BMT-NİN YENİ BAŞ KATİBİ AND İÇMİŞDİR
62 yaşlı Cənubi koreyalı diplomat oktyabrın 13-də BMT-nin səkkizinci baş katibi təyin edilmiş və vəzifəsinin icrasına yanvarın 1-dən başlayacaqdır. Beynəlxalq birliyin əvvəlki başçısı Kofi Annan öz kabinetini dekabrın 31-də tərk edəcəkdir. Annan bu vəzifədə iki beşillik müddətdə işləmişdir.
BMT Baş Məclisi 61-ci sessiyasının sədri Həyya Rəşid əl-Xəlifə (Bəhreyn) bir daha rəsmən elan etmişdir ki, Pan Gi Mun 2007-ci il yanvarın 1-dən 2011-ci il dekabrın 31-dək BMT-nin baş katibi təyin olunmuşdur. Bundan sonra xanım əl-Xəlifə Pan Gi Muna andın sözlərini onun ardınca təkrarlamağı təklif etmişdir. Cənubi koreyalı diplomat sağ əlini ürəyinin, sol əlini isə BMT Nizamnaməsinin üstünə qoyaraq bildirmişdir: “Mən, Pan Gi Mun, təntənəli surətdə and içirəm ki, Birləşmiş Millətlər Təşkilatının baş katibi kimi mənə həvalə olunmuş vəzifələri tam loyallığa riayət etməklə, ağıl-kamalla və vicdanla yerinə yetirəcəyəm”. O, öz fəaliyyətində ancaq BMT-nin mənafelərini rəhbər tutacağına, heç bir dövlətin və ya təşkilata daxil olmayan digər hakimiyyət qurumlarının göstərişlərini qəbul etməyəcəyinə söz vermişdir.
Andiçmə mərasimindən əvvəl Baş Məclis “BMT-nin baş katibi Kofi Annana ehtiram” qətnaməsini bəyənmişdir. Sənəddə onun “beynəlxalq sülhün və təhlükəsizliyin möhkəmlənməsinə müstəsna töhfəsi, habelə BMT sisteminin möhkəmlənməsi, insan hüquqlarının və əsas azadlıqların müdafiəsi sahəsində böyük səyləri” qeyd edilmişdir.
Bölmənin digər xəbərləri
