İQTİSADİYYAT
Böyük Britaniyanın Robert Qordon və Aberdin Universitetlərində “Azərbaycan günü” keçirilmişdir
Bakı, 13 dekabr (AZƏRTAC). ARDNŞ-in təqaüd proqramı çərçivəsində xarici ölkələrdə təhsil alan tələbələr oxuduqları universitetlərdə Azərbaycana həsr olunmuş müxtəlif tədbirlər keçirməklə ölkəmiz haqqında həqiqətlərin dünya ictimaiyyətinə çatdırılması işinə töhfələrini verirlər. Belə tədbirlər daim ARDNŞ rəhbərliyinin diqqət mərkəzindədir və şirkət tərəfindən təbliğat üçün hər cür kömək göstərilir.
Şirkətin mətbuat xidmətindən AZƏRTAC-a verilən məlumata görə, bu silsilədən növbəti tədbirlər Böyük Britaniyanın Robert Qordon və Aberdin universitetlərində təşkil olunmuşdur. Robert Qordon Universitetində Azərbaycan haqqında həqiqətlərin dünya ictimaiyyətinə çatdırılması məqsədi daşıyan “Azərbaycan günü” keçirilmişdir. Tədbirdə ARDNŞ-in Böyük Britaniyadakı nümayəndəliyinin rəhbəri Rüfət Əfəndiyev, İnsan Resursları Departamentinin təlim və inkişaf şöbəsi rəisinin müavini Mahal Mehdiyev, universitetdə təhsil alan dünyanın müxtəlif ölkələrindən 50-yə yaxın tələbə, eləcə də təhsil ocağının müəllim və professor heyəti iştirak etmişdir. Tədbirdə ARDNŞ təmsilçiləri iştirakçılara Azərbaycanın tarixi, mədəniyyəti, iqtisadiyyatı və siyasi durumu, ölkədə həyata keçirilən neft-qaz siyasəti barədə ətraflı məlumat vermiş, qazanılan uğurlarda şirkətin rolundan danışmış, Azərbaycan və ARDNŞ haqqında təqdimatlar keçirmişlər.
Oxşar tədbir ARDNŞ və Təhsil Nazirliyinin dəstəyi ilə Böyük Britaniyanın Aberdin Universitetində təhsil alan təqaüdçülər tərəfindən də keçirilmişdir. Dünayanın müxtəlif ölkələrindən universitetdə təhsil alan 100-ə yaxın tələbə, təhsil ocağının müəllimləri “Azərbaycan günü”nü ARDNŞ təqaüdçüləri ilə birlikdə qeyd etmişlər. ARDNŞ-in Böyük Britaniyadakı nümayəndəliyinin rəhbəri R.Əfəndiyev və İnsan Resursları Departamentinin təmsilçisi M.Mehdiyev tədbirdə iştirak etmişlər. Təqaüdçülər Azərbaycan haqqında geniş təqdimat keçirmiş, ölkəmizin tarixi, milli musiqisi və mətbəxi, iqtisadi nailiyyətləri, eləcə də Qarabağ münaqişəsi barədə məlumat vermişlər. ARDNŞ təmsilçiləri qurum haqqında təqdimatla çıxış etmiş, Azərbaycan neftinin tarixindən, həyata keçirilən qlobal enerji layihələrindən, qazanılan uğurlardan danışmışlar. Təqdimatlarda ARDNŞ-in son dövrdə qazandığı uğurlara xüsusi yer ayrılmışdır. Rəsmi hissə başa çatdıqdan sonra təqaüdçülər tərəfindən tədbirlə bağlı suallardan ibarət viktorina keçirilmiş, sualları düzgün və dolğun cavablandıran tələbələrə hədiyyələr verilmişdir. Daha sonra qonaqlara Azərbaycanın milli şirniyyatları və ARDNŞ-in loqosu əks olunmuş hədiyyələr paylanmışdır.
Tədbir çərçivəsində ARDNŞ nümayəndələri Robert Qordon Universitetinin rəhbər və professor heyəti ilə görüşmüşlər. Görüşdə ARDNŞ ilə Robert Qordon Universiteti arasında tədris və təlim üzrə əməkdaşlıq məsələləri müzakirə olunmuş, universitetin ARDNŞ-in xarici təqaüd proqramının “Universitetlər” siyahısına salınması imkanları barəsində fikir mübadiləsi aparılmışdır.