SİYASƏT
BU GÜN AZƏRBAYCANDA PREZİDENT SEÇKİLƏRİ KEÇİRİLİR
AZƏRTAC xəbər verir ki, oktyabrın 15-də səhər saat 8.00-da Azərbaycanın bütün ərazisində Azərbaycan Respublikasının prezidentinin seçkiləri başlamışdır. Prezident postu uğrunda 7 namizəd mübarizə aparır.
Prezident seçkiləri 125 seçki dairəsi üzrə 5359 seçki məntəqəsində keçirilir. Bu məntəqələrdən 5148-i daimi fəaliyət göstərir, 33-ü Azərbaycanın xarici ölkələrdəki səfirlik, konsulluq və daimi nümayəndəliklərində, qalanları isə hərbi hissələrdə, islah-əmək və sanator-müalicə müəssisələrində, Azərbaycanın bayrağı altında Xəzərdə və dünya sularında üzən gəmilərdə yaradılmış məntəqələrdir.
Məntəqələr seçki bülletenləri, gözlə görünməyən mürəkkəb və bu mürəkkəbi oxumaq üçün xüsusi cihazlarla təmin edilmişdir. Məntəqələrə seçicilərin sayından 3 faiz çox, yəni 4 milyon 903 min 600 (4903600) ədəd seçki bülleteni palyanamışdır.
Dairə seçki komissiyalarının hamısı kompyuterləşdirilmiş və digər lazımi avadanlıqla təmin olunmuşdur. Kompyuterlər Dövlət Avtomatlaşdırılmış İnformasiya Sisteminə (DAİS) qoşulmuşdur. Bu da bütün məlumatların Mərkəzi Seçki Komissiyasının “Seçkilər” İnformasiya Mərkəzinə operativ ötürülməsini təmin edəcəkdir.
Saat 10-da, 12-də, 15-də, 17-də və 19-da DAİS vasitəsilə “Seçkilər” İnformasiya Mərkəzinin informasiya zalından seçkilərin gedişinə dair məlumatlar yayımlanacaqdır. Bu məlumatlar, həmçinin Mərkəzi Seçki Komissiyasının internet səhifələrində yerləşdiriləcəkdir.
Səsvermənin şəffaflığını təmin etmək üçün 500 seçki məntəqəsində quraşdırılmış veb-kameralar MSK-nın rəsmi internet səhifələrinə (www.msk.gov.az; www.cec.gov.az; www.infocenter.gov.az) qoşulmuşdur. Bu kameralar vasitəsilə seçki məntəqələrində səsvermənin gedişini (səsvermə kabinəsində bülletenlərin doldurulması prosesi istisna olmaqla) əvvəldən axıradək Mərkəzi Seçki Komissiyasının internet saytlarında izləmək mümkündür. Veb-kameralar quraşdırılmış seçki məntəqələrinin siyahısı mətbuatda dərc olunmuş və MSK-nın internet səhifələrində yerləşdirilmişdir.
Hazırda Azərbaycanda səsvermə hüququ olan vətəndaşların sayı 4 milyon 800 min nəfərdən çoxdur. Onların 10 minə yaxını xaricdəki seçki məntəqələrində səs verəcəkdir.
Seçki prosesini 1258 beynəlxalq müşahidəçi izləyir. Beynəlxalq müşahidəçilərin sırasında ATƏT, Avropa Şurası, Avropa Şurasının Parlament Assambleyası, Avropa Parlamenti, Avropa İttifaqı, Müstəqil Dövlətlər Birliyi (MDB), MDB Parlament Assambleyası, GUAM, Milli Demokratiya İnstitutu, Beynəlxalq Respublikaçılar İnstitutu, Türkiyənin Mərmərə Qrupu və digər nüfuzlu təşkilatların, eləcə də 59 dövlətin nümayəndələri vardır.
Bundan əlavə, prezident seçkilərini ATƏT DTİHB-nin direktoru Janes Lenarçik, Rusiya, Qazaxıstan, Ukrayna və Latviya MSK-larının sədrləri və üzvləri də izləyirlər.
Yerli müşahidəçilərin ümumi sayı isə 45 mindən çoxdur. Onlar siyasi partiyaların, qeyri-hökumət təşkilatlarının təmsilçiləri və öz təşəbbüsü ilə müşahidəçi statusu alanlardır.
Seçkiləri işıqlandırmaq üçün 30–dan çox xarici kütləvi informasiya vasitəsi MSK-ya müraciət etmiş və Komissiya onları müvafiq lövhəciklərlə təmin etmişdir. Bunların arasında FRERL-in (Azadlıq radiosu), TRT, Milli Rumıniya, Rustavi-2, “CTB”, NTV, Mir televiziyaları, Anadolu, “Frans-Press”, İTAR-TASS, “Assoşieyted Press” informasiya agentlikləri, “Rossiyskaya qazeta”, “EL Pais” kimi nüfuzlu qəzetlərin əməkdaşları da vardır.
Səsvermə saat 19:00-da başa çatacaqdır.
######