BMT-NİN BAŞ KATİBİ MÜRACİƏT QƏBUL ETMİŞDİR
BMT-nin baş katibi Ümumdünya Əhali Günü münasibətilə müraciət qəbul etmişdir. Müraciətdə “Bir milyard yeniyetmənin sağlamlıq, informasiya və xidmətlərdən istifadə hüququ”ndan, gənclərin təhlükəsiz və sağlam həyat üçün göstərdikləri səyləri dəstəkləmək və onların öz ailələrinin, cəmiyyətlərinin rifahına töhfə vermək istəyindən danışılır. Müraciətdə deyilir ki, bütün dünyada milyonlarla qız və oğlan təhsildən məhrum olduqları üçün həm özlərinin, həm də bütünlükdə cəmiyyətin gələcəyinə təhlükə yaradırlar. Bir çox ölkələrdə qızlar 18 yaşına çatmamış ailə qururlar. Bu isə həm ana, həm də uşağın sağlamlığına ciddi təhlükə törədən erkən hamiləliklə nəticələnir. Təcrübə göstərir ki, təhsilli qadınlar daha gec ailə qururlar. Onların daha sağlam və daha yaxşı təhsil almış uşaqları olur. Bu müsbət ənənə bir nəsildən digərinə ötürülür. Təhsil və informasiya da onların uşaqlarının sayına təsir göstərə bilər. Əgər qadın ilk uşağını 18 yaşında deyil, 23 yaşında dünyaya gətirərsə, onda yalnız bu fakt əhali artımının səviyyəsini 40 faizədək aşağı sala bilər. Məlumat və xidmətlər də AİDS-ə qarşı mübarizədə və daha yaxşı sağlamlığa nail olmaqda mühüm rol oynayır. Gənclər HİV virusunun necə ötürüldüyünü və ondan necə qorunmaq lazım olduğunu bilməlidirlər. Bu, hər yerdə vacib olsa da, yoluxma səviyyəsi yüksək və ya yoluxmanın sürətlə yayıldığı ölkələrdə daha mühüm əhəmiyyətə malikdir. Reproduktiv sağlamlıq xidmətləri və reproduktiv sağlamlığa dair faktiki məlumatlar gənclərə təhlükəli davranışdan, arzuolunmaz hamiləlikdən və ümumiyyətlə sağlamlığın pozulmasından yaxa qurtarmağa kömək edəcəkdir. Seksual zorakılıq və qəddar rəftarın hökm sürdüyü münaqişə ərazilərində gənclərin özlərinə gəlmələri və ölkələrinin adi həyat tərzinə qayıtmasında iştirak etmələri üçün müvafiq və həssas xidmətlərə ehtiyac duyulur. Əgər dünya Minilliyin İnkişaf Məqsədlərinə nail olmaq və 1994-cü ildə Qahirədə Əhali və İnkişafa dair Beynəlxalq Konfransda qəbul edilmiş fəaliyyət proqramını həyata keçirmək istəyirsə, bu işdə gənclərin özləri səmərəli sürətdə iştirak etməlidirlər. Məhz onların özləri ehtiyaclarını müəyyənləşdirməli və özləri üçün nəzərdə tutulmuş proqramların hazırlanmasına kömək etməlidirlər. Müraciətdə həmçinin deyilir ki, dünyada hər 6 nəfərdən biri yeniyetmədir. İnkişaf etməkdə olan ölkələrdə əhalinin 40 faizindən çoxu hələ 20 yaşına çatmamış gənclərdir. Bu gənclərin qəbul etdikləri qərarlar dünyaya və gələcək nəsillərin perspektivlərinə təsir göstərəcəkdir. Bugünkü Ümumdünya Əhali Günündə gəlin onların ehtiyac duyduqları və layiq olduqları sağlamlıq, informasiya və xidmətlərdən istifadə hüquqlarını tanıyaq.
Bölmənin digər xəbərləri
