Bu gün Serbiyada matəm günüdür
Belqrad, 1 noyabr, AZƏRTAC
Noyabrın 1-i Serbiyada matəm günü elan olunub.
AZƏRTAC xəbər verir ki, bununla bağlı Serbiya hökuməti qərar qəbul edib.
Belə ki, ötən il noyabrın 1-də Novi Sad şəhərindəki dəmiryolu vağzalında 16 nəfərin ölümü, 2 nəfərin ağır yaralanması ilə nəticələnən qəza ilə əlaqədar 1 noyabr tarixi ölkədə matəm günü elan olunub.
Serbiya Prezidenti Aleksandar Vuçiç faciənin ildönümü ilə bağlı əhaliyə müraciətində deyib: “Bir il əvvəl ölkəmiz böyük bir faciə yaşadı, stansiya binasının tavanının çökməsi nəticəsində 16 nəfər həyatını itirdi. O vaxtdan bəri cəmiyyətimiz qarışıqlıq içindədir”.
Aleksandar Vuçiç bütün vətəndaşlardan bu tarixi cəmiyyəti parçalayan deyil, birləşdirən gün etməyə çağırıb.
Xatırladaq ki, faciəvi qəza bir il ərzində Serbiya gündəmini dəyişib, müxtəlif şəhərlərdə tələbələrin kütləvi etirazlarına səbəb olub. Bu müddət ərzində Baş nazir və digər nazirlər istefa verib. Serbiya Milli Assambleyası hökumətin istefasını təsdiqləyib, ölkədə yeni hökumət formalaşdırılıb.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
