanları qorumağa çağırıb.
BMT rəhbərinin vurğuladığı kimi, bunun üçün 2030-cu ilə qədər Zərər və İtki Fonduna vəsait ayırmaq, bərpaolunan enerji mənbələrinə fəal keçid etmək, enerji səmərəliliyini artırmaq və bütün planet əhalisini təmiz enerji ilə təmin etmək lazımdır.
Baş katib sonda deyib: "Bu, həm də istiləşməni 1,5 dərəcə Selsi həddində saxlamaq məqsədinə uyğun dəqiq vaxt çərçivəsi ilə qazıntı yanacaqlarından istifadənin mərhələli şəkildə dayandırılması deməkdir".
Bölmənin digər xəbərləri
